Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Salomon timmerde ooc een huys voor hem seluen, vande houten wt den Wout Libano.

1

⁺ MAer aen zijn huys timmerde Salomo derthien iaer, dat hijt geheelijck voltimmerde,

+ A vers 1

2

Te weten, hy timmerde een huys vanden Wout Libanon, hondert ellen lanc, vijftich ellen wijt, ende dertich ellen hooch.

3

Op die selue viercante timmeragie, leyde hy den solder van Cederen berderen, op Cederen Columnen nae der rijen henen. Ende bouen daer op een decsel van Cederen op des seluen Columnen, der welcker waren vijfenveertich, is vijfthien in eender rijen.

4

Ende daer waren vensters in de drie rijen, teghen malcanderen ouer, drie teghen drie, ende waren in haren posten viercant.

5

Hy maeckte oock een^* poortael met Columnen, vijftich ellen lanck, ende dertich ellen breet. Ende noch een portael voor dien met Columnen ende dicke balcken.

* Voorhuys.

6

Ende hy timmerde oock een portael tot eenen Richtstoel, daermen ghericht in hielt, ende beschoot beyde de solders met Cederen.

7

Daer toe zijn huys, daer hy in woonde, inden achterhof, achter aent portael, ghemaect ghelijck die andere.

8

⁺ Ende maecte oock een huys, ghelijck als dat portael der dochter Pharao,^* die Salomo tot eender huysvrouwen ghenomen hadde.

+ B vers 8

* 3.Reg. 3.a.1.

9

Sulcke alle waren costelijcke steenen na den winckelhaeck gehouwen, met saghen gesneden op alle siden, vanden gront op, tot aen dat dack toe. Daer toe ooc buyten totten grooten Hof toe.

10

De fundamenten waren ooc costelijcke ende groote steenen, thien ende acht ellen groot,

11

Ende daer op costelijcke gehouwen steenen na den winckelhaeck ende Cederen.

12

Maer den grooten hof alomme, hadde drie rijen van ghehouwen steenen, ende een rije van Cederen berderen. Also oock den binnensten hof aent huys des HEEren, ende dat portael aenden huyse.

13

Ende de Coninck Salomo sandt henen,^† ende liet halen Hiram van Tyro,

† 2.Par. 2.c.13.

14

Eender weduwen soon, wt den stamme Naphthali, ende zijn vader was een man van Tyro gheweest.^+* Die was een meester in metael, vol wijsheyt, verstant ende consten, om te arbeyden alderhande metael werck. Doen hy totten Coninck Salomo quam, maecte hy alle zijn werc.

+ C vers 14

* Exod. 31.a.4.

15

^† Ende maecte twee metalen Columnen,^* elc achthien ellen hooch, ende eenen draet van twaelf ellen was de mate, om elcke Columne.

† 1.Par. 19.b.8.

* 4.Reg. 25.b.17.

16

Ende maecte twee knoopen van metael ghegoten, om bouen op de Columnen te setten, ende elcken knoop was vijf ellen hooch.

17

Ende aen elcken knoope bouen op de Columne, waren seuen gheulochten reepkens als ketenen.

18

Ende hy maecte aen elcken knoop twee rijen granaet appelen rontom, aen een reepken daer mede den knoop bedect wert.

19

Ende de knoopen waren als die roosen voor dat portael, vier ellen groot.

20

Ende der granaet appelen inder rijen rontom, waren twee hondert, bouen ende onder aenden reep, die om den buyc des knoops ghinck, aen elcken knoop op beyde Columnen.

21

Ende hy rechte de Columnen op voor dat portael des tempels. Ende die hy ter rechter hant sette, hiet hy Iachin, ende die hy ter slincker hant sette, hiet hy Boas.

22

⁺ Ende het stont alsoo bouen op de Columnen als roosen. Alsoo wert volbracht dat werck der Columnen.

+ D vers 22

23

Ende hy maeckte een^† ghegoten zee, thien ellen wijt, vanden eenen randt totten anderen rontom, ende vijf ellen hooch. Ende een snoer dertich ellen lanck was de mate rontom.

† 2.Par. 4.a.2.

24

Ende om de selue zee die thien ellen wijt was, ghinghen knoopen aen haren randt, rontomme de zee henen. Maer der knoopen waren twee rijen gegoten.

25

Ende si stont op twaelf Runderen, der welcker drie Noortwaerts ghekeert waren, drie Westwaerts, drie Suytwaerts, ende drie Oostwaerts, ende de zee bouen daer op, alsoo dat alle haer achterste deel binnenwaerts ghekeert was.

26

Haer dicte was een hant breet, ende haren randt was als eens bekers randt, als een opghegaen roose. Ende daer ghinck twee duysent Bath in.

27

Hy maecte ooc thien metalen gestoelten, elck vier ellen lanck ende breet, ende drie ellen hooch.

28

Maer dat ghestoelte was alsoo ghemaect, dat het siden hadde tusschen den lijsten.

29

Ende aen de siden tusscen de lijsten, waren Leeuwen, Runderen ende Cherubim. Ende de zijden daer de Leeuwen ende Ossen aen waren, hadden lijsten bouen ende onder, ende voeten daer aen.

30

Ende elck ghestoelte hadde vier metalen raders, met metalen stellen. Ende opten vier hoecken waren voeten ghegoten, elck teghen den anderen ouer onder aen den ketel ghelenet.

31

⁺ Maer den hals midden opt gestoelte, was een elle hooch ende ront, anderhalf elle wijt, ende daer waren puckelkens aen den halse, inde velden die viercant waren ende niet ront.

+ E vers 31

32

De vier raders stonden onder aen de siden, ende de assen der raderen waren aent ghestoelte. Elck rat was anderhalf elle hooch.

33

Ende het waren raders als waghen raders, ende haer assen, nauen, speeken ende velghen waren altemael ghegoten.

34

Ende de vier voeten op de vier hoecken elcx gestoelts, waren oock aent ghestoelte.

[p. 130v]

35

Ende aenden hals bouen opt gestoelte, een half elle hooch, rontsom, waren lijsten ende zijden aent ghestoelte.

36

Ende hy liet op de vlacke der selfder siden ende lijsten Cherubim, Leeuwen ende Palmboomen grauen, elck aenden anderen rontom daer aen.

37

Op die maniere maeckte hy thien ghegoten ghestoelten. Eenderley mate ende ruymte was aen allen.

38

^+† Ende hy maecte thien metalen ketelen, also dat veertich Bath in eenen ketel ghinck, ende was vier ellen groot, ende op elck ghestoelte was eenen ketel.

+ F vers 38

† 2.Par. 4.a.6.

39

Ende hy settede vijf ghestoelten aenden rechter hoeck des huys, ende de ander vijf aenden slincken hoeck. Maer die zee settede hy ter rechter handt voor aen tegent Suyden.

40

Ende Hiram maecte oock potten, schupkens ende beckens, ende volbracht alsoo alle wercken, die de Coninc Salomo aen den huyse des HEEren maken dede,

41

Te weten, de twee Columnen, ende de ronde knoopen bouen op de twee Columnen, ende daerom twee geulochten reepkens, om te bedecken die twee ronde knoopen opten columnen.

42

Ende de vier hondert granaet appelen aen de twee gheulochten reepkens, te weten, twee rijen granaet appelen aen een reepken, te bedecken die twee ronde knoopen opten Columnen.

43

Daer toe de thien gestoelten, ende thien ketelen bouen daer op,

44

Ende de zee, ende twaelf Runderen onder de zee.

45

Ende de potten, schupkens ende beckens. Ende alle dese vaten die Hiram den Coninck Salomo maecte, tot den huyse des HEEren, waren van Louteren metael.

46

⁺ In die contreye aen de Iordane lietse de Coninck ghieten, in dicke leemachtige Aerde, tusschen Sucoth ende Sarthan.

+ G vers 46

47

Ende Salomo liet alle vaten onghewegen, om de seer groote Menichte des metaels.

48

Ooc maecte Salomo alle de ghereetschap die totten huyse des HEEren behoorde,^† te weten, eenen gulden Altaer, een gulden Tafel daer de thoonbrooden op laghen,

† Exo. 25.c.23.d.31. 27.a.1.

49

Vijf Candelaren ter rechter hant, ende vijf Canderlaers ter slincker, voor den Choor van louteren goude, met gulden bloemen, Lampen ende snutters.

50

Daer toe schalen, schotelen, beckens, lepelen ende pannen van louteren goude. Ooc waren de herren aender dueren aenden huyse binnen int Alderheylichste, ende aen de dueren des huys vanden tempel, gulden.

51

Alsoo wert voleynt allet werc, dat de Coninck Salomo maecte aenden huyse des HEEren. Ende Salomo brachte daer in^* al wat zijn Vader Dauid gheheylicht hadde, van siluer ende gout, ende vaten, ende leydet inden schat des huys des HEEren.

* 2.Par. 5.a.1.