Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ Roboam en volcht niet den raet der ouden ende wijsen, maer der Iongen hy beswaert ende vertoornt dat volc dattet van hem af valt, ende hangt Ierobeam aen, die selue sticht een Afgoderie met de twee gulden Calueren.

1

⁺ ENde Rehabeam^† troc na Sichem. Want dat gheheel Israel was tot Sichem gecomen om hem Coninc te maken.

+ A vers 1

† 2.Par. 10.a.1.

2

Ende Ierobeam de sone Nebath hoorde dat, doen hy noch in Egipten was^† (daer hy voor den Coninc henen geuloden was) ende bleef in Egipten.

† 3.Re. 11.g.40.

3

Ende sy seynden henen ende lieten hem roepen. Ende Ierobeam met der geheelder ghemeynten Israels quamen, ende spraken met Rehabeam, ende seyden:

4

V Vader heeft ons Iock te hert ghemaect, so maect ghy nv den herden dienst ende dat sware Iock lichter dat hy ons

[p. 133v]

opgeleyt heeft, so willen. wy v onderdanich zijn.

5

Maer hy sprac tot hen: Gaet wech tot aenden derden dach, dan coemt weder tot my. Ende dat volc ghinc wech.

6

Ende de Coninck Rehabeam hielt eenen raet metten Ouders, die voor zijnen Vader Salomo stonden, doen hy leefde, ende sprack: Hoe raet ghy dat wy desen volcke een antwoort geuen:

7

Sy spraken tot hem: Doet ghy desen volcke heden eenen dienst, ende zijt ghy hen te wille, ende verhoortse, ende geeft hen goede woorden,⁺ So sullen sy v onderdanich zijn v leuen lanck.

+ B vers 7

8

Maer hy verliet der Ouders raet, dien sy hem gegeuen hadden, ende hielt eenen raet metten Ionghen die met hem opghewassen waren, ende voor hem stonden.

9

Ende hy sprack tot hen, wat raet ghy dat wy desen volcke antwoorden, die tot my gheseyt hebben, maect dat iock lichter dat v Vader op ons gheleyt heeft:

10

Ende de Ionghe die met hem opgewassen waren, seyden tot hem: Ghy sult totten volcke (dat tot v seyt: V Vader heeft ons Iock te swaer ghemaect, maect ghijt ons lichter) alsoo segghen: Mijnen cleynsten vingher sal dicker zijn dan mijns Vaders lendenen.

11

Nv mijn Vader heeft op v een swaer Iock gheladen, maer ick wils noch meer ouer v maken. Mijn Vader heeft v met Roeden ghecastijt: Maer ick wil v met Schorpioenen castijen.

12

Also quam Ierobeam met den geheelen volcke tot Rehabeam opten derden dach, so de Coninc geseyt had, ende gesproken: Coemt weder tot my opten derden dach.

13

Ende de Coninck gaf den volcke^† een herde antwoorde, ende verliet den raet die hem de Ouders gegeuen hadden,

† Prou. 15.a.1.

14

Ende sprac met den raet der Iongen, segghende:^† Mijn vader heeft v Iock swaer ghemaect, maer ic wils noch meer ouer v maken. Mijn Vader heeft v met Roeden ghecastijt, maer ick wil v met Schorpioenen castijen.

† Esai. 14.e.29.

15

Aldus en hoorde de Coninck den volcke niet. Want het was also ghekeert vanden HEEre,^* op dat hy zijn woort crachtich maken soude, dat hy door Ahia van Silo ghesproken had, tot Ierobeam den sone Nebath.

* 3.Reg. 11.e.31.

16

⁺ Maer doen dat geheel Israel sach, datse de Coninck niet hooren en wilde, gaf dat volc den Coninck een antwoorde ende sprack:^† Wat hebben wy dan voor een deel aen Dauid, oft erffenisse aen den soon Isai? Israel maket v nae uwer Hutten. So siet ghy nv tot uwen huyse Dauid. Also ghinc Israel in zijn Hutten,

+ C vers 16

† 2.Reg. 20.a.1.

