Den Bibel, Inhoudende dat Oude ende Nieuwe Testament (Biestkensbijbel)

[p. 139v]

¶ Regum, Dat tweede Boeck der Coninghen.

¶ Dat eerste Capittel.

¶ Van Ahasias Regiment, ende Iorams zijns Broeders.

1

⁺ AHasia de sone Ahab werdt Coninck ouer Israel te Samaria, inden seuenthiensten Iaer Iosaphats des Coninx Iuda, ende regeerde ouer Israel twee iaer,

+ A vers 1

2

Ende dede dat den HEEre qualijck beuiel, ende wandelde inden weghe zijns vaders, ende zijnder moeder, ende in den wege Ierobeams des soons Nebath, die Israel dede sondigen.

3

Ende diende Baal, ende aenbadt hem: Ende vertoornde den HEEre den Godt Israels gelijck zijn Vader dede.

4

De^† Moabiten vielen ooc af van Israel, doen Ahab doot was.

† 2.Reg. 8.a.2. 4.Reg. 3.a.5.

5

Ende Ahasia viel door de tralien in zijn sale tot Samarien, ende wert cranc. Ende seynde boden wt, ende sprack tot hen:^† Gaet henen, ende vraecht BaalSebub den Godt tot Ekron, oft ick van deser crancheyt ghenesen sal?

† 3.Reg. 14.a.2. 4.Reg. 8.b.8.

6

⁺ Maer de Enghel des HEEren sprack met Elia den Thisbite: Op, ende gaet den boden des Conincx te Samaria te gemoet, ende spreket tot hen: En isser dan gheen Godt in Israel, dat ghy henen gaet om te vragen BaalSebub, den Godt Ekron?

+ B vers 6

7

Daerom so spreect de HEERE: Ghy en sult vanden bedde niet comen, daer ghy v op gheleyt hebt, maer sult den doot steruen. Ende Elia ghinck wech.

8

Ende doen de boden weder tot hem quamen, sprack hy tot hen: Waerom coemt ghy weder? Sy spraken tot hem:

9

Ons quam een man opwaerts te gemoet, ende sprack tot ons: Gaet wederom henen totten Coninck, die v wtghesonden heeft ende segt tot hem: Dus spreeckt de HEEre: En isser dan gheen Godt in Israel, dat ghy henen seyndet om te vraghen BaalSebub den Godt Ekron? Daerom en sult ghy vanden bedde niet comen, daer ghy v op geleyt hebt, maer sult den doot steruen.

10

Hy sprack tot hen: Hoe was de man ghestelt die v ghemoette, ende sulcx tot v seyde?

11

Sy seyden tot hem:^† Hy hadde een rouwe huyt aen, ende een lederen gordel om zijn lendenen. Maer hy sprack: Het is Elia de Thisbite.

† Matt. 3.a.4. Hebr. 11.g.37.

12

⁺ Ende hy seynde henen tot hem, eenen Hooftman ouer vijftich, metten seluen vijftigen. Ende doen die tot hem op quam siet, doe sat hy bouen opten berch. Maer hy sprack tot hem: Ghy man Godts, de Coninck seyt, ghy sout af comen.

+ C vers 12

13

Elia andtwoorde den Hooftman ouer vijftigen, ende sprack tot hem: Ben ick een man Gods, soo valle vyer vanden Hemel, ende verslinde v ende uwe vijftige.^† Doen viel dat vier vanden Hemel, ende verslinde hem ende zijne vijftige.

† Luc. 9.f.54. 3.Reg. 18.e.38. Eccle. 48.a.3.

14

Ende hy seynde wederom eenen anderen Hooftman ouer vijftich tot hem, met zijnen vijftigen: Die antwoorde ende sprac tot hem: Ghy man Gods, So seyt de Coninc: Coemt haestelijc daer af.

15

Elia antwoorde ende sprack: Ben ick een man Gods, so valle vyer vanden Hemel, ende verslinde v ende uwe vijftige. Doen viel dat vyer Gods vanden Hemel, ende verslinde hem, ende zijn vijftighe.

16

⁺ Doen seynde hy wederom henen den derden Hooftman ouer vijftighe, met zijnen vijftighen. Doen die tot hem bouen quam, buychde hy zijn knien tegen Elia ende smeecte hem, ende sprac tot hem: Ghy man Gods, laet mijn siele, ende de sielen uwer knechten deser vijftigen, voor v wat gelden.

+ D vers 16

17

Siet, dat vyer is vanden Hemel gheuallen, ende heeft die eerste twee Hooftlieden ouer vijftich, met haren vijftigen verslindt. Maer nv laet mijn siele wat gelden voor v.

18

Doen sprac de Enghel des HEEren tot Elia: Gaet met hem af, ende en vreest v niet voor hem. Ende hy maecte hem op, ende ghinc met hem af totten Coninck.

19

Ende hy sprack tot hem: Dus seyt de HEEre: Daerom, dat ghy boden hebt ghesonden, ende laten vragen, BaalSebub den God tot Ekron, als ofter gheen Godt in Israel en waer, welcx woort men mocht vragen, so en suldy vanden bedde niet comen, daer ghy op ghelegen zijt, mer ghy sult den doot steruen.

20

Also sterf hy na den woorde des HEEren, dat Elia gesproken hadde. Ende Ioram wert Coninc in zijn plaetse, inden anderen Iaer Iorams des soons Iosaphat des Conincx Iuda, want hy en hadde gheenen soon.

21

Maer wat meer van Ahasia te segghen is, al dat hy ghedaen heeft, siet, dat is ghescreuen inde Cronijcke der Coninghen Israels.