Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ Dauid dwinghet de Philistijnen, ende de ander omligghende Natie.

1

⁺ ENde het gheuiel daer na^* dat Dauid de Philisteen sloech, ende maectese swack, ende nam den diensttoom vander Philisteen hant.

+ A vers 1

* 1.Par. 19.a.1.

2

^* Hy sloech de Moabiten oock alsoo ter Aerden, dat hy twee deelen totter doot bracht, ende een deel byden leuen liet.^† Also werden de Moabiten Dauidt onderdanich, dat sy hem gheschencken brachten.

* Num. 24.c.17

† 4.Reg. 1.a.4 3.a.5.

3

Dauidt sloech oock HadadEser den soon Rehob den Coninc tot Soba, doen hy henen trock om zijne macht weder te halen, aen dat water Phrath.

4

Ende Dauid vinc van hen duysent ende seuen hondert Ruyters, ende twintich duysent voet volcx, ende verleemde alle wagens, ende behielt hondert wagens ouer.

5

Maer de Siriers van Damasco quamen te hulpen HadadEser, den Coninc tot Soba. Ende Dauid sloech der Siriers tweentwintich duysent mannen.

6

⁺ Ende leyde volck tot Damasco in Siria. Alsoo wert Siria Dauid onderdanich, dat sy hem ghiften brochten. Want de HEEre halp Dauid werwaerts hy trock:

+ B vers 6

7

Ende^† Dauid nam de gulden schilden die HadadEsers knechten hadden, ende brachtse te Ierusalem.

† Iudit. 16.d.23

8

Maer van Betah ende Berothai den steden HadadEser, nam de Coninc Dauidt seer veel metaels.

9

^† Maer doen Thoi de Coninc te Hemath hoorde, dat Dauid alle macht des HadadEsers had geslagen,

† 1.Par. 19.b.9

10

Seynde hy Ioram zijnen soon tot Dauid, om hem vriendelijc te groeten, ende om hem te seghenen, dat hy tegen HadadEser gestreden ende hem geslagen had (want Thoi hadde eenen strijt tegen HadadEser) Ende hi had met hem silueren guldenen ende metalen Cleinodien.

11

Welcke de coninc Dauid den HEre ooc heylichde, met den siluer

[p. 119r]

ende goude dat hy den HEEre heylichde van alle Heydenen, die hy onder hem bracht,

12

Van Sirien, van Moab, vanden kinderen Ammon, vanden Philisteen, van Amalek, vanden roof HadadEser den soon Rehob, den Coninc te Soba.

13

⁺ Ooc maecte hem Dauid eenen naem, doen hy weder quam^* ende de Siriers sloech int soutdal achthien duysent:

+ C vers 13

* 1.Pa. 19.c.12.

14

^† Ende hy leyde volc in gheheel Edomea. Ende dat gantsche Edom was Dauid onderworpen. Want de HEEre halp Dauid waer hy henen trock.

† Gen. 25.c.22. Nu. 24.d.18.

15

Also was Dauid Coninck ouer gheheel Israel. Ende hy dede recht ende gerechticheyt alle den volcke.

16

^† Ioab de soon SeruIa was ouer dat heyr. Maer Iosaphat de soon Ahilud, was Cancellier.

† 2.Reg. 20.d.23

17

Sadock de soon Ahitob, Ahimelech de soon AbIathar waren Priesters. Seraia was Schrijuer.

18

^† Banaia de soon Ioiada was ouer de Chreti ende Pleti, ende de sonen Dauids waren Priesters.

† 1.Pa. 19.c.17.