17

Alsoo dat Rehabeam maer ouer de kinderen Israels en regeerde die in de steden Iuda woonden.

18

Ende doen de Coninck Rehabeam^† Adoram den Rentmeester henen seynde, wierp hem alle Israel met steenen ter doot. Maer de Coninck Rehabeam clam haestelijc op eenen waghen dat hy nae Ierusalem soude vluchten.

† 3.Reg. 4.a.6 2.Re. 20.d.24.

19

Alsoo viel Israel vanden huyse Dauids, tot desen dach toe.

20

Doen nv dat gheheel Israel hoorde, dat Ierobeam weder was comen, seynden sy henen ende deden hem roepen totter geheelder gemeynten,^† ende maeckten hem tot eenen Coninck ouer dat geheel Israel. Ende niemant en volchde den huyse Dauids, dan den stam Iuda alleen.

† 3.Reg. 16.b.9

21

^† Ende doen Rehabeam te Ierusalem quam, vergaderde hy dat gheheel huys Iuda, ende den stamme BenIamin, hondert ende tachtentich duysent Ionge strijtbare wtghelesen mannen, om teghen dat huys Israels te strijden, ende om dat Coninckrijck weder aen Rehabeam den sone Salomo te brengen.

† 2.Par. 11.a.1.

22

⁺ Maer het woort Gods quam tot Semaia den man Gods, ende sprac:

+ D vers 22

23

Segt Rehabeam den sone Salomo den Coninck Iuda, ende totten geheelen huyse Iuda, ende BenIamin, ende den anderen volcke ende spreect:

24

Soo seyt de HEEre: Ghy en sult niet optrecken ende strijden teghen uwe broeders de kinderen Israels. Een yeghelijc gae weder thuys, want sulcx is van my geschiet. Ende sy hoorden dwoort des HEEren, ende keerden wederom, dat sy wech souden gaen, so de HEEre gheseyt hadde.

25

Maer Ierobeam timmerde^† Sichem op dat gheberchte Ephraim, ende woonde daer in, ende trock van daer wt,^* ende timmerde Pnuel.

† Iudic. 9.g.45

* Iudi. 8.d.17.

26

Maer Ierobeam dachte in zijn herte: Dat Conincrijc sal nv weder totten huyse Dauids vallen,

27

Ist dat dit volck op gaet om offerhande te doen inden huyse des HEEren te Ierusalem. Ende dat herte des volckx sal hem keeren tot haren Heere Rehabeam den Coninc Iuda, ende sal my dooden, ende weder tot Rehabeam den Coninck Iuda vallen.

28

Ende de Coninck hielt eenen raet,^† ende maeckte twee gulden Calueren, ende sprac tot hen: Het is v te vele op te gaen na Ierusalem,^* Siet, daer zijn uwe Goden Israels, die v wt Egypten landt gheleyt hebben.

† Tob. 1.a.6. Exo. 20.a.3. 2.Pa. 13.b.8.

* Exo. 32.b.4.

29

Ende hy sette dat een te BethEl, ende dat ander te Dan.

30

Ende dat wert tot sonde. Want dat volck ghinck henen voor het een tot Dan toe.

31

Hy maecte oock een huys der Hoochten,^† ende maeckte Priesters vanden alder snootsten des volcx, die vanden kinderen Leui niet en waren.

† Num. 3.a.3. 4.Re. 17.g.32.

32

Ende hi maecte een Feeste opten vijfthiensten dach der achster maent, ghelijck dat feest in Iuda, ende offerde opten Altaer. Soo dede hy tot BethEl, datmen den Calueren offerde, die hy ghemaect had. Ende stelde te BethEl de Priesters der hoochten, die hy ghemaect hadde,

33

Ende offerde opten Altaer (die hy gemaect had) te BethEl, opten vijfthiensten dach der achster maent, welcke hy wt zijn herte versiert hadde. Ende maeckte den kinderen Israels feeste, ende offerden opten Altaer, op datmen roocken soude.