Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Als Dauid steruen soude, soo vermaent hy Salomo, dat hy soude inden wech des HEEren wandelen. Ende als Adonias begheerde Abisag van Sunem tot eenen wijue, soo liet hem Salomo dooden. AbIathar wordt van dat Priesterdom gestooten, Ioab ende Simei worden ghedoot.

1

⁺ ALs nv den tijt aen quam, dat Dauid steruen soude, gheboot hy sinen soon Salomo, ende sprack:

+ A vers 1

2

^† Ick gae henen den wech der gantscher werelt,^* Soo zijt ghetroost, ende weest een man,

† Iosue. 23.c.14 Deut. 31.b.7.

* 1.Pa. 23.c.13

3

Ende neemt der bewaringe des HEEren ws Gods waer, dat ghy in sine wegen wandelt, ende hout sine seden, gheboden, rechten ende ghetuychenisse,^† soo gheschreuen staet inde Wet Mose. Op dat ghy cloeck zijt in allen dat ghy doet, ende waer ghy v henen keert,

† Deut. 17.d.23.

4

Op dat v de HEEre zijn woort verwecke, dat hy ouer my ghesproken heeft, ende gheseyt: Bewaren uwe kinderen haer weghen, also dat si voor my ghetrouwelijc, ende van geheelder herten, ende van gantscher sielen wandelen, soo en sal van v nemmermeer ghebreken een man opten stoel Israels.

5

Oock weet ghy wel, wat my gedaen heeft Ioab, de sone SeruIa: Wat hy den twee velthooftmannen Israëls dede^† Abner den sone Ner, ende Amasa den sone Iether, die hy gedoot heeft, ende storte oorloochs bloet in vrede, ende dede oorloochs bloet in sinen gordel dat om sine lendenen was, ende aen sine schoenen, die aen zijn voeten waren.

† 2.Reg. 3.e.27. 20.b.10.

6

Doet na uwer wijsheyt, dat ghy zijn grijs hayr niet met vrede onder inde Helle en brengt.

7

⁺ Ooc sult ghy den kinderen^† Barsillai des Giliaditen ontfermherticheyt bewijsen dat si aen v tafel eten. Want also deden si by my, doen ic voor Absalon uwen broeder vluchte.

+ B vers 7

† 2.Re. 17.e.27. 19.e.32.

8

Ende siet, ghy hebt by v^† Simei, den sone Gera, des soons Iemini van Bahurim, die my schandelijck vloecte, inder tijt, doen ick na Mahanaim ginc.^† Maer hy quam af my te ghemoet aen de Iordane. Doen swoer ic hem byden HEEre, ende sprack: Ick en wil v niet dooden metten sweerde.

† 2.Reg. 16.b.5.

† 2.Re. 19.d.16.

9

Maer en laet ghy hem niet ontschuldich zijn. Want ghy zijt een wijs man, ende sult wel weten, wat ghy hem doen sult, dat ghy zijn grijs hayr met bloet hier onder in de Helle brengt.

10

^† Aldus ontsliep Dauid met sinen Vaderen, ende werdt begrauen inder stadt Dauids.

† Act. 2.d.29. 13.d.36.

11

Maer den tijt die Dauid Coninck gheweest is ouer Israel, is veertich iaer.^* Seuen iaer was hy Coninck tot Hebron, ende driendertich iaer tot Ierusalem.

* 2.Reg. 5.a.5.

12

Ende^† Salomo sadt opten stoel zijns vaders Dauids, ende zijn Conincrijck wert seer stantuastich.

† 2.Par. 30.c.23

13

Maer Adonia de sone Hagith, quam in tot BathSeba, de Moeder Salomo. Ende si sprack:^† Coemt ghy ooc met vreden? Hy sprac: Ia, ende seyde:

† 1.Re. 16.a.4.

14

Ic hebbe wat met v te spreken. Sy seyde: Segt op. Hy sprack:

15

⁺ Ghy weet, dat dat Conincrijck mijn was, ende gheheel Israel hadde hem op my gherecht, dat ick Coninck soude zijn. Maer nv is dat Conincrijck ghekeert, ende mijns broeders gheworden. Vanden HEEre ist hem gheworden.

+ C vers 15

16

Nv bid ick een bede van v, dat ghy my mijn aensicht niet en wilt beschamen. Sy sprac tot hem: Segt op.

17

Hy sprac: Spreect metten Coninck Salomo, want hy en sal v aensicht niet beschamen, dat hy my gheue^† Abisag van Sunem tot eenen wijue.

† 3.Reg. 1.a.3.

18

BathSeba sprack: Wel, ick wil metten Coninck van uwen tweghen spreken.

19

Ende BathSeba quam in totten Coninck Salomo, om met hem te spreken, van Adonia aengaende. Ende de Coninck stont op, ende ghinck haer te ghemoet, ende aenbedese, ende sette hem op sinen stoel. Ende des Conincx moeder werdt eenen stoel gheset, dat si tot zijnder rechter zijde soude sitten.

20

Ende si sprack: Ic bid een cleyn bede van v, en wilt mijn aensicht niet beschamen. De Coninck sprack tot haer: Bidt, mijne moeder, Ick en wil v aensicht niet beschamen.

21

Sy sprack: Laet Abisag van Sunem uwen broeder Adonia tot eenen wijue gheuen.

22

⁺ Doen antwoorde de Coninck Salomo, ende sprack tot zijn Moeder: Waerom bidt ghy om Abisag van Sunem den Adonia? Bidt hem dat Conincrijck oock, want hy is mijn grootste broeder,^† ende heeft den Priester AbIathar, ende Ioab den soon SeruIa.

+ D vers 22

† 3.Reg. 1.a.7.

23

Ende de Coninck Salomo swoer by den HEEre ende sprac: Godt doe my dit

[p. 128r]

ende dat, Adonia sal dat teghen zijn leuen ghesproken hebben.

24

Ende nv also warachtelijc als de HEEre leeft die my beuesticht heeft, ende heeft laten sitten opten stoel mijns vaders Dauids, ende die my een huys ghemaect heeft,^† so hy ghesproken heeft, heden sal Adonia steruen.

† 2.Reg. 7.e.12.

25

Ende de Coninck Salomo seynde henen door Benaia, den soon Ioiada, die sloech hem, dat hy sterf.

26

Ende de Coninck sprack totten Priester AbIathar: Gaet henen na Anatoth, op uwen Acker, want ghy zijt des doots: Maer ic en wil v heden niet dooden. Want ghy hebt de Arcke des HEEren voor mijnen Vader Dauid ghedraghen, ende hebt mede geleden, waer mijn vader gheleden heeft.

27

So verstiet Salomo dien AbIathar, dat hy niet meer Priester des HEEren en mocht zijn,^* op dat des HEEren woort veruult soude worden, dat hy ouer dat huys Eli gesproken hadde, tot Silo.

* 1.Reg. 2.f.31.

28

⁺ Ende dit gheruchte quam voor Ioab. Want Ioab had aen Adonia gehangen, hoe wel niet aen Absalon.^† Doen vluchte Ioab inde Hutte des HEEren, ende vaette de hoornen des Altaers.

+ E vers 28

† 3.Reg. 1.g.50.

29

Ende het wert den Coninck Salomo ghebootscapt, dat Ioab totter Hutten des HEEren gheulucht waer, ende siet, hy staet by den Altaer. Doen seynde Salomo Benaia, den soon Ioiada, ende sprack:^† Gaet henen ende slaet hem.

† Exo. 21.b.14.

30

Ende doen Benaia totter Hutten des HEEren quam, sprack hy tot hem: Dus seyt de Coninck: Gaeter wt. Hy sprack: Neen, Ic wil hier steruen. Ende Benaia seyde dat den Coninck weder, ende sprack: Also heeft Ioab ghesproken, ende alsoo heeft hy my gheantwoort.

31

De Coninck sprack tot hem: Doet soo hy ghesproken heeft, ende slaet hem, ende begraeft hem op dat ghy dat bloet, dat Ioab te vergheefs gestort heeft, van my, ende van mijn Vaders huys doet.

32

Ende dat hem de HEEre betale zijn bloet op zijn hooft, dat hy twee mannen gheslaghen heeft, die rechtuaerdigher ende beter waren dan hy, ende heeftse metten sweerde ghedoot, dat mijn Vader Dauid daer af niet en wiste, te weten^* Abner den sone Ner, den velthooftman, ouer Israel,^† ende Amasia, den sone Iether, den velthooftman ouer Iuda,

* 2.Reg. 3.e.27.

† 2.Reg. 20.b.10

33

Dat haer bloet betaelt worde op dat hooft Ioab, ende zijns saets eewelijck. Maer dat Dauid, ende zijn saet, zijn huys ende sinen stoel, vrede hebbe, eewelijck vanden HEEre.

34

⁺ Ende Benaia de soon Ioiada, ghinck op ende sloech hem, ende doode hem, ende hy werdt begrauen in sinen huyse, inder woestijnen.

+ F vers 34

35

Ende de Coninck sette Benaia, den soon Ioiada, in zijn stede ouer dat Heyr.^† Ende Sadok den Priester, sette de Coninck in de stede AbIathar.

† Eze. 44.c.15. 1.Par. 29.e.22

36

Ende de Coninck sant henen, ende dede Simei roepen, ende sprack tot hem: Timmert v een huys te Ierusalem, ende woont aldaer. Ende en gaet van daer niet wt, noch herwaerts noch derwaerts:

37

In welcken daghe ghy wt gaet, ende ouer de beke Kidron gaet, soo weet, dat ghy den doot steruen moet, v bloet sy op v hooft.

38

Simei sprack totten Coninc: Dat is een goede meyninghe, soo mijn Heer de Coninck ghesproken heeft so sal v knecht doen.

39

Aldus woonde Simei te Ierusalem langen tijt. Mer het geuiel ouer drie iaren dat twee knechten den Simei ontliepen, tot Achis den soon Maecha, den Coninc tot Gath. Ende het werdt Simei ghebootschapt: Siet uwe knechten zijn te Gath.

40

Doen maecte hem Simei op, ende sadelde sinen Ezel, ende trock henen na Gath tot Achis, dat hy sine knechten soude soecken. Ende doen hy daer quam, bracht hy zijn knechten weder van Gath.

41

⁺ Ende het wert Salomo gebootscapt, dat Simei wech ghetrocken ware van Ierusalem nae Gath, ende weder ghecomen.

+ G vers 41

42

Doen seynde de Coninck henen, ende liet Simei roepen, ende sprack tot hem: En heb ick v niet ghesworen byden HEEre, ende v ghetuyghet ende gheseyt: In welcken dach ghy wt trect, ende herwaerts oft derwaerts gaet, dat ghy weten sout, dat ghy den doot moet steruen? Ende ghi spraect tot my: Ick heb een goede meyninghe ghehoort.

43

Waerom en hebdy v dan niet gehouden nae den eedt des HEEren, ende ghebot, dat ick v gheboden hebbe?

44

Ende de Coninck sprack tot^† Simei: Ghy weet alle de boosheyt die uwer herten kenlijck is, die ghy mijn Vader Dauid ghedaen hebt. De HEEre heeft v boosheyt betaelt op v hooft.

† 2.Reg. 16.b.5 c.12.

45

Ende de Coninck Salomo is gheseghent. Ende den stoel Dauids sal bestandich zijn voor den HEEre eewelijck.

46

Ende de Coninck geboot Benaia den sone Ioiada: Die ghinck wt, ende sloech hem dat hy sterf. Ende dat Conincrijck wert beuesticht door de hant Salomo.