Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ De HEEre openbaert Salomo den Coninck, ende belooft hem veel groote dinghen, Salomo gheeft Hiram den Coninck twintich steden.

1

⁺ ENde^† doen Salomo had voltimmert des HEEren huys, ende des Conincx huys, ende al wat hy begeerde ende lust hadde te maken,

+ A vers 1

† 2.Par. 7.c.11.

2

Openbaerde hem de HEEre anderwerf,^* soo hy hem gheopenbaert hadde te Gibeon.

* 3.Reg. 3.a.5.

3

Ende de HEEre sprack tot hem: Ick heb v ghebet ende smeecken gehoort, dat ghy voor my ghesmeeckt hebt, ende heb dit huys gheheylicht dat ghy ghetimmert hebt, op dat ick mijnen Naem eewelijck daer soude setten, ende mijn ooghen ende mijn hert soude daer altoos zijn.

4

Ende ghy, ist dat ghy voor my wandelt, so v vader Dauid ghewandelt heeft, met oprechter herten ende oprechtelijc, dat ghi doet al dat ick v gheboden heb, ende mijn gheboden, ende mijne rechten hout,

5

So wil ick beuestigen den stoel ws Conincrijcx ouer Israel eewelijck, soo ick uwen vader Dauid ghesproken heb, ende gheseyt:^† Het en sal v niet ghebreken aen eenen man op den stoel Israels.

† 2.Reg. 7.c.12.

6

⁺ Maer ist dat ghy v van my afkeert, ghy ende uwe kinderen, ende niet en hout mijne gheboden ende rechten, die ick v voor gheleyt hebbe, ende henen gaet ende andere goden dient, ende die aenbedet,

+ B vers 6

7

Soo sal ick Israel wtroeyen vanden lande dat ick hen ghegheuen hebbe.^† Ende dat huys dat ick mijnen Naem gheheylicht hebbe, wil ick verlaten van mijnen aensicht.^* Ende Israel sal een spreecwoort ende een fabel zijn onder alle volcken.

† 4.Re. 25.b.9. Iere. 7.a.3.

* Psal. 79.a.4.

8

Ende dat huys sal af ghebroken worden, dat alle die daer voorby gaen sullen, die sullen hen ontsetten ende blasen, ende segghen:^† Waerom heeft de HEEre desen lande ende desen huyse also ghedaen?

† Deu. 29.d.24 Iere. 22.b.8.

[p. 132r]

9

Soo salmen antwoorden: Om dat sy den HEEre haren God verlaten hebben, die hare vaders wt den lande Egypti leyde, ende hebben aengenomen ander goden, ende die aenghebeden, ende hen gedient. Daerom, heeft de HEEre al dit quaet ouer hen ghebracht.

10

^+† Als nv twintich iaren om waren, in welcken Salomo de twee huysen timmerde, des HEEren huys, ende des Conincx huys,

+ C vers 10

† 2.Par. 8.a.1.

11

^* Daer toe Hiram de Coninck tot Tyro, Salomo Cederboomen ende dennen boomen, ende gout nae alle zijn begeerte brachte. Doen gaf de Coninc Salomo Hiram twintich steden inden lande Galilea.

* 2.Reg. 5.b.11.

12

Ende Hiram troc wt van Tyro om de steden te besien die hem Salomo ghegeuen hadde. En si en behaechden hem niet,

13

Ende sprac: Wat steden zijn dat mijn broeder, die ghy my gegeuen hebt? Ende hietse dat Lant Cabul tot op desen dach.

14

Ende Hiram hadde den Coninck gesonden hondert ende twintich Centener gouts.

15

Ende dat is de summa der cijnsen, die de Coninck Salomo opnam, om des HEEren huys te timmeren, ende zijn huys, ende Millo, ende de mueren Ierusalem, ende Hazor, ende Megiddo, ende Gazer.

16

⁺ Want Pharao de Coninc in Egipten was op ghecomen, ende had Gazer ghewonnen, ende met vier verbrant, ende de Cananiten gedoot die in de stadt woonden, ende hadse zijn dochter Salomons huysvrou tot eender ghiften ghegeuen.

+ D vers 16

17

Alsoo timmerde Salomo Gazer, ende dat neder Bethoren,

18

Ende Baelath, ende Thamar inder woestijnen inden Lande,

19

Ende alle steden der coren huysen die Salomo hadde, ende alle die steden der wagens, ende die steden der ruyteren, ende waer hy lust toe hadde om te timmeren te Ierusalem in Libanon, ende inden gheheelen lande zijnder heerschappijen.

20

Ende allet ouerghebleuen volck vanden Amoriten, Hethiten, Pheresiten, Heuiten ende Iebusiten, die vanden kinderen Israels niet en waren,

21

Dier seluer kinderen, die si na hen ouer lieten blijuen inden Lande die de kinderen Israels niet en conden verbannen, die maecte Salomo chijnsbaer tot op desen dach.

22

Maer^† vanden kinderen Israels en maeckte hy gheen knechten, maer lietse crijschlieden, ende zijn knechten, ende Vorsten, ende Ridderen, ende ouer sine waghens ende Ruyters zijn.

† Leuit. 25.f.45 1.Reg. 8.b.11.

23

⁺ Ende der Officiers die ouer Salomons wercken waren, dier was vijf hondert ende vijftich, die ouer dat volck heerschapten, ende de wercken wt rechten.

+ E vers 23

24

Ende de dochter Pharao trock opwaerts, vander stadt Dauid,^† in haer huys, dat hy voor haer getimmert hadde.^* Doen timmerde hi ooc Millo.

† 3.Reg. 7.b.8.

* 2.Reg. 5.b.9.

25

Ende Salomo offerde tsiaers driemael Brantoffer ende Dancoffer opten Altaer,^† die hy den HEEre getimmert hadde, ende roocte daer ouer voor den HEEre. Ende dat huys werdt alsoo volmaect.

† 2.Par. 4.a.1.

26

^† Ende Salomo maecte ooc schepen tot Ezeon Geber, die by Eloth leyt, aenden oeuer der rooder zee inden lande der Edomiten.

† 3.Re. 22.g.49 2.Par. 8.d.17.

27

Ende Hiram sant zijn knechten henen int schip, die hen op schepen verstonden, ende op de zee beproeft waren, metten knechten Salomo,

28

Ende quamen tot^† Ophir, ende haelden aldaer vier hondert ende twintich Centener gouts, ende brachtent den Coninck Salomo.

† Iere. 10.b.9.