Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Van Ioram ende Iosaphat hoe die oorloochden. Ende wat haer Heliseus seyt.

1

⁺ IOram de sone Ahab wert Coninc ouer Israel tot Samaria, inden achthiensten Iare Iosaphat des Conincx Iuda, ende regeerde twelf Iaer.

+ A vers 1

2

Ende dede dat den HEEre qualijck beuiel, Nochtans niet gelijck zijn Vader ende zijn Moeder.^† Want hy nam de Columnen Baals wech, die zijn vader dede maken.

† 3.Reg. 16.d.25

3

Maer hy bleef hangen aende sonden Ierobeams des soons Nebath, die Israel dede sondighen, ende hy en liet daer niet af.

4

Mesa de Coninc der Moabiten hadde veel Schapen, ende gaf tot Chijnse den Coninck Israels, wolle van hondert duysent Lammeren, ende van hondert duysent Rammen.

5

Maer doen Ahab doot was^* viel der Moabiten Coninck af, vanden Coninc Israels.

* 4.Reg. 1.a.4

6

Doen troc de Coninck Ioram ter seluer tijt wt van Samaria, ende ordineerde dat gheheel Israel,

7

Ende sant henen tot Iosaphat den Coninck Iuda, ende dede hem segghen: Der Moabiten Coninc is van my afgeuallen: Coemt met my om te strijden, tegen de Moabiten. Hy sprack: Ick wil op comen.^† Ic ben gelijck ghy, ende mijn volck ghelijck v volck, ende mijn Rossen ghelijck uwe Rossen.

† 3.Reg. 22.a.4 2.Par. 18.a.3.

8

Ende sprac: Door welcken wech willen wy optrecken? Hy sprac: Door den wech inder woestijnen Edom.

9

⁺ Alsoo trock de Coninck Israels, ende de Coninck Iuda ende de Coninck Edom henen. Ende doen sy seuen dachreysen trocken, en hadde dat Heyr noch dat Vee dat sy met hen hadden geen water.

+ B vers 9

10

Doen sprac de Coninc Israel: O wee, de HEERE heeft dese drie Coninghen ghenoot, dat hyse inder Moabiten handen soude gheuen.

11

Maer Iosaphat sprack:^† En is hier gheen Propheet des HEEREN, dat wy den HEEre door hem raet vraechden? Doen antwoorde een vanden knechten des Conincx Israels, ende sprac: Hier is Elisa de sone Saphat, die Elia water opde

† 3.Reg. 22.a.6.

[p. 140v]

handen goot.

12

Iosaphat sprack: Des HEEren woort is by hem. Also trocken, de Coninck Israels, ende Iosaphat, ende de Coninck Edom, tot hem af.

13

⁺ Mer Elisa sprack totten Coninck Israels: Wat hebt ghy met my te doen? Gaet henen totten Propheten ws Vaders, ende totten Propheten uwer moeder. De Coninck Israels sprack tot hem: Neen, want de HEEre heeft dese drye Coninghen genoot, dat hyse inder Moabiten handen soude geuen.

+ C vers 13

14

Elisa sprac: Also warachtelijck als de HEEre Sebaoth leeft, voor dien ick stae, Waert dat ick Iosaphat den Coninck Iuda niet en aensage, ick en wilde v niet aensien noch achten.

15

So brengt my nv eenen speelman. Ende doen de speelman op dat snarenspel speelde, quam de hant des HEEREN ouer hem,

16

Ende sprack: So seyt de HEERE: Maect hier ende daer grachten aen dese Beke. Want also spreect de HEEre:

17

Ghy^† en sult gheenen wint noch reghen sien, nochtans sal de Beke vol waters worden, dat ghy ende v gesinne, ende uwe Vee drincke.

† 3.Reg. 17.a.1. 18.e.45.

18

⁺ Daer toe is dat een cleyn dinc voor den HEEre. Hy sal ooc de Moabiten in uwen handen gheuen,

+ D vers 18

19

Also dat ghy slaen sult alle vaste steden, ende alle wtuercoren steden,^* ende sult alle goede boomen vellen, ende sult alle waterfonteynen verstoppen, ende sult allen goeden Acker met steenen woest maken.

* Deut. 20.c.19.

20

Maer smorghens alsmen Spijsoffer offert, Siet, doen quam een water door den wech van Edom, ende veruulde dat lant met water.

21

Maer doen alle Moabiten hoorden dat de Coninghen op trocken, om tegen hen te strijden, riepen sy alle, die totter rustinghe out genoech, ende daer ouer waren, ende traden aen de Frontieren.

22

Ende doen sy hen smorghens vroech op maecten, ende de Sonne op ghinck op dat water, soo dochte den Moabiten, dat water teghen hen root zijn als bloet,

23

Ende seyden: Het is bloet. De Coninghen hebben hen metten sweerde verdoruen, ende deen sal den anderen gheslaghen hebben. Huy, Moab maect v nv totter Bueten.

24

Maer doen sy totten Legher Israels quamen, stonden de Israeliten op, ende sloeghen de Moabiten: Ende sy vloden voor hen. Maer sy quamen in ende sloeghen Moab,

25

⁺ Die steden braken sy, ende elc wierp zijne steenen op allen goeden Acker, ende veruuldense, ende verstopten alle waterfonteynen, ende velden alle goede boomen, tot dat niet dan de steenen aen Careelmueren ouerbleuen, ende sy omringdense met slingheren ende sloeghense.

+ E vers 25

26

Maer doen der Moabiten Coninck sach, dat hem den strijdt te sterck was, nam hy seuenhondert mannen tot hem, die dat sweert wt trocken, om wt te vallen teghen den Coninck Edom. Maer sy en vermochten niet.

27

Doen nam hy zijnen eersten soon, die in zijn plaetse Coninck soude werden, ende offerde hem opter mueren tot eenen Brantoffer. Doen wert Israel seer toornich, dat sy van hem aftrocken, ende keerde wederom te lande.