Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Hier wort den tijt bescreuen, wanneer dat Salomo begost heeft den tempel te timmeren, ende oock wanneer hy volbracht wert.

1

⁺ INden^* vierhondersten ende tachtichsten Iare, nae den wtganck der kinderen van Israel wt Egipten lant, inden vierden iare des Conincrijcks Salomo ouer Israel, inder maent Sif, dat is de ander maent, wert dat huys den HEEre ghetimmert.

+ A vers 1

* 2.Par. 3.a.1. Act. 7.f.47.

2

Dat huys dat de Coninck Salomo den HEEre timmerde, was tsestich ellen lanck, twintich ellen breedt, ende dertich ellen hooch.

3

^† Ende hy timmerde een^* poortael voor den tempel, twintich ellen lanck, nae der breyden des huys, ende thien ellen breedt voor dat huys henen.

† Ioan. 10.c.23. Act. 3.b.11. 5.b.12.

* Voorhuys.

4

Ende hy maecte vensteren aen dat huys, inwendich wijdt, wtwendich enghe.

5

Ende hy timmerde eenen omganck aen de wandt des huys rontom, dat hy, beyde om den Tempel ende Choor ghinck, ende maecte sine buytenste wandt daerom.

6

Den ondersten ganck was vijf ellen wijdt, ende den middelsten ses ellen wijdt, ende den derden seuen ellen wijdt. Want hy leyde balcken van buyten aent huys rontsom, dat si hem niet en hielden aen de wandt des huys.

7

⁺ Ende doen dat huys ghetimmert wert, waren de steenen te voren geheel bereyt, alsoo datmen gheenen hamer, noch bijl, noch eenich ijseren instrument int timmeren en hoorde.

+ B vers 7

8

Maer een duere was ter rechter siden midden aent huys, alsoo datmen door eenen windelsteen op ghinck op den middelsten ganc, ende vanden middelsten ganc opten derden.

9

Aldus timmerde hi dat huys, ende voleynde dat. Ende hy beschoot dat huys met Cederen, beyde bouen ende aende wanden.

10

Hy timmerde ooc eenen ganck bouen op dat gheheele huys rontsom, vijf ellen hooghe. Ende deckte dat huys met Cederen hout.

11

Ende des HEEren woort quam tot Salomo, ende sprac:

12

Dat sy dat huys, dat ghy timmert, Ist dat ghi in mijne geboden wandelt, ende nae mijne rechten doet, ende alle mijn gheboden houdt, om daer in te wandelen, so wil ic mijn woort met v beuestigen,^† ghelijck ic uwen vader Dauid ghesproken heb,

† 2.Reg. 7.c.12.

13

Ende wil onder de kinderen Israels woonen, ende en wil mijn volck Israel niet verlaten.

14

⁺ Also timmerde Salomo dat huys, ende voleyndet:

+ C vers 14

15

Ende timmerde de wanden des huys van binnen aen de siden van Cederen, van des huys vloer aen, tot den daecke toe. Ende beschoot van binnen met houte, ende solderde den vloer des huys met dennen berderen.

16

Ende hy timmerde achter int huys eenen Cederen wandt, twintich ellen lanc, vanden vloer aen totten daecke toe, Ende timmerde daer binnen den Choor, ende dat Alderheylichste.

17

Maer dat huys des Tempels (voor den Choor) was veertich ellen lanck.

18

Van binnen was dat gheheele huys enckel Cederen met gedraeyde knoopen ende bloemwerck, alsoo datmen gheenen steen en sach.

19

Maer den Choor bereyde hy van binnen int huys, datmen de Arcke des verbondts des HEEren aldaer soude setten.

20

Ende voor den Choor, die twintich ellen lanc, twinnich ellen wijt, ende twintich ellen hooch was, ende ouertrocken met louteren Goude, beschoot hy den Altaer met Cederen.

21

⁺ Ende Salomo ouertrock dat huys van binnen met louteren goude, ende trock gulden grendelen voor den Choor, die hi met goude ouertrocken hadde,

+ D vers 21

22

Alsoo dat dat geheele huys heel met goude ouertrocken was. Daer toe den geheelen Altaer voor den Choor ouertrock hy oock met goude.

23

Hy maeckte oock inden Choor twee^† Cherubim thien ellen hooch, van Olijfboomen hout,

† Exod. 25.b.18.

24

Vijf ellen hadde eenen vlueghel, eens yeghelijcx Cherubs, alsoo dat thien ellen waren vanden eynde zijns eens vlueghels, totten eynde zijns anderen vlueghels.

25

Alsoo hadde die ander Cherub oock thien ellen, ende daer was eenderley mate, ende eenderley ruymte beyde der Cherubim,

26

Alsoo dat elck Cherub thien ellen hooch was.

27

Ende hy settede de Cherubim binnen in het huys. Ende die Cherubim breyden haer vlueghelen wt, dat des eens vluegel raecte aen desen wandt, ende des anderen Cherubs vlueghel aen den anderen wandt raecte.

28

Maer midden int huys raeckte den eenen vlueghel den anderen. Ende hy ouertrock die Cherubim met goude.

29

⁺ Ende aen allen wanden des huys, alom, liet hy ghesneden werck maken van wtghegroefden Cherubim, palmen ende bloemwerc inwendich ende wtwendich.

+ E vers 29

30

Oock ouertrock hy den vloer des huys met gulden platen inwendich ende wtwendich.

31

Ende inden inganck des Choors maeckte hy twee dueren van Olijfboomen houte, met vijfcantige posten,

32

Ende liet daer ghesneden werck op maken van Cherubim, palmen ende bloemwerck, ende ouertrockse met gulden platen.

33

Alsoo maecte hy oock inden inganck des Tempels viercante posten, van Olijfboomen houte,

34

Ende twee dueren van dennen houte, alsoo dat elcke duere twee vluegelen had, aen malcanderen hanghende in haer hangselen.

35

Ende maecte daer op ghesneden werck van Cherubim, palmen

[p. 130r]

ende bloemwerck, ende ouertrockse met goude, recht soot beuolen was.

36

Ende hy timmerde oock eenen Hof daer binnen van drie rijen ghehouwen steenen, ende van eender rijen gheschaefden Cederen.

37

In dat vierde iaer inder maent Sif, wert dat fundament gheleyt aenden huyse des HEEren.

38

Ende inden elfsten Iare inder maent Bul (dat is de achtste maent) werdt dat huys volmaect, soo het zijn soude. Alsoo dat si daer aen seuen iaer timmerden.