Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Dat rijck Salomons met sinen officiers wort bescreuen. Ende hoe wijs hy oock gheweest is.

1

⁺ ALsoo was Salomo Coninck ouer gheheel Israel.

+ A vers 1

2

Ende dit waren zijn Vorsten: AsarIa de sone Sadok des Priesters.

3

Elihoreph, ende AhiIa de sone Sisa waren Schrijuers: Iosaphat de sone Ahilud was Cancelier:

4

Benaia de sone Ioiada was velthooftman: Sadok ende AbIathar waren Priesters:

5

AsarIa de sone Nathan was ouer de Officiers: Sabud de sone Nathan des Priesters was des Conincks vrient:

6

Ahizar was Hoofmeester.^† Adoniram de sone Abda was Rentmeester.

† 3.Reg. 12.c.18.

7

Ende Salomo hadde twaelf Officiers ouer gheheel Israel, die den Coninc ende zijn huys besorchden. Een yeghelijc hadde tsiaers een maent lanck te besorghen.

8

Ende hieten alsoo: De sone Hur opt gheberchte Ephraim:

9

De sone Deker te Makaz ende te Saalbim ende te BethSames, ende te Elon, ende BethHanan:

10

De sone Hesed te Aruboth, ende hadde daer toe Socho, ende dat gheheele lant Hepher:

11

De sone AbiNadab, de gheheele heerschappije te Dor, ende had Thapat Salomons Dochter tot eenen wijue:

12

Baena de sone Ahilud, te Thaenach, ende te Megiddo, ende ouer geheel BethSean, het welcke neffens Sarthana leyt onder Iesreel van BethSean totten pleynen Mehola toe, tot ouer ghene

[p. 129r]

zijde Iakmeam.

13

⁺ De sone Geber te Ramoth in Gilead, ende hadde de placken Iair des soons Manasse in Gilead, ende hadde dat Lantschap Argob die in Basan leyt, tsestich groote steden bemuert, ende met metalen grendelen.

+ B vers 13

14

AhiNadab de sone Iddo, te Mahanaim:

15

Ahimaaz in Naphthali, ende hi nam Salomons dochter Basmath oock tot eenen wijue:

16

Baena de sone Husai in Asser ende te Aloth:

17

Iosaphat de sone Paruha, in Isaschar:

18

Simei de sone Ela in BenIamin:

19

Geber de sone Vri inden lande Gilead, int lant Sihon des Conincx der Amoriten, ende Og des Conincx in Basan, Een Amptman was inden seluen lande.

20

Maer^† Iuda ende Israel dier was vele, ghelijck dat sant aen de zee, ende aten ende droncken, ende waren vrolijck.

† Pro. 14.d.28.

21

^† Aldus was Salomo een Heer ouer allet Conincrijck, vanden water aen inder Philisteen lant, tot aen de Frontieren Egipti, die hem ghiften brachten, ende dienden hem zijn leefdaghe.

† Gene. 15.d.18. Exod. 23.d.31. Psal. 72.b.8.

22

Ende Salomo moeste daghelijcx ter spijsinghe hebben, dertich Chor Semelmeels, ende tsestich Chor ander meels,

23

Thien gemeste Runders, ende twintich weyde Runders, ende hondert schapen. Wtghenomen Herten ende Rheen, ende^† Gemsen ende gemest Vee.

† Steenbocken.

24

Want hy heerschapte int gheheele lant aen dese zijde des waters, van Tiphsach aen tot Gasa toe, ouer alle Coninghen ouer dese zijde des waters.^† Ende had vrede van alle zijn onderdanighen rontom.

† Leuit. 26.a.3. 1.Ma. 14.b.11

25

Also dat Iuda ende Israel seker woonden, elc onder sinen wijnstock, ende onder sinen vijgheboom, van Dan aen tot BerSeba toe, soo langhe als Salomo leefde.

26

^+* Ende Salomo hadde veertich duysent waghen peerden, ende twaelf duysent rijpeerden.

+ C vers 26

* Deut. 17.d.21. 3.Reg. 10.e.26 2.Par. 9.e.25.

27

Ende de Officiers besorchden den Coninck Salomo, ende alle wat totter Tafelen des Conincx behoorde, een yeghelijck in zijnder maent, ende en lieten niet faelgeren.

28

Ooc gerste ende stroo voor de Rossen, ende Loopers brachten si totter plaetsen daer hy was, elc na sinen beuele.

29

Ende Godt gaf Salomo seer groote^† wijsheyt ende verstant, ende een ghetroost herte, alst sant dat aenden Oeuer der zee leyt:

† Eccle. 1.c.16. Eccle. 1.a.1.

30

Also dat de wijsheyt Salomo grooter was dan alder kinderen teghent Oosten, ende dan alder Egiptenaers wijsheyt.

31

Ende was wijser dan alle menschen, ooc wijser dan de dichters Ethan, de Esrahiten, Heman, Chalchal ende Darda. Ende was vermaert onder allen Heydenen rontom.

32

Ende hy sprac drie duysent^† byspraken, ende zijnder^* liedekens waren duysent ende vijf.

† Prouerbia.

* Cantica.

33

Ende hy sprack van boomen, vanden Cederboom aen tot Libanon tot aen der Isope, die wter wandt wast. Ooc sprac hy van Vee, van voghelen, van ghewormte ende van Visschen,

34

Ende wt alle Volcken quamender om te hooren de wijsheyt Salomons, van alle Coningen op Aerden, die van zijnder wijsheyt ghehoort hadden.