Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ Dauid neemt dat gantsche rijck in, ende hy verweldicht ende verheert de Philisteen op alle plaetsen.

1

⁺ ENde alle de stammen Israels^* quamen tot Dauid, tot Hebron, ende seyden: Siet, wy zijn ws ghebeendts ende ws vleesch.

+ A vers 1

* 1.Par. 12.a.1. 13.c.38.

2

Daer toe oock te voren doen Saul ouer ons Coninck was, leydde ghy Israel wt ende in. So heeft v de HEERE geseyt:^† Ghy sult mijn volck Israel hoeden, ende sult een Hertoch zijn ouer Israel.

† Psal. 78.

3

Ende alle de ouders in Israel quamen totten Coninck te Hebron. Ende de Coninck Dauid maecte een verbondt met hen tot Hebron voor den HEEre. Ende sy salfden Dauid tot eenen Coninck ouer Israel.

4

Dertich iaer was Dauid out, doen hy Coninck wert, ende regeerde veertich iaer.

5

^† Tot Hebron regeerde hy seuen Iaer ende ses maenden ouer Iuda: Maer tot Ierusalem regeerde hy driendertich Iaer, ouer alle Israel ende Iuda.

† 3.Reg. 2.b.11.

6

⁺ Ende de Coninck trock henen met zijne mannen na Ierusalem, tegen de Iebusiten die inden Lande woonden. Maer sy seyden tