Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Dauid doet de Arcke des HEEren wt Anadaps huys in Obed Edoms huys brengen. Vsa wert ghestraft om dat hyse aenroert. Daer na laet hyse in zijn stadt brenghen.

1

⁺ ENde Dauid^* vergaderde weder alle ionge wtgecoren mannen in Israel dertich duysent,

+ A vers 1

* 1.Par. 14.a.1

2

Ende maecte hem op, ende ghinck henen met alle den volcke dat by hem was, vanden borgeren Iuda, dat hy de Arcke Gods van daer op soude halen, der welcker name heet: De name des HEEren Sebaoth, woont daer op bouen den Cherubim.

3

^† Ende si lieten de Arcke Gods voeren op eenen nieuwen wagen, ende haeldense wt den huyse AbiNadab, die tot Gibea woonde. Maer Vsa ende Ahio de sonen AbiNadab dreuen den nieuwen waghen:

† 1.Reg. 6.b.7. 7.a.1.

4

Ende doen sy hem metter Arcken Gods wt den huyse Abinadabs voerden, die tot Gibea woonde, ende Ahio voor de Arcke henen ghinck,

5

Speelde Dauidt ende dat geheele huys Israels voor den HEEre henen, met alderhande snarenspel, van Dennen houte, met Herpen ende Psalteren, ende Tamboeren, ende Schellen, ende Cimbalen.

6

⁺ Ende doen sy quamen totter schueren Nachon^* greep Vsa toe, ende hielt de Arcke Gods, want de Runderen traden besiden wt.

+ B vers 6

* 1.Par. 14.b.9 Num. 4.b.15 7.b.9.

7

Doen verbolch des HEEren gramschap ouer Vsa, ende Godt sloech hem aldaer, om zijnder vermetentheyt wille, also dat hy aldaer sterf by de Arcke Gods.

8

Doen wert Dauid bedroeft, dat de HEERE een sulcke schuere aen Vsa dede. Ende hiet de selue plaetse, PerezVsa, tot op desen dach.

9

Ende Dauid vreesde hem voor den HEEre in dien daghe, ende sprack: Hoe sal de Arcke des HEEren tot my comen?

10

Ende en wildese niet tot hem laten brenghen in de stadt Dauid, maer lietse brengen int huys ObedEdom des Gathiters.^* Ende doen de Arcke des HEEren drye maenden bleef int huys ObedEdom des Gathithers, seghende hem de HEERE, ende zijn gheheele huys.

* 1.Pa. 14.b.14

11

⁺ Ende het wert den Coninc Dauid gebootscapt,^* dat de HEEre dat huys ObedEdom seghende, ende al wat hy hadde, om der Arcken Gods wille.^† Doen ghinc hy henen ende haelde de Arcke Gods wt den huyse ObedEdom opwaerts in de stadt Dauids met vruechden.

+ C vers 11

* 1.Pa. 14.b.14

† 1.Par. 16.a.3.

12

Ende als sy voort ghingen metter Arcken des HEEren, ses gangen, offerde men eenen Os ende een vet Schaep.

13

Ende Dauid danste met alder macht voor den HEEre henen, ende was begordet met ee-nen lijnen Lijfrock.

14

Ende Dauid met gheheel Israel voerden de Arcke des HEEren opwaerts met^* iuychen ende basuynen.

* Een vrolijc geroep.

15

^+† Ende doen de Arcke des HEEren in de stadt Dauids quam, sach Michal Sauls dochter door dat venster, ende sach den Coninck Dauid springhen ende dansen voor den HEEre, ende verachte hem in haerder herten.

+ D vers 15

† 1 Pa. 16.d.28

16

^† Maer doen sy de Arcke des HEEren daer in brachten, stelden syse op haer plaetse, midden inder Hutten, die Dauidt voor haer op hadde gheslaghen. Ende Dauid offerde Brandtoffer ende Dancoffer voor den HEEre.

† 1.Pa. 16.a.3. 17.a.1.

17

Ende doen Dauid wt hadde gheoffert den Brandtoffer ende Danckoffer, seghende hy dat volck inden naem des HEEREN Sebaoth,

18

^† Ende deylde wt alle den volcke ende der Menichten Israels, beyde mannen ende vrouwen, eenen yegelijcken eenen brootcoeck, ende een stuck vleeschs ende een flessche wijns: Doe ghinck allet volck wech, elck in zijn huys.

† 1.Par. 17.a.3.

19

⁺ Maer doen Dauid weder quam om zijn huys te segenen, ghinc hem Michal de dochter Sauls daer buyten te gemoet, ende seyde: Hoe heerlijck is heden de Coninc van Israel gheweest, die hem voor de Maerten zijnre knechten ontbloot heeft, soo hen de lichtuaerdighe lieden ontblooten.

+ E vers 19

20

Maer Dauid sprack tot Michal: Ick wil voor den HEEre spelen, die my vercoren heeft voor uwen vader ende voor alle zijn huys, also dat hy my beuolen heeft een Vorst te zijn ouer dat volck des HEEren, ouer Israel:

21

Ende wil noch snooder werden dan also, ende wil neder zijn in mijnen ooghen, ende metten maerten, daer ghy af gesproken hebt, tot eeren werden.

22

Maer Michal Sauls dochter en hadde gheen kindt tot aenden dach haers doots.