Den Bibel, Inhoudende dat Oude ende Nieuwe Testament (Biestkensbijbel)

¶ Dat .xi. Capittel.

¶ Dauid wordt door zijn ghesicht in onbehoorlijcker liefden ontsteken tegen BathSeba Vrias huysurouwe. Hy breeckt zijnen houwelijcken staet met haer, ende haren ghetrouden man laet hy dooden.

1

⁺ ENde doen dat Iaer om quam,^* inder tijt als de Coningen plegen wt te trecken, seynde Dauid Ioab ende zijne knechten met hem, ende dat gantsche Israel henen, dat sy de kinderen Ammon verderuen souden, ende belegghen souden Rabba. Maer Dauid bleef te Ierusalem.

+ A vers 1

* 1.Par. 21.a.1.

2

Ende het gheschiede dat Dauid ontrent den Auont opstont van zijnen Legher, ende ghinck op dat^† dack des Conincx huys, ende sach van dat dack een vrouwe haer^† wasschen. Ende dat wijf was van seer schoonder ghedaenten.

† Solder.

† Exo. 2.a.5. Susan. c.15.

3

Ende Dauid seynde henen, ende dede nae dat wijf vragen, ende segghen: En is dat niet BethSeba, de dochter Eliam, dat wijf Vria des Hetithers?

4

Ende Dauid seynde boden henen, ende dedese halen. Ende doen sy tot hem in quam,^* sliep hy by haer. Maer sy reynichde haer van haerder onreynicheyt, ende keerde wederom na haren huyse.

* Leu. 20.b.10. 18.c.20.

5

Ende dat wijf wert beurucht, ende seynde henen, ende liet Dauid vercondighen ende segghen: Ick ben beurucht geworden.

6

Maer Dauid seynde henen tot Ioab: Seynt tot my Vriam den Hethither. Ende Ioab seynde Vriam tot Dauid.

7

Ende doen Vria tot hem quam, vraechde Dauid, oft met Ioab ende metten volcke, ende metten crijch wel stonde.

8

⁺ Ende Dauid sprac tot Vriam: Gaet neder in v huys, ende wast v voeten. Ende doen Vrias wt des Conincx huys wtginc, volchde hem na des Conincx gheschenck.

+ B vers 8

9

Ende Vria leyde hem slapen voor de duere des Conincx huys, daer alle de knechten zijns Heeren laghen, ende en ghinck niet neder in zijn huys.

10

Maer doemen Dauid bootschapte: Vria en is niet neder in zijn huys ghegaen, sprac Dauid tot hem: En sydy niet ouer velt gecomen? Waerom en sydi niet in v huys ghegaen?

11

Maer Vria sprac tot Dauid: De Arcke ende Israel, ende Iuda blijuen inde Tenten, ende Ioab mijn Heere ende mijns Heeren knechten ligghen te velde, ende ic soude in mijn huys gaen, dat ick ate ende droncke, ende by mijn wijf laghe.^† Also waerachtelijc als ghy leeft, ende v siele leeft, ic en doe sulcx niet.

† 2.Re. 14.c.19 Iudi. 19.c.9.

12

Dauid sprac tot Vria: Soo blijft heden ooc hier, morghen wil ic v laten gaen. Dus bleef Vria te Ierusalem dien dach, ende des anderen daechs, daer toe.

13

Ende Dauid noode hem, dat hy voor hem soude eten ende drincken, ende maeckte hem droncken. Ende tsauonts ghinc hy wt dat hy op zijnen Legher slapen soude met zijns Heeren knechen, ende en ghinck niet neder in zijn huys.

14

⁺ Des morgens schreef Dauid eenen brief tot Ioab, ende santen door Vriam.

+ C vers 14

15

^† Hy schreef aldus inden brief: Stelt Vriam inden hoec des strijts daer hy alder hertste is, ende keert v achter van hem af, dat hy verslaghen worde, ende sterue.

† 3.Reg. 21.b.8.

16

Als nv Ioab om de stadt lach, stelde hy Vriam aen de plaetse daer hy wist dat strijtbaer mannen waren.

17

Ende doen de mannen wt der stadt vielen, ende streden teghen Ioab, vielen sommige des volcx vanden knechten Dauids, Ende Vria de Hethither sterf oock.

18

Doen seynde Ioab henen, ende dede Dauid bootschappen, alle de handelinge des strijts,

19

Ende geboot den bode ende sprac: Als ghy alle handelingen des strijts wtgesproken hebt metten Coninc,

20

⁺ Ende siet, dat de Coninck toornich is, ende tot v spreect: Waerom sydy so na der stadt ghegaen metten strijt? En wist ghy niet hoemen vanden mueren plach te schieten?

+ D vers 20

21

Wie sloech Abimelech den soon IeruBeseth?^* En wierp niet een wijf, een stuck van eenen Muelen op hem vander mueren, alsoo dat hy sterf te Thebez? Waerom hebt ghy v soo na der mueren gemaect? So sult ghy seggen: V knecht Vria de Hethither is oock doot.

* Iudi. 9.h.53

22

De bode ghinc henen, ende quam, ende bootschaptet Dauid al, daer hem Ioab om wt ghesent hadde.

23

Ende de bode sprack tot Dauid: De mannen namen de ouerhant tegen ons, ende vielen tot ons wt opt velt. Ende wy waren aen hen tot voor de duere der poorten.

24

Ende de Schutters schoten vander mueren op uwe

[p. 120r]

knechten, ende dooden sommighe van des Conincx knechten: Daer toe so is Vria v knecht de Hethither oock doot.

25

Dauid sprack totten bode: Dus suldy tot Ioab segghen: En laet v dat niet qualijck behaghen, want dat sweert verslint nv desen, nv dien. En laet slechs niet af vanden strijt teghen de stadt, dat ghyse breect, ende hebt eenen goeden moet.

26

Ende doen Vrias wijf hoorde, dat Vria haer man doot was, droech sy rouwe om haren huysweert.

27

Maer doen sy wtghetruert hadde, seynde Dauid henen, ende dedese in zijn huys halen. Ende sy wert zijn wijf, ende baerde hem eenen soon. Maer die daet beuiel den HEEre qualijck, die Dauid dede.