Den Bibel, Inhoudende dat Oude ende Nieuwe Testament (Biestkensbijbel)

¶ Dat .xix. Capittel.

¶ Ioab straft den Coninck om dat hy truerich was. Den stamme Israels vliet elck in zijn tente, den stamme Iuda blijft aen Dauid. Simei vint genade, desgelijcx MephiBoseth. Barsillai bewijst den Coninc Dauid veel vrientschappen.

1

⁺ ENde het wert Ioab ghebootschapt: Siet, de Coninck weent ende draecht rouwe ouer Absalon.

+ A vers 1

2

Ende wt der victorien wert dies daechs eenen rouwe onder alle dat volc. Want dat volc hadde in dien dage gehoort, dat hem de Coninc om zijnen soon becommerde.

3

Ende dat volc ontstal hem wech op dien dach, dat het in de Stadt niet en quam, ghelijck hem een volck versteect dat tot schanden geworden is, alst inden strijt gheulucht is.

4

Maer de Coninck hadde zijn aensicht bedect, ende riep luide:^† Och mijn soon Absalon, Absalon mijn sone, mijn sone.

† 2.Reg. 18.f.32

5

Maer Ioab quam totten Coninc int huys ende sprac: Ghy hebt heden alle uwe knechten beschaemt, die heden uwe, uwer sonen, uwer dochteren, uwer wijuen, ende uwer Concubinen sielen ghesalueert hebben,

6

Om dat ghy lief hebt die v haten, ende hatet die v lief hebben. Want ghy laet v heden mercken, dat v niet en leyt aen de Hooftlieden, noch aen de knechten. Want ick mercke heden wel, waert dat Absalon v maer en leefde, ende wy heden alle doot waren, dat dochte v recht zijn.

7

⁺ Dus maect v nv op, ende gaet wt, ende spreect met uwen knechten vriendelijck. Want ick swere v byden HEEre, En gaet ghy niet wt, daer en sal geen Man desen nacht ouer by v blijuen. Dat sal v erger zijn, dan allet quaet dat ouer v gecomen is, van uwer ioncheyt op, tot nv toe.

+ B vers 7

8

Doen maecte hem de Coninc op, ende sette hem inde poorte. Ende men seyt alle den volcke. Siet, de Coninc sit inde poorte. Doen quam alle het volck voor den Coninck. Maer Israel was gheulucht, elck in zijn Hutte.

9

Ende allet volc in allen stammen Israels twisteden, ende spraken: De Coninc heeft ons verlost vander hant onser vianden, ende verloste ons vander Philisteen handt, ende heeft wt den Lande moeten vluchten voor Absalon.

10

Dus is Absalon ghestoruen inden strijdt, dien wy ouer ons ghesalft hadden: Waerom zijt ghy nv so stille, dat ghy den Coninc niet weder en haelt?

11

⁺ Maer de Coninck seynde tot Sadok en AbIathar den Priesteren, ende dede hen segghen: Spreect met den Ouders in Iuda, ende segt: Waerom wildy die laetste zijn, den Coninck weder te halen in zijn huys? (Want de redene des gheheelen Israels was voor den Coninc comen in zijn huys)

+ C vers 11

12

Ghy zijt mijn broeders, mijn been, ende mijn vleesch, waerom wildy dan de laetste zijn den Coninc weder te halen?

13

Ende segt tot^† Amasa: En zijt ghy niet mijn been, ende mijn vleesch? God doe my dit ende dat, waer ghy niet veldthooftman en sult zijn voor my v leefdaghe lanck in Ioabs stede.

† 2.Reg. 17.c.25

14

Ende hy neychde dat hert alle der mannen Iuda, als eens mans. Ende sy seynden henen totten Coninc: Coemt weder, ghy ende alle v knechten.

15

Also quam de Coninck weder. Ende doen hy aen de Iordane quam, waren de mannen Iuda tot Gilgal ghecomen, om af te trecken, den Coninck te gemoet, dat sy den Coninck ouer de Iordane souden leyden.

16

⁺ Ende^† Simei de sone Gera, des soons Iemini, die tot Bahurim woonde, haestede hem, ende trock metten mannen Iuda af, den Coninck Dauid te ghemoete,

+ D vers 16

† 2.Reg. 16.b.5. 3.Reg. 2.b.8.

17

Ende daer waren duysent mannen met hem van BenIamin.^† Daertoe ooc Siba de knecht wt den huyse Sauls, met zijn vijfthien sonen ende twintich knechten, ende spoeden hen door de Iordane voor den Coninck wech,

† 2.Reg. 16.a.1.

18

Ende maecten dat veyr, dat sy dat ghesin des Conincx ouer souden voeren, ende doen wat hem behaechde. Maer Simei de Sone Gera viel voor den Coninc neder, doen hy ouer de Iordane voer,

19

Ende sprac totten Coninck: Mijn Heere en rekent my de misdaet niet toe, ende en gedenct niet dat v knecht v lijden aen dede, in dien daghe, doen mijn Heere de Coninck

[p. 124r]

wt Ierusalem ghinck, ende de Coninck en neme dat niet ter herten.

20

Want v knecht bekent, dat ick ghesondicht heb. Ende siet, Ick ben heden de eerste die ghecomen is vanden geheelen huyse Iosephs, dat ick mijnen Heere den Coninck te gemoet af trock.

21

⁺ Maer Abisai de sone SeruIa andtwoorde ende sprack: En soude Simei daerom niet steruen, daer hy doch den gesalfden des HEEren gheuloect heeft?

+ E vers 21

22

Maer Dauid sprac:^† Wat heb ic met v te doen ghy kinderen SeruIa, dat ghi my heden tot Sathan wilt worden? Soude heden iemant steruen in Israel? Meynt ghy dat ic niet en weet dat ick heden een Coninc geworden ben ouer Israel?

† 2.Reg. 16.b.10 Mat. 16.c.23.

23

Ende de Coninck sprack tot Simei:^† Ghy en sult niet steruen. Ende de Coninc swoer hem.

† 3.Reg. 2.b.8.

24

^† MephiBoseth de soon Sauls quam oock af, den Coninck te gemoet: Ende hy en had zijn voeten, noch zijnen baert niet schoon gemaect, ende zijne cleederen niet gewasschen, van dien dage aen, doen de Coninck wech gegaen was, totten dage toe doen hy met vrede weder quam.

† 2.Reg. 16.a.1.

25

Als hy nv tot Ierusalem quam, om den Coninck te gemoete te gaen, sprac de Coninc tot hem: Waerom en zijt ghy niet met my ghetrocken MephiBoseth? Ende hy sprac:

26

Mijn Heer Coninck, mijn knecht heeft my bedrogen. Want v knecht dacht: Ick wil eenen Ezel sadelen, ende daer op rijden, ende totten Coninck trecken: Want v knecht is lam.

27

Daer toe heeft hy uwen knecht ouer ghedraghen voor mijnen Heere den Coninck. Maer mijn Heere de Coninck is als een^† Enghel Gods. Doet wat v wel behaecht.

† Gene. 33.b.10. 2.Re. 14.c.17. 2.Hest. 6.b.15

28

Want alle mijns vaders huys en is niet gheweest, dan lieden des doots voor mijnen Heere den Coninck.^* So hebdy uwen knecht gheset, onder die, die aen v tafel eten. Wat heb ic meer voor gerechticheyt, oft voorder te roepen aenden Coninck?

* 2.Reg. 9.b.7

29

De Coninc sprac tot hem: Wat spreect ghy noch voorder van uwen dinghen?^† Ick heb geseyt: Deylt ghy ende Siba den acker met malcanderen.

† 2.Reg. 9.b.7.

30

MephiBoseth sprac totten Coninc: Hy neme het ooc altemael wech, na dien mijn Heere de Coninc met vreden thuys gecomen is.

31

Ende^† Barsillai de Gileadijt quam af van Roglim, ende leydde den Coninc ouer de Iordaen, dat hy hem in de Iordane geleyde soude doen.

† 3.Reg. 2.b.7.

32

⁺ Ende Barsillai was seer out, wel tachtentich Iaer, die hadde den Coninck^† besorcht, dewijle dat hy tot Mahanaim was. Want hy was een seer treffelijck man.

+ F vers 32

† 2.Reg. 17.e.27

33

Ende de Coninck sprac tot Barsillai: Ghy sult met my ouer trecken. Ick wil v by my besorghen te Ierusalem.

34

Mer Barsillai sprack totten Coninck: Wat ist dat ick noch te leuen hebbe, dat ick metten Coninck op soude trecken na Ierusalem?

35

Ick ben heden tachtentich Iaer oudt. Hoe soude ick onderkennen, wat goet oft quaet is, oft smaken, wat ick ete oft drincke, oft hooren, wat de sanghers oft sangherssen singen? Waerom soude v knecht mijnen Heere den Coninck voorder beswaren?

36

V knecht sal een weynich metten Coninck ouer de Iordaen gaen. Waerom wil my de Coninck sulcke vergheldinghe doen?

37

Laet uwen knecht wederom keeren, dat ick in mijnder stadt sterue, by mijns vaders ende mijns moeders graf. Siet, daer is v knecht Chimeham, dien laet met mijnen Heere den Coninc ouer trecken, ende doet hem, wat v wel beualt.

38

De Coninc sprack: Chimeham sal met my ouer trecken, ende ick wil hem doen wat v wel behaecht, Oock al wat ghy aen my verkiest, dat wil ic v doen.

39

Ende doen allet volck ouer de Iordaen gegaen was, ende de Coninc oock, custede de Coninck den Barsillai, ende seghende hem. Ende hy keerde wederom tot zijn plaetse.

4[40]

⁺ Ende de Coninck quam ouer na Gilgal, ende Chimeham trock met hem. Ende alle tvolck Iuda hadde den Coninc ouer geleydt. Maer des volcx Israels, en was maer de helft daer.

+ G vers 4

41

Ende siet, doen quamen alle de mannen Israels totten Coninck, ende seyden tot hem: Waerom hebben v onse Broeders, de mannen Iuda ghestolen, ende hebben den Coninck, ende zijn huys ouer de Iordane gheleyt, ende alle mannen Dauids met hem?

42

Doen antwoorden de mannen Iuda, dien van Israel: De Coninck behoort ons na toe, wat zijt ghy gram daerom? Meynt ghy dat wy vanden Coninck voetsel, oft ghiften ontfangen hebben?

43

Soo andtwoorden dan die van Israel, dien van Iuda, ende seyden: Wy hebben thien mael meer byden Coninc, Daer toe ooc by Dauid, dan ghy. Waerom hebdy my dan soo cleyn gheacht, dat dat onse niet dat eerste gheweest en is, onsen Coninc te halen? Maer die van Iuda spraken herder, dan die van Israel.