Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ De Coninc Hiram seynde den Coninck Salomo constelijcke wercklieden, om den tempel te timmeren te Ierusalem.

1

⁺ ENde Hiram de Coninck te Tyro sant zijn knechten tot Salomo. Want hy hadde ghehoort, dat si hem tot eenen Coninck ghesalft hadden in zijns vaders stede.^† Want Hiram beminde Dauid zijn leuen lanc.

+ A vers 1

† 2.Reg. 5.b.11. 2.Par. 2.a.3.

2

Ende Salomo sant tot Hiram, ende dede hem segghen:

3

^* Ghy weet, dat mijn vader Dauid niet en mocht timmeren een huys den Name des HEEren zijns Godts, om des Oorloochs wille dat rontsom hem was, tot datse de HEEre onder sine voetsolen gaf.

* 1.Par. 23.b.7. 29.a.3.

4

Maer nv heeft my de HEERE mijn Godt, rontomme ruste ghegheuen, also datter gheen viant noch quade hindernisse meer en is.

5

Siet, dus heb ick ghedacht een huys te timmeren den Name des HEEREN mijns Godts, soo de HEEre tot mijnen vader Dauid gesproken heeft, ende geseyt:^† V soon, die ick in v stede setten sal op uwen stoel, die sal mijnen Naem een huys timmeren.

† 2.Reg. 7.c.12

6

Dus beuelet nv, datmen my Cederen wt Libanon houwe, ende dat uwe knechten met mijne knechten zijn. Ende dat Loon uwer knechten wil ick v gheuen, alle, so ghy segt. Want ghy weet, dat by ons niemant en is, die hout weet te houwen, gelijck de Sidoniers.

7

⁺ Maer doen Hiram de woorden Salomons hoorde, verblijde hy hem hoochlijck ende sprack: Ghelooft sy de HEEre heden, die Dauid eenen wijsen sone ghegheuen heeft ouer dit groote volc.

+ B vers 7

8

Ende Hiram seynde tot Salomo, ende dede hem seggen: Ick heb ghehoort al wat ghy tot my ghesonden hebt: Ic wilt doen na alle uwer begheerten, met Cederen ende met^* Vueren houte.

* Dennen.

9

Mijn knechten sullense van Libano af brengen aen de zee, ende wilse in vloten laten legghen op de zee, totter plaetsen toe, die ghy my te kennen geuen sult. Ende wilse aldaer laten behouwen, ende ghy sultet doen halen. Maer ghy sult mijn begheerte oock doen, ende mijnen ghesinne spijse gheuen.

10

Aldus gaf Hiram Salomo Cederen ende vueren hout na alle zijn begheeren.

11

Maer Salomo gaf Hiram twintich duysent Choren terwen te eten voor zijn ghesin, ende twintich Choren gestooten olijs. Sulcx gaf Salomo Hiram iaerlijcx.

12

^+* Ende de HEEre gaf Salomo wijsheyt, soo hy hem ghesproken hadde, ende het was vrede tusschen Hiram ende Salomo: Ende si maecten beyde een verbondt met malcanderen.

+ C vers 12

* 3.Reg. 4.c.29. Eccle. 1.c.16.

13

Ende Salomo vercoos een summe volcx wt den gheheelen Israel. Ende de summe was dertich duysent mannen,

14

Ende seyndese inden Libanon, ouer elcke twee maenden thien duysent. Alsoo dat si een Maent op Libanon waren, ende twee Maenden thuys.^† Ende Adoniram was ouer sulcken summe.

† 3.Reg. 4.a.6. 12.c.18.

15

Ende Salomo hadder tseuentich duysent die daer last droeghen, ende tachtentich

[p. 129v]

duysent die daer timmerden opten berch,

16

Sonder de ouerste officiers Salomons, die ouer dat werck gheset waren, te weten, drie duysent ende drie hondert, die welcke ouer dat volck regeerden dat daer aent werck arbeyde.

17

Ende de Coninc gheboot, dat si groote ende costelijcke steenen wt souden breken, te weten, ghehouwen steenen totten fundamente des huys.

18

Ende de timmerlieden Salomons, ende de timmerlieden Hiram, ende de Giblim hieuwen wt, ende bereydden houten ende steenen om dat huys te timmeren.