Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Dauid neempt voor hem een huys den HEEre te timmeren. Ende dat wert hem vanden HEERE door Nathan verboden, ende op zijnen soon vertogen. Dauid danct den HEEre.

1

⁺ DOen nv de^† Coninck in zijnen huyse sat, ende de HEEre hem ruste ghegheuen hadde van allen zijnen Vianden rontom,

+ A vers 1

† 1.Par. 18.a.1. 23.b.7.

2

Sprack hy totten Propheet Nathan: Siet, ick woone in een Cederen huys, ende de Arcke Gods woont onder de Tapeten.

3

Nathan sprack totten Coninck:^† Gaet henen, al wat ghy in uwer herten hebt dat doet, want de HEEre is met v.

† 1.Reg. 10.b.7.

4

Maer snachts quam dat woort des HEEren tot Nathan, ende sprac:

5

Gaet henen, ende segt mijnen knecht Dauid: Dus spreect de HEEre: Sout ghy my een huys timmeren dat ick daer in soude woonen?

6

^† Ick en heb doch in geenen huyse ghewoont sint dien daghe dat ick de kinderen Israels wt Egipten leyde tot desen daghe toe. Maer ick heb gewandelt in de Hutte ende Wooninghe,

† Esaie. 66.a.1.

7

Werwaerts ick met allen den kin-

[p. 118v]

deren Israels wandelde. Heb ick oock oyt met eenigen der stammen Israels gesproken, dien ic beuolen hebbe mijn volc Israel te weyden ende geseyt: Waerom en timmert ghy my niet een Cederen huys?

8

⁺ Dus suldy nv aldus seggen mijnen knecht Dauid: Dus spreeckt de HEEre Sebaoth:^† Ick heb v genomen vanden schaepshutten, dat ghy een Vorst sout zijn ouer mijn volck Israel.

+ B vers 8

† 2.Reg. 16.c.11 Psal. 78.f.70

9

Ende ben met v gheweest, werwaerts dat ghy gegaen hebt, ende heb alle uwe vianden voor v wtgheroyt, ende heb v eenen grooten name ghemaect, als den name der grooter op Aerden.

10

^† Ende ick wil mijnen volcke Israel een plaetse setten, ende wilt planten dattet aldaer woone, ende dattet niet meer dwalende en gae, ende dattet de kinderen der boosheyt niet meer en quellen, als te voren.

† Mat. 16.c.18.

11

Ende sint ter tijt dat ic Rechters ouer mijn volck Israel gheordineert heb. Ende wil v ruste gheuen van alle uwe Vianden. Ende de HEEre vercondighet v, dat de HEEre v een huys wil maken.

12

⁺ Als nv uwen^† tijt wech is, dat ghy met uwen Vaderen slapen ligt, soo wil ic v saet na v verwecken, dat van uwen Lijue comen sal: Dien wil ick zijn rijck beuestigen.

+ C vers 12

† 3.Reg. 5.a.5. 3.Reg. 8.c.19. 1.Par. 23.b.9. 29.b.6. Psal. 132.b.11.

13

Die sal mijnen name een huys timmeren^* ende ick wil den stoel zijns Conincrijcx beuestigen eewelijc:

* Iere. 33.e.17.

14

^‡ Ick wil zijn Vader zijn, ende hy sal mijn sone zijn.^† Als hy een misdaet doet, so wil ick hem met menschen roeden, ende met der menschen kinderen slaghen straffen.

‡ Hebr. 1.b.5.

† Psal. 89.d.31 3.Reg. 11.c.14

15

Maer mijne ontfermherticheyt en sal niet van hem ghekeert werden, soo ickse ghekeert heb van Saul^* dien ick voor v wech heb genomen.

* 1.Reg. 15.e.23.

16

Maer v huys ende v Conincrijck sal stantachtich zijn eewelijck voor v, ende uwen stoel sal eewelijck vast zijn.

17

⁺ Doen Nathan alle dese woorden ende allet ghesichte Dauidts gheseyt hadde,

+ D vers 17

18

Quam Dauid de Coninc, ende stelde hem voor den HEEre ende sprack: Wie ben ick HEEre HEEre? Ende wat is mijn huys, dat ghy my tot hier toe ghebracht hebt?

19

Daer toe hebdy dat noch te luttel geacht, HEEre HEEre, maer hebt den huyse ws knechts noch van ouer lange toecomenden ghesproken. Dat is een wijse eens menschen die Godt de HEERE is.

20

Ende wat sal Dauidt meer met v spreken? Ghy kent uwen knecht HEEre HEEre.

21

Om ws woorts wille, ende na uwer herten, hebdy sulcke groote dinghen al gedaen, dat ghyse uwen knecht condich maecte.

22

Daerom sydy oock groot gheachtet HEEre Godt. Want daer en is niemant gelijck als ghy.^† Ende daer en is gheen Godt dan alleen ghy, na alle dat wy met onsen ooren ghehoort hebben.

† Deut. 32.f.39.

23

Want^* waer is een volck opter Aerden als v volck Israel? Om welcx wille Godt is henen gegaen, om hem een volck te verlossen, ende hem eenen name te maken, ende sulcke groote ende veruaerlijcke dingen te doen, op uwen lande voor uwen volcke, ^† welck ghy v verlost hebt van Egipten, vanden Heydenen ende haren goden.

* Deut. 4.a.7.

† Exod. 14.f.30

24

Ende ghy hebt v dijn volck Israel toebereyt, v tot eenen volcke inder eewicheyt, ende ghy HEEre zijt haer Godt geworden.

25

⁺ Aldus maect nv crachtich HEEre God dat woort inder eewicheyt, dat ghy ouer uwen knecht, ende ouer zijn huys gesproken hebt, ende doet als ghy ghesproken hebt.

+ E vers 25

26

Soo sal uwen name groot werden inder eewicheyt, also datmen sal seggen: De HEEre Sebaoth is de God ouer Israel, ende dat huys ws knechts Dauid, sal^† bestandich zijn voor v.

† Vast.

27

Want ghy HEERE Sebaoth, ghy Godt Israels, hebt de oore ws knechts geopent, ende gheseyt: Ick wil v een huys timmeren. Daerom heeft v knecht zijn herte geuonden, dat hy dit gebet tot v bidden soude.

28

^† Nv HEEre HEEre ghy zijt Godt^* ende uwe woorden sullen waerheyt zijn. Ghy hebt alsulc goet ouer uwen knecht ghesproken.

† Deut. 32.f.39.

* Ioan. 17.c.17.

29

So beghint nv, ende segent dat huys ws knechts, dat het eewelijck voor v sy. Want ghy HEERE HEERE hebbet ghesproken. Ende met uwe segheninghe sal ws knechts huys ghesegent werden eewelijck.