Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxj. Capittel.

¶ Daer quam eenen dieren tijt ende grooten hongher. Ende Sauls kinderen werden den Gibeoniten gegeuen. Dauid strijdt tegen de Philisteen.

1

⁺ HEt werdt oock eenen dieren tijt, in Dauids tijden, drie iaer aen malcanderen. Ende Dauidt sochte dat aensichte des HEEren. Ende de HEEre sprack:^† Om Sauls wille, ende om des bloets huys wil, dat hy de Gibeoniten ghedoot heeft.

+ A vers 1

† 1.Reg. 22.d.18

2

Doen liet de Coninck de Gibeoniten roepen, ende sprack tot hen:^† (De Gibeoniten en waren niet vanden kinderen Israels, maer ouerbleuen vanden Amoriten: Maer de kinderen Israels hadden hen ghesworen, ende Saul sochtse te slaen, in zijnen ijuer, voor de kinderen Israels ende Iuda)

† Iosue. 9.a.3.

3

Dus sprack dan Dauidt totten Gibeoniten: Wat sal ick v doen? Ende waer mede sal ickt versoenen, dat ghy dat erfdeel des HEEren seghent?

4

De Gibeoniten spraken tot hem: Het en is ons niet om gout, oft siluer te doene aen Saul ende aen zijnen huyse, ende ten is ons niet te doen, om yemandt te dooden, in Israel. Hy sprack: Wat segt ghy dan, dat ick v doen sal?

5

⁺ Sy spraken totten Coninck: De man die ons verdoruen ende te niet ghedaen heeft, sullen wy vernielen, dat hem niet en blijue in alle palen Israels.

+ B vers 5

6

Gheeft ons seuen mannen wt zijnen huyse, dat wyse op hanghen den HEEre tot Gibea Saul, des wtuercorenen des HEEREN. De Coninck sprack ick wilse gheuen.

7

Maer de Coninck spaerde MephiBoseth, den soon Ionathan, des soons Sauls,^† om des eedts wille des HEEren, die tusschen hen was, te weten, tusschen Dauidt ende Ionathan, den soon Sauls.

† 2.Reg. 18.a.3. 20.b.8. 23.d.18

8

Maer die twee sonen Rizpa, der dochter Aia, diese Saul ghebaert hadde, Armoni ende MephiBoseth: Daer toe de vijf sonen^* Michals, der dochter Sauls, die si

* 1.Reg. 18.d.19

[p. 125r]

Adriel ghebaert hadde, den sone Barsillai des Mahalothiters, nam de Coninc,

9

Ende gafse in de handen der Gibeoniten: Die hinghense opten Berch voor den HEERE.⁺ Aldus vielen dese seuen teenenmale, ende storuen inder tijt des eersten oogsts, als den ghersten oogst aengaet.

+ C vers 9

10

Doen nam Rizpa, de dochter Aia eenen sack, ende spreyde hem opten steen, int beghin des oogsts, tot datter water vanden Hemel op hem drupte, ende en liet de vogelen des Hemels des daechs daer op niet rusten, noch snachts de dieren des velts.

11

Ende het wert Dauid gebootschapt, wat Rizpa de dochter Aia, Sauls Concubine ghedaen hadde.

12

Ende^† Dauid ghinck henen, ende nam dat ghebeente Sauls ende dat ghebeente Ionathan zijns soons vanden borgheren tot Iabes in Gilead (diese vander straten Bethsan gestolen hadden, daerse de Philisteen henen ghehanghen hadden, inder tijt, doen de Philisteen Saul sloeghen, opten berch Gilboa)

† 1.Reg. 31.c.11.

13

Ende brachtse van daer opwaerts, ende vergaderdese te samen, metten ghebeenten der ghehanghenen.

14

⁺ Ende begroeuen dat ghebeente Sauls, ende zijns soons Ionathan, inden lande BenIamin, te Sela, inden graue zijns vaders Kis: Ende deden alle dinck, also de Coninck gheboden had. Alsoo werdt God na desen, den Lande weder versoent.

+ D vers 14

15

Maer daer verhief hem weder een Oorloge vanden Philisteen tegen Israel. Ende Dauid trock af, ende zijn knechten met hem, ende streden tegen de Philisteen. Ende Dauid wert moede.

16

Ende Iesbitot Nob (die en was vanden kinderen Rapha, ende dat gewichte zijnder spiessen, was drie hondert ghewichten metaels, ende hy had een nieu harnasch aen) die ghedacht Dauid te slaen.

17

Maer^† Abisai de sone SeruIa halp hem, ende sloech den Philisteum doot. Doen swoeren hem de Mannen Dauids, ende spraken:^† Ghi en sult niet meer met ons wt trecken inden strijt, op dat dat Licht in Israel niet wt en gae.

† 2.Reg. 23.d.18

† 2.Reg. 18.a.3.

18

^+† Doen stont daer noch een Oorloge op te Nob teghen de Philisteen. Doen sloech Sibechai de Husathijt, den Saph, de welcke der kinderen Rapha oock een was.

+ E vers 18

† 1.Par. 21.a.4.

19

Ende het verhief noch een Oorloge, tot Gob teghen de Philisteen. Doen sloech Elhanan, de sone IaereOrgim, een Bethlehemijt, den Goliath den Gethiter, die welcke een Spiesse hadde, der welcker staf was als eenen Weefboom.

20

Ende daer stont noch een Oorloghe op tot Gath, daer was een lanc man, die had ses vingeren aen sine handen, ende ses teenen aen sine voeten, dat is vierentwintich int getal, ende hy was oock gheboren van Rapha.

21

Ende doen hy Israel spijt seyde, sloech hem Ionathan, de sone Simea, des broeders Dauids.

22

Dese vier waren Rapha te Gath geboren, ende vielen door de hant Dauids, ende zijnre knechten.