Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ Atalia doet den Coninclijcken stamme dooden, wtghenomen Ioas, die wort verborghen, ende heymelijck opgeuoet, ende wert van Ioiada den Priester tot eenen Coninck ghemaect.

1

⁺ MAer^† Athalia Ahasias moeder, doen si sach, dat haer soon doot was, stont si op, ende vernielde alle dat Coninclijcke saet.

+ A vers 1

† 2.Par. 22.d.10

2

Maer Ioseba, de dochter des Conincx Ioram, Ahasia suster, name Ioas den soon Ahasia, ende stal hem van des Conincks kinderen die gedoot werden met zijnder voesteren, in de slaepcamer, ende sy verberch hem voor Athalia, dat hy niet ghedoot en wert.

3

Ende hy was met haer verborghen inden huyse des HEEren ses iaer lanck. Maer Athalia was Coninghinne inden Lande.

4

Maer^† int seuenste iaer seynde Ioiada henen, ende nam de Ouerste ouer hondert metten Hooftlieden ende den Artsiers, ende lietse tot hem int huys des HEEREN comen, ende maecte een verbont met hen, ende nam eenen eedt van hen inden huyse des HEEren, ende wees hen des Conincx soon,

† 2.Par. 23.a.1.

5

Ende gheboot hen, ende sprack: Dat ist dat ghy doen sult: Dat derdendeel van v, ghy die des Sabbaths aengaet, sult de wacht houden inden huyse des Conincx:

6

Ende een derdendeel sal zijn aen de poorte Sur: Ende een derdendeel aen de poorte die achter de Artsiers is, ende sult de wacht houden aen dat huys Massa.

7

⁺ Maer twee deelen van v allen, ghy die des Sabbaths af gaet, sult de wacht houden inden huyse des HEEren om den Coninck.

+ B vers 7

8

Ende sult v rontom den Coninck maken, ende elc met sinen geweere in de hant. Ende wye hier binnen tusschen de wandt coemt, die sterue, dat ghy by den Coninck zijt, als hy wt ende in gaet.

9

Ende de ouersten ouer hondert,^† deden allet, als hen Ioiada de Priester geboden hadde, ende namen tot hen hare mannen, die des Sabbaths aen gingen, met dien die des Sabbaths af ghingen, ende quamen totten Priester Ioiada.

† 2.Par. 23.c.8.

10

Ende de Priester gaf den Hooftlieden spiessen ende schilden, die des Conincks Dauids geweest waren, ende inden huyse des HEEren waren,

11

Ende de Artsiers stonden al om den Coninck, elc met sinen gheweere in de hant, vanden hoecke des huys ter rechter zijden aen, totten hoecke der slincker zijden toe, na den Altaer toe, ende nae den huyse.

12

Ende hy liet des Conincx soon voort comen, ende sette hem een Croone op,^† ende gaf hem dat ghetuychenis, ende maeckte hem tot eenen Coninck, ende waren vrolijc, ende sloeghen de handen te samen, ende spraken:^† Gheluck toe den Coninck.

† Deut. 17.d.23.

† 1.Re. 10.e.24. 3.Reg. 1.f.39.

13

^+* Ende doen Athalia dat geroep des volcx, dat toe liep, hoorde, quam si totten Volcke in dat huys des HEEren,

+ C vers 13

* 2.Pa. 23.d.12

14

Ende sach toe, Siet, doen stont de Coninc aen de Columne, soo het ghewoonlijck was, ende de Sangers, ende de trompetten by den Coninck, ende alle tvolck des landts was vrolijck, ende bliesen met trompetten. Maer Athalia schuerde haer cleederen, ende sprack: Oproer, Oproer.

15

Maer de Priester Ioiada gheboot den Ouersten ouer hondert, die ouer dat Heyr ghestelt waren, ende sprac tot hen: Leytse ten huyse wt, inden hof, ende wie haer volcht, die sterue doort sweerdt. Want de Priester hadde geseyt, si en soude niet inden huyse des HEEren steruen.

16

Ende si sloeghen de hant aen haer, ende si ginghen in, door den wech, daer de Rossen totten huyse des Conincx gaen, ende wert aldaer ghedoot.

17

^+† Doen maecte Ioiada een verbondt, tusschen den HEEre ende den Coninc, ende den volcke, dat si des HEEren volc zijn souden. Alsoo oock tusschen den Coninck ende den volcke.

+ D vers 17

† 2.Par. 23.e.16.

18

Doen ghinck allet volck des Lants in de kercke Baals, ende braken zijn Altaren af, ende braken zijn Beelden recht wel. Ende si verworchden Mathan den Priester Baals, voor den Altaer. Maer de Priester bestelde de Officien inden huyse des HEEren,

19

Ende nam de Ouersten ouer hondert, ende de Hooftlieden, ende de Artsiers, ende alle dat volck des lants, ende leyden den Coninck af, vanden huyse des HEEren, ende quamen opten wech vander poorten der Artsiers, tot des Conincx huyse,^† ende hy stelde hem op der Coninghen stoel.

† 3.Reg. 1.e.35.

20

Ende alle dat volc inden Lande was vrolijck, ende de stadt werdt stille. Maer Athalia dooden si metten sweerde, in des Conincx huys.

21

Ende Ioas was seuen iaer out, doen hy Coninck wert.