Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

Dauid begrasijt de maechscap Sauls ende bewijst haer veel duechden om Ionathans wille.

1

⁺ ENde Dauid sprack: Isser oock noch yemandt ouerbleuen vanden huyse Saul, dat ick ontfermherticheyt aen hem doe, om Ionathans wille?

+ A vers 1

2

Maer daer was een knecht vanden huyse Sauls, die hiet Siba, dien riepen sy tot Dauid. Ende de Coninck sprac tot hem: Sijt ghy Siba? Hy sprack: Ia, dijn knecht.

3

De Coninck sprack: Isser noch yemandt vanden huyse Sauls, dat ick Godts ontfermherticheyt aen hem doe? Siba sprack totten Coninck:^* Daer is noch een soon Ionathans, lam aen de voeten.

* 2.Reg. 4.a.4

4

De Coninck sprack tot hem: Waer is hy? Siba sprack totten Coninc: Siet, hi is te Lodabar, inden huyse^* Machir, des soons Ammiel.

* 2.Reg. 17.c.27

5

Doen seynde de Coninck Dauid henen, ende liet hem halen van Lodabar wt den huyse Machir des soons Ammiel.

6

⁺ Doen nv MephiBoseth de soon Ionathan des soons Sauls, tot Dauid quam, viel hy op zijn aensicht ende aenbede. Maer Dauid sprack: MephiBoset. Hy sprack: Hier ben ick, v knecht.

+ B vers 6

7

Dauid sprac tot hem: En vreest niet, want ic wil ontfermherticheyt aen v doen om Ionathan ws vaders wille,^* Ende wil v alle de Ackeren ws Vaders Sauls weder gheuen. Maer ghy sult dagelijcx aen mijn tafel dat broot eten.

* 2.Re. 19.e.29.

8

Maer hy aenbede ende sprack:^† Wie ben ick dijn knecht, dat ghy v keert tot eenen dooden Hont, ghelijck ick ben?

† 1.Reg. 18.d.18

9

Doen riep de Coninc Siba den Knape Sauls, ende sprack tot hem:^† Allet wat Sauls gheweest is, ende zijns gheheelen huys, dat heb ick den sone ws Heeren ghegeuen.

† 2.Reg. 16.a.4

10

⁺ Dus arbeyt hem nv zijnen Acker, ghy en uwe kinderen, en knechten, ende brenghet in, dattet ws Heeren soons broodt sy, dat hy hem geneere. Maer MephiBoseth ws Heeren soon, sal daghelijcx dat broodt eten aen mijn tafel. Maer Siba hadde vijfthien sonen ende twintich knechten.

+ C vers 10

11

Ende Siba sprack totten Coninck: Allet ghelijc mijn Heere de Coninc zijnen knecht gheboden heeft, soo sal zijn knecht doen. Ende MephiBoseth ete aen mijn tafel, als des Conincx kinderen een.

12

Ende MephiBoseth had eenen cleynen soon, die hiet Micha: Maer allet wat inden huyse Siba woonde, dat diende MephiBoseth.

13

Maer MephiBoseth woonde te Ierusalem, want hy at daghelijcx aen des Conincx Tafel,^* ende hincte met beyde zijne voeten.

* 2.Reg. 4.a.4