Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvi. Capittel.

¶ Dauid schenct Siba alle de goeden van MephiBoseth den wederspannigen Semei bespot, lachtert, ende versmaet Dauid. Absalon boeleert met zijns Vaders wijuen.

1

⁺ ENde doen Dauid een weynich van der hoochten ghegaen was, siet,^* doen ontmoette hem Siba, de knecht MephiBoseths, met een paer Ezelen ghesadelt, daer op waren twee hondert brooden, ende hondert stucken rozijnen, ende hondert stucken vijghen, ende een flessche wijns.

+ A vers 1

* 1.Reg. 25.c.18.

2

Doe sprac de Coninck tot Siba: Wat wilt ghy daer mede maken? Siba sprack: De Ezelen sullen voor dat ghesin des Conincx zijn, om daer op te rijden, ende de brooden, ende de vijgen voor de knechten te eten, ende den wijn te drincken, als sy moede worden inder woestijnen.

3

De Coninck sprac: Waer is de sone ws Heeren? Siba sprac totten Coninc: Siet, hy bleef te Ierusalem. Want hy sprack: Heden wort my dat huys Israel, mijns vaders rijck weder gegeuen.

4

De Coninck sprac tot Siba:^† Siet, het sal al uwe zijn, wat MephiBoseth heeft. Siba sprac met aenbidden: Laet my genade vinden voor v, mijn Heer Coninc.

† 2.Reg. 9.b.9.

5

⁺ Maer doen de Coninc Dauid tot Bahurim quam, siet, doen ghinck daer een man wt vanden gheslachte des huys Sauls, die hiet^† Simei, de sone Gera, die ghinc wt,^* ende vloecte,

+ B vers 5

† 2.Reg. 19.c.16

* Exo. 22.d.28

6

Ende wierp Dauid met steenen, ende alle de knechten des Conincx Dauid. Want allet volc, ende alle geweldige waren tot zijnder rechter ende slincker hant.

7

Dus sprac Simei doen hy vloecte:^† Wel wt, wel wt, ghy bloethont, ghy loose Belials man.

† Eccl. 23.c.15.

8

De HEEre heeft v vergouden al dat bloet des huys Sauls, dat ghy in zijn plaetse Coninc geworden zijt. Nv heeft de HEere dat rijc gegeuen in de hant ws soons Absalons. Ende siet, nv steect ghy in v ongeluck. Want ghy zijt een bloethont.

9

Maer Abisai den sone SeruIa sprac totten coninc: Soude dese doode hondt mijnen Heere den Coninc vloecken? Ick wil henen gaen, ende hem den cop afslaen.

10

De Coninc sprac:^† Ghy kinderen SeruIa,^* wat heb ick met v te doen? Laet hem vloecken.⁺ Want de HEEre heuet hem geheeten: Vloect Dauid. Wie mach nv segghen: Waerom doet ghy also?

† 2.Reg. 19.e.22

* Mat. 16.c.23

+ C vers 10

11

Ende Dauid sprac tot Abisai, ende tot alle zijne knechten: Siet, mijn sone die van mijnen lijue ghecomen is, staet mij nae mijn leuen. Waerom nv oock niet de sone Iemini? Laet hem begaen dat hy vloecke, want de HEEre heuet hem geheeten.

12

^† Misschien sal de HEEre mijne allendicheyt aensien, ende my, zijne, deses daechs vloeckinghe met goet loonen.

† 3.Re. 2.g.44

13

Also ginc Dauid met zijne lieden zijns weechs. Maer Simei ghinc aen de sijde des berchs, neffens hem henen, ende vloecte, ende wierp met steenen tot hem ende besprengden met aerden dotten.

14

Ende de coninc quam moede in met alle den volcke dat by hem was, ende vermaeckte

[p. 122v]

hem aldaer.

15

Maer Absalon ende allet volck der mannen Israels, quamen te Ierusalem, ende Achitophel met hem.

16

Maer doen Husai de Arachiter Dauids vrient tot Absalon in quam, sprac hy tot Absalon: Gheluc toe Heer Coninc, gheluc toe Heer coninck.

17

⁺ Maer Absalon sprack tot Husai: Is dat uwe ontfermherticheyt aen uwen vrient? Waerom en sydy niet met uwen vrient ghetrocken?

+ D vers 17

18

Husai sprac tot Absalon: Alsoo niet, maer dien den HEEre verkiest, ende dit volc, ende alle man in Israel, diens wil ick zijn, ende by hem blijuen:

19

Ten anderen, wien soude ick dienen? En soude ick niet voor zijnen soon dienen? So ick voor dijnen vader gedient heb, so wil ic ooc voor v zijn.

20

Ende Absalon sprack tot Achitophel: Gheeft raet wat sullen wy doen?

21

Achitophel sprack tot Absalon:^† Beslaept de Concubinen ws vaders, die hy hier ghelaten heeft, om dat huys te bewaren. So sal alle Israel hooren, dat ghy uwen vader stinckende ghemaect hebt, ende de hant alle der gheender die by v zijn, sal dies te coender worden.

† 1.Reg. 12.c.11. 25.c.16.

22

Doen maecten sy Absalon een Hutte opt dack.^† Ende Absalon besliep de Concubinen zijns vaders, voor de ooghen des geheelen Israels.

† Gen. 35.d.22.

23

In die tijt, als Achitophel eenen raet gaf, dat was, als oftmen God om yet geuraecht had: Also waren alle raetslagen Achitophels, beyde by Dauid ende Absalon.