Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ Daer quam weder eenen dieren tijt seuen Iaer. Een wijf wijct daerom in een ander lant, ende quam weder, Benhadad is cranc ende vraecht raet van Heliseo, ende Ochosias Iorams sone.

1

⁺ ELisa sprac metten wijue,^† dies soon hy leuende hadde ghemaeckt, ende sprack: Maect v op, ende gaet wech met uwen huyse, ende zijt een vreemdelinck, waer ghy moecht. Want de HEEre sal een dierte roepen, die sal int lant comen seuen Iaer lanck.

+ A vers 1

† 4.Re. 4.d.36

2

Dat wijf maecte haer op, ende dede soo de man Godts haer seyde, ende trock wech met haren huyse, ende wert seuen Iaer een vreemdelinc inder Philisteen lant.

3

Maer doen die seuen Iaer om waren, quam dat wijf weder wt der Philisteen lant, ende si ghinc wt om den Coninck aen te roepen, om haer huys ende Ackers.

4

Maer de Coninck sprack met Gehasi den knape des mans Godts, ende seyde: Vertelt my alle de groote daden, die Elisa ghedaen heeft.

5

Ende nae dien hy den Coninck vertelde, hoe hy eenen dooden leuende hadde ghemaect, Siet, doen quam recht dat wijf daer toe, welcx soon hy leuende ghemaeckt had, ende riep den Coninck aen, om haer huys ende Ackers. Doen sprac Gehasi: Mijn Heer Coninc, dat is dat wijf, ende dit is haer soon, dien Elisa leuende heeft ghemaect.

6

Ende de Coninck vraechde den wijue, ende sy verteldet hem. Doen ghaf haer de Coninck eenen Camerlinck, ende sprac: Gheeft haer weder al dat haer is, daer toe allet incomen des Ackers, sint dier tijt, dat si dat lant verlaten heeft tot nv toe.

7

⁺ Ende Elisa quam^* tot Damascon: Doen lach Benhadad de Coninck te Sirien cranck. Ende men gaft hem te kennen, ende sprack: De man Godts is hier ghecomen.

+ B vers 7

* 3.Reg. 19.b.15

[p. 143r]

8

Doen sprack de Coninck tot Hasael: Neemt gauen met v,^† ende gaet den man Gods te ghemoet, ende vraget den HEEre door hem, ende spreect: Oft ick van deser cranckheyt mach ghenesen?

† 4.Reg. 1.a.5. 3.Reg. 14.a.2.

9

Hasael ghinck hem te ghemoet, ende nam giften met hem, ende alderley goeden te Damasco, veertich Kemelen lasts. Ende doen hi daer quam, tradt hy voor hem, ende sprac: V soon Benhadab, de Coninc tot Sirien heeft my tot v ghesonden, ende doet v segghen: Mach ick oock van deser crancheyt ghenesen?

10

Elisa sprack tot hem: Gaet henen, ende segt hem: Ghy sult genesen. Mer de HEEre heeft my vertoont, dat hy den doot steruen sal.

11

Ende de Man Godts sach ernstlijck, ende stelde hem bedroeft, ende weende.

12

Doen sprac Hasael: Waerom weent mijn Heere? Hy sprack:^† Ick wetet, wat quaet ghy den kinderen Israels doen sult: Ghy sult hare vaste steden met vier verbernen, ende haer Ionge mannen metten sweerde dooden, ende haer Ionghe kinderen verworghen, ende haer beuruchte vrouwen in stucken houwen.

† 4.Re. 10.f.32. 12.c.17. 13.a.3.e.22.

13

⁺ Hasael sprack: Wat is v knecht die hont, dat hy sodanighe groote dinghen doen soude? Elisa sprack:^† De HEEre heeft my vertoont, dat ghy Coninck tot Sirien zijn sult.

+ C vers 13

† 3.Reg. 19.c.15.

14

Ende hy ghinc wech van Elisa, ende quam tot sinen Heere. Die sprack tot hem: Wat seyt v Elisa? Hy sprack: Hy seyde my, ghy sult ghenesen.

15

Maer des anderen daechs nam hy de^† Saerdse, ende stacse int water, ende spreydese ouer hem henen. Doen sterf hy, ende Hasael werdt Coninck in zijn plaetse.

† Deken.

16

Int vijfste Iaer Ioram des soons Ahabs, des Conincx Israels, werdt Ioram de soon Iosaphat Coninck in Iuda.

17

^* Tweendertich Iaer was hy out, doen hy Coninc wert, ende regeerde acht Iaer te Ierusalem.

* 2.Par. 21.a.5.

18

Ende wandelde op den wech der Coninghen Israels, ghelijc dat huys Ahab dede. Want Ahabs dochter was zijn wijf, ende hy dede, dat den HEEre qualijck beuiel.

19

Maer de HEERE en woude Iuda niet verderuen, om zijns knechts Dauids wille,^* ghelijck hy hem ghesproken hadde, hem een licht te gheuen onder zijnen kinderen altoos.

* 2.Reg. 7.c.12

20

^† Tot zijnder tijt vielen de Edomiten van Iuda af, ende maecten eenen Coninc ouer hen.

† 2.Reg. 8.c.14. 3.Re. 22.g.48. 2.Par. 21.b.8.

21

⁺ Want Ioram was door Saira ghetrocken, ende alle de waghens met hem, ende was snachts opghestaen, ende hadde de Edomiten gheslaghen, die rontom hem waren:

+ D vers 21

22

Daer toe de ouersten ouer de waghens, alsoo dat dat volc vloot in sine Hutten. Daerom vielen de Edomiten af van Iuda, tot op desen dach. Oock viel Libna ter seluer tijt af.

23

Wat meer van Ioram te segghen is, ende alle wat hy ghedaen heeft, Siet, dat is geschreuen inde Cronijcke der Coningen Iuda.

24

Ende Ioram ontsliep met sinen Vaderen, ende wert begrauen met sinen vaderen inde stadt Dauids.^† Ende Ahasia zijn soon wert Coninck in zijn stede.

† 2.Par. 22.b.1.

25

Inden twaelfsten Iare Ioram des soons Ahab des Conincx Israels, werdt Ahasia de sone Ioram, Coninc in Iuda.

26

Ahasia was tweentwintich Iaren out, doen hy Coninck wert ende regeerde een Iaer te Ierusalem. Sijn Moeder hiet Athalia, een dochter Amri, des Conincx Israels.

27

Ende wandelde inden wech des huys Ahabs, ende dede dat den HEEre qualijck behaechde, gelijck dat huys Ahabs. Want hy was een behoude soon inden huyse Ahabs.

28

Ende hy trock met Ioram, den soon Ahabs inden strijt tegen Hasael den Coninck tot Sirien, na Ramoth in Gilead. Maer de Siriers sloeghen Ioram.

29

Doen^† keerde Ioram de Coninck wederom, dat hy hem soude laten heelen te Iesreel, vanden slaghen die hem de Siriers gheslaghen hadden, te Rama, doen hy teghen Hasael den Coninc tot Sirien street. Ende Ahasia, de sone Ioram, de Coninck Iuda quam af om te besoecken Ioram de sone Ahab te Iesreel, want hy lach cranck.

† 4.Reg. 9.c.15