Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Ierobeams huysurouwe vraecht raet, van Achis den Propheet van haers soons wegen, Ierobeam sterft, Ende zijn soon Nadab wort Coninck van dat regiment Roboams.

1

⁺ IN dien tijt was Abia den soon Ierobeams cranck.

+ A vers 1

2

Ende Ierobeam sprac tot zijnen wijue:^† Maect v op, ende vercleet v dattet niemant en mercke, dat ghy Ierobeams wijf zijt, ende gaet henen na Silo. Siet, aldaer is de Propheet Ahia,^† die my ghesproken heeft dat ick Coninck zijn soude ouer dat volck.

† 4.Reg. 8.b.8.

† 3.Reg. 11.e.31.

3

Ende neemt met v thien brooden ende Coecken, ende een Cruycke met Honich, ende gaet tot hem, dat hy v segghe, hoe dattet metten Ionghen gaen sal.

4

Ende dat wijf Ierobeams dede also, ende stont op, ende ghinck na Silo, ende quam int huys Ahia. Maer Ahia en coste niet gesien, want zijne ooghen versterden van ouderdom.

5

Maer de HEEre sprack tot Ahia: Siet, dat wijf Ierobeams coemt, dat sy v van haren sone een sake vraghe, want hy is cranck. So spreect nv met haer, aldus, ende aldus.

6

Ende als sy nv in quam, steldese haer vreemt. Maer als Ahia dat ruysschen haerder voeten hoorde, ter dueren in comen sprack hy: Coemt in ghy wijf Ierobeams. Waerom stelt ghy v so vreemt? Ick ben tot v ghesonden een hert bode.

7

⁺ Gaet henen ende segt Ierobeam: Dus spreect de HEEre de God Israels:^† Ick heb v verheuen wt den volcke, ende tot eenen Vorst ouer mijn volck Israels geset,

+ B vers 7

† 3.Reg. 12.e.20.

8

Ende hebbe dat Coninckrijc van Dauids huyse gheschuert, ende v gegheuen. Maer ghy en hebt niet gheweest als mijn knecht Dauid, die mijne gheboden hielt, ende wandelde my na van gheheelder herten, dat hy dede wat my slechs wel behaechde.

9

Ende hebt quaet ghedaen bouen alle die voor v geweest zijn. Ghy zijt henen gegaen, ende hebt ander goden ghemaeckt ende ghegoten beelden, dat ghy my tot gramschap sout verwecken, ende hebt my achter uwen rugghe gheworpen.

10

Daerom siet, ick wil ongheluc ouer dat huys Ierobeams brenghen, ende wtroeyen aenden Ierobeam^† oock dien, die aende wandt pist, den beslotenen ende verlatenen in Israel. Ende wil de nacomelinghen des huys Ierobeams wt vaghen, ghelijcmen dreck wt vaecht, tot dattet geheelijc met hem ghedaen is.

† 1.Re. 25.d.22. 3.Reg. 21.c.21. 4.Reg. 9.b.8.

11

⁺ So^† wie van Ierobeam sterft inde stadt, dien sullen de Honden eten: Maer wie opten velde sterft, dien sullen de Voghelen des hemels eten, want de HEEre heuet ghesproken.

+ C vers 11

† 3.Reg. 15.g.37. 21.d.24.

12

Soo maect v nv op ende gaet thuys. Ende als uwen voet ter stadt in treet, so sal dat kint steruen.

13

Ende dat geheel Israel salt beclagen, ende sullent begrauen. Want dese alleen van Ierobeam sal ten graue comen, Daerom, dat wat goets aen hem gheuonden is, voor den HEEre den God Israels, inden huyse Ierobeams.

14

Maer de HEEre sal hem eenen Coninck ouer Israel verwecken,^† die sal dat huys Ierobeams wtroeyen in dien daghe. Ende wat isser nv wtghericht?

† 3.Reg. 15.e.29

15

^* Ende de HEEre sal Israel slaen, ghelijck als dat riet inden water beweecht wort, ende sal Israel wt plucken wt desen goeden lande, dat hy haren vaderen ghegeuen heeft, ende salse ouer dat water wtstroeyen, om datse hare Haghen gemaect hebben, om den HEEre te vertoornen.

* 4.Reg. 17.a.5

16

Ende hy sal Israel ouer gheuen om der sonden wille van Ierobeam, die daer ghesondicht heeft, ende heeft Israel oock doen sondighen.

17

⁺ Ende dat wijf van Ierobeam stont op, ghinck henen, ende quam tot Thirza. Ende doen sy opten dorpel des huys quam sterf den Ionghen,

+ D vers 17

18

Ende sy begroeuen hem, ende alle Israel beclaechde hem^† na den woorde des HEEren, dat hy ghesproken had, door zijnen knecht Ahia, den Propheet.

† 2.Reg. 14.c.13

19

Wat van Ierobeam meer te segghen is, hoe hy gestreden ende geregeert heeft, siet, dat is gheschreuen inder Cronijcken der Coninghen Israels.

20

Ende den tijd dat Ierobeam regeerde is tweentwintich Iaer.^† Ende hy ontsliep met zijnen Vaderen. Ende zijn soon Nadab wert Coninck in zijn stede.

† 2.Par. 13.d.20

21

So^† was Rehabeam de sone Salomo Coninc in Iuda. Eenenueertich iaer was Rehabeam out, doen hy Coninc wert ende regheerde seuenthien Iaer te Ierusalem inde stadt die de HEEre vercoren had, wt allen stammen Israels, dat hy zijnen Naem aldaer soude stellen. Sijn Moeder hiet Naema, een Ammoniterse.

† 2.Par. 12.c.13.

22

Ende Iuda dede dat den HEEre qualijck behaechde, ende verwecte hem tot ijuer, meer dan allet dat haer Vaders gedaen hadden met haren sonden die sy deden.

23

Want sy timmerden hen oock Hoochten, Columnen ende Haghen, op alle hooghe berghen, ende onder alle groote boomen.

24

⁺ Daer waren ooc Hoereerders inden lande, ende sy deden alle de grouwelijckheyt der Heydenen, die de HEEre voor de kinderen Israels verdreuen hadde.

+ E vers 24

25

Maer inden vijfsten Iare des Conincx Rehabeam,^† trock Sisack de Coninck in Egipten op teghen Ierusalem,

† 2.Par. 12.a.2.

26

Ende nam de schatten wt den huyse des HEEren, ende wt den huyse des Conincx, ende al watter te nemen was^† ende nam

† 3.Re. 10.c.16 2.Par. 9.c.15.

[p. 135r]

alle gulden schilden, die Salomo had laten maken,

27

In welcke plaetse, liet de Coninc Rehabeam metalen schilden maken, ende beualse onder de handt der Ouersten Trauanten, die de duere bewaerden aenden huyse des Conincx.

28

Ende also dicwils als de Coninck in dat huys des HEEren ginc, droegense de Trauanten, ende brachtense weder in der Trauanten Camer.

29

Maer wat meer van Rehabeam te segghen is, ende al wat hy gedaen heeft, Siet, dat is geschreuen in de Cronijcke der Coningen Iuda.

30

Maer daer was oorloge tusschen Rehabeam ende Ierobeam haer leuen lanck.

31

Ende Rehabeam^† ontsliep met zijnen Vaderen, ende wert begrauen met zijnen Vaderen inde stadt Dauids. Ende zijn Moeder hiet Naema, een Ammonitersse. Ende zijn soon Abiam wert Coninc in zijn plaetse.

† 2.Par. 12.c.16