Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvi. Capittel.

¶ Baesa sterft, zijn soon Ella regneert in zijn plaetse, Simri doot hem ende neemt dat rijck in. Tvolck wert ghedeelt, Ende Ahab wert Coninck.

1

⁺ INden sessentwintichsten Iare Assa, des Conincx Iuda, wert Ella de sone Baesa Coninck ouer Israel, te Thirza twee Iaer lanck.

+ A vers 1

2

Maer zijn knecht Simri de Ouerste ouer de helft der waghens, maeckte een verbondt teghen hem. Maer hy was te Thirza, dranck ende was droncken int huys Arza, des Voochts te Thirza.

3

Ende Simri quam daer in, ende sloech hem doot, int seuenentwintichste Iaer Assa des Conincx Iuda, ende wert Coninck in zijn stede.

4

^† Ende doen hy Coninc was, ende op zijnen stoel sat, sloech hy dat geheel huys Baesa, ende en liet niemanden ouer blijuen, ooc dien, die aen de wandt pist, daer toe zijne erfghenamen ende zijne vrienden.

† 3.Reg. 14.b.10. 21.c.22.

5

Also vernielde Simri dat geheele huys Baesa,^† nae den woorde des HEEren, dat hy ouer Baesa gesproken hadde, door den Propheet Iehu,

† 3.Reg. 15.g.37.

6

Om alle der sonden wille Baesa, ende zijns soons Ella die sy deden, ende deden Israel sondighen, om den HEERE den Godt Israels te vertoornen door haer Afgoderie.

7

Maer wat meer van Ella te segghen is, ende wat hy gedaen heeft, siet, dat is gheschreuen inder Cronijcken der Coninghen Israels.

8

⁺ Inden seuenentwintichsten Iare Assa, des Conincx Iuda, wert Simri Coninc seuen dagen lanck te Thirza. Want dat volc lach voor Gibethon der Philisteen.

+ B vers 8

9

Maer doen dat volck inden Legher hoorde segghen, dat Simri een verbont ghemaect, ende den Coninck ooc verslagen hadde,^† doen maeckte dat gheheel Israel inden seluen daghe, Amri den velthooftman tot eenen Coninck ouer Israel inden Legher.

† 3.Re. 12.c.20.

10

Ende Amri tooch op, ende dat gheheel Israel met hem van Gibethon ende beleyden Thirza,

11

^† Maer doen Simri sach, dat de stadt gewonnen soude worden, ghinck hy in dat Paleys int huys des Conincx, ende verbernde hem seluen metten huyse des Conincx ende sterf,

† 4.Reg. 9.f.31.

12

Om zijnder sonden wil, die hy ghedaen hadde, doende dat den HEEre qualijc behaechde, ende wandelde inden wech Ierobeams ende in zijn sonden die hy dede, dat hy Israel dede sondigen.

13

⁺ Maer wat meer van Simri te seggen is, ende hoe hy een verbont maecte, siet, dat is gheschreuen inder Cronijcken der Coningen Israels.

+ C vers 13

14

Doen ter tijt deylde hem dat volc Israels in twee deelen, deen helft hinc aen Thibni den sone Ginath, dat sy hem tot eenen Coninc souden maken: Maer de ander helft hinc aen Amri.

15

Maer dat volck dat aen Amri hinc, wert stercker dan dat volck dat aen Thibni hinc, den sone Ginath. Ende Thibni sterf, doen wert Amri Coninck.

16

Inden eenendertichsten iare Assa des Conincx Iuda, wert Amri Coninc ouer Israel twelf Iaer, ende regeerde te Tirza ses Iaer.

17

Hy cocht den berch Samaria van Semer, om twee Centener siluers, ende timmerde opten berch, ende hiet de stadt die hy timmerde na den name Semer des berchs Heeren, Samaria.

18

Ende Amri dede dat den HEEre qualijck behaechde, ende was ergher, dan alle die voor hem gheweest waren.

19

Ende wandelde in alle weghen Ierobeams des soons Nebath, ende in zijne sonden, daer hy Israel mede dede sondigen, op dat sy den HEEre God Israels souden vertoornen in hare Afgoderije.

20

Maer wat meer van Amri te seggen is, ende al wat hy ghedaen heeft, ende zijne macht die hy geoeffent heeft, Siet,

[p. 136r]

dat is gheschreuen inder Cronijcken der Coninghen Israels.

21

Ende Amri ontsliep met zijnen Vaderen, ende wert begrauen tot Samaria.

22

Ende Ahab zijn sone wert Coninck in zijn stede.⁺ Inden achtendertichsten Iare Assa, des Conincx Iuda, wert Ahab de sone Amri, Coninck ouer Israel,

+ D vers 22

23

Ende regeerde ouer Israel tot Samaria tweentwintich Iaer. Ende dede dat den HEEre qualijck behaechde, bouen alle die voor hem gheweest waren,

24

Ende het was hem cleyn dat hy wandelde inde sonden Ierobeams des soons Nebath,^† ende nam daer toe Isebel de dochter Ethbaal, des Conincx tot Sidon tot eenen wijue. Ende ghinc henen ende diende Baal, ende aenbede hem.

† Deut. 7.a.1.

25

Ende rechte Baal eenen Altaer op inden huyse Baal, dat hy hem timmerde te Samaria,

26

Ende maeckte een boschken, so dat Ahab meer dede om den HEEre den Godt Israels te vertoornen, dan alle Coninghen Israels die voor hem gheweest waren.

27

Ter seluer tijt timmerde Hiel van BethEl, Ieriho^† Het Coste hem zijnen eersten soon Abiram dat hy dat fondament leyde, ende zijnen Ioncsten soon Segub, dat hy de duere sette, na dat woordt des HEEren dat hy ghesproken had door Iosua den sone Nun.

† Iosue. 6.d.26.