Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Van de tseuentich sonen Achabs, hoe dat hare hoofden Iehu ghebrocht werden, vanden broederen Ochosie. Hoe Iehu Baals papen dede dooden.

1

⁺ MAer Ahab hadde^* tseuentich sonen tot Samaria. Ende Iehu screef brieuen, ende santse nae Samaria, totten Ouersten der stadt Iesreel, totten Ouders ende Mombaers Ahab, ende si luyden aldus:

+ A vers 1

* Iudic. 8.g.30.

2

Als desen brief tot v coemt, ghy die ws Heeren sonen, waghens, rossen, vaste steden, ende rustinghe by v hebt.

3

Soo besiet welck die beste ende gheschicste sy, onder de Sonen ws Heeren, ende set hem op zijns vaders stoel, ende strijdet voor ws Heeren huys.

4

Maer si ontsagen hen met allen seer, ende spraken: Siet, twee Coninghen en

[p. 144r]

hebben voor hem niet ghestaen, hoe willen wy dan ghestaen?

5

Ende die ouer dat huys, ende ouer de stadt waren, ende de Ouders ende mombaers, sonden henen tot Iehu, ende deden hem segghen: Wy zijn uwe knechten, wy willent al doen, dat ghy ons segt: Wy en willen niemanden tot eenen Coninck maken. Doet wat v belieft.

6

Doen schreef hy den anderen brief tot hen, die luyde aldus: Ist dat ghy mijn zijt ende mijnder stemmen ghehoorsaem zijt, soo neemt de hoofden vanden mannen ws Heeren sonen, ende brengtse tot my morgen,⁺ ontrent dese tijt tot Iesreel, (Der sonen des Conincx waren tseuentich mannen, ende de grootste der stadt voedense op)

+ B vers 6

7

Doen nv den brief tot hen quam, namen si des Conincx sonen, ende sloeghen tseuentich mannen, ende leyden haer hoofden in koruen, ende besteldense tot hem nae Iesreel.

8

Ende doen de bode quam, ende gaft hem te kennen, ende sprac: Sy hebben de hoofden des Conincks kinderen gebracht. Doen sprack hy: Legtse op twee hoopen, voor de duere aen de poorte tot morghen toe.

9

Ende smorghens doen hy wt ghinc, tradt hy daer henen, ende sprack tot alle den volcke: Ghy wilt ymmers recht hebben? Siet, hebbe ick teghen mijnen Heere een verbont ghemaect, ende hem verworghet, wie heeft dan alle dese verslaghen?

10

Soo bekennet ghy ymmer, datter gheen woort des HEEren opter aerden en is geuallen, dat de HEEre heeft ghesproken teghen dat huys Ahab. Ende de HEEre heeft ghedaen,^† ghelijck hy ghesproken heeft door sinen knecht Elia.

† 3.Reg. 21.c.21.

11

Alsoo sloech Iehu alle die ouergebleuene vanden huyse Ahabs te Iesreel, alle zijne groote, zijn vrienden ende sine Priesters, tot dat hem niet een ouer en bleef.

12

⁺ Ende maecte hem op, troc wech, ende quam tot Samaria. Maer onder wegen was een herders huys,

+ C vers 12

13

Daer quam Iehu aen de broeders Ahasia, des Conincx Iuda, ende sprac: Wie zijt ghy? Sy spraken: Wy zijn broeders Ahasia, ende trecken af om te grueten des Conincks kinder, ende der Coninghinnen kinder.

14

Maer hy sprack: Grijptse leuende. Ende si grepense leuende, ende sloegense byden Put, aen der Herders huys, tweenveertich mannen, ende en lieter niet eenen van hen ouer blijuen.

15

Ende doen hy van daer reysde, vant hy Ionadab den sone^† Rechab, die hem ontmoette, ende gruette hem, ende sprac tot hem: Is v herte oprecht, ghelijc mijn herte met dijnen herte? Ionadab sprack: Iae. Ist alsoo, soo gheeft my v hant. Ende hy gaf hem zijn hant. Ende hy liet hem tot hem op den waghen sitten,

† Iere. 35.a.2.

16

Ende sprac: Coemt met my, ende siet mijnen ijuer om den HEEre. Ende si voerden hem met hem op sinen waghen.

17

Ende doen hy tot Samaria quam, sloech hijt al wat ouerbleuen was, van Ahab tot Samaria, tot dat hy hen vernielde,^† nae den woorde des HEEren dat hy tot Elia ghesproken hadde.

† 3.Reg. 21.c.21.

18

⁺ Ende Iehu vergaderde alle tvolc, ende dede tot hen seggen:^† Ahab heeft Baal een weynich ghedient, Iehu wil hem beter dienen.

+ D vers 18

† 3.Re. 16.d.24

19

Soo laet nv roepen alle de Propheten Baals, ende sine knechten ende alle sine Priesteren tot my, datmen niemandts en ghemisse, want ick heb den Baal een groote offerhande te doen. Diemen ghemissen sal, die en sal niet leuen. Maer Iehu dede sulcx om te ondergaen, op dat hy de dienaers Baals vernielen soude.

20

Ende Iehu sprac: Heyliget den Baal dese feeste, ende latet wtroepen.

21

Oock sant Iehu in gheheele Israel, ende liet al de dienaers Baals comen, also datter niemandt achter en bleef, die niet en quamen. Ende si quamen in dat huys Baals, alsoo dat dat huys Baals vol wert, aen allen eynden.

22

Doen sprac hy totten ghenen, die ouer dat gewaet huys waren: Brengt alle den dienaren Baals cleederen daer wt. Ende si brachten de cleederen daer wt.

23

Ende Iehu ghinc in de kercke Baals, met Ionadab den sone Rehab, ende sprack totten dienaren Baals: Ondersoect, ende siet toe, dat hier onder v niemant en sy, van des HEEren dienaren, maer Baals dienaers alleen.

24

⁺ Ende doen si daer in quamen, om offer ende Brandtoffer te doen, stelde Iehu daer buyten tachtentich mannen, ende sprack: Ist dat yemandt van dien mannen ontuliet, die welcke ic onder v handen geue, soo sal voor zijn siele, des selfs siele zijn.

+ E vers 24

25

Doen hy nv den Brantoffer voleynt hadde, sprack Iehu totten Artsiers ende Ridderen:^† Gaet henen in, ende slaet alle man, en laeter niemanden wt gaen. Ende si sloegense metter scherpten des sweerts. Ende de Artsiers ende Ridders wierpense wech, ende ghingen in de stadt der kercken Baals,

† 3.Re. 18.e.40. Deut. 13.a.5. 17.b.7.

26

Ende brachten daer wt de Columne der kercken Baals, ende verbrandense.

27

Ende braken de Columne Baals, met de kercke Baals, ende maecten een heymelijcheyt daer wt, tot desen dach toe.

28

Alsoo vernielde Iehu dien Baal wt Israel.

29

Maer vanden sonden Ieroboam, des soons Nebath, die Israel dede sondighen, en liet Iehu niet af, vanden gulden Calueren tot BethEl, ende tot Dan.

30

Ende de HEEre sprack tot Iehu:^† Om dat ghy ghewillich gheweest zijt, te doen wat my behaecht heeft, ende hebt aent huys Ahab gedaen al wat in mijnder herten was.^† Soo sullen v uwe kinderen opten stoel Israels sitten, tot in het vierde lidt.

† 4.Re. 15.b.12.

† Exod. 20.a.6.

31

⁺ Maer nochtans en hielt Iehu niet, dat hy inder Wedt der HEEren des Gods Israels gewandelt hadde, wt gheheelder herten, want hy en liet niet af vanden sonden Ierobeams, die Israel hadde doen sondighen.

+ F vers 31

32

Inder seluer tijt begoste de HEEre verdrietich te worden ouer Israel.^† Want Hasael sloechse in allen de palen Israels,

† 4.Reg. 8.b.12

[p. 144v]

33

Vander Iordanen tegen der Sonnen opganck, ende alle dat landt Gilead der Gaditen, der Rubeniten, ende Manassiten, van Aroer aen, die aen de beke by Arnon leyt, ende Gilead ende Basan.

34

Wat meer van Iehu te segghen is, ende al wat hy gedaen heeft, ende alle zijn macht, siet, dat is gheschreuen inder Cronijcke der Coninghen Israels.

35

Ende Iehu ontsliep met sinen vaderen, ende si begroeuen hem tot Samaria. Ende Ioahas zijn sone wert Coninc in zijn stede.

36

Den tijt die Iehu ouer Israel gheregeert heeft, zijn achtentwintich Iaer tot Samaria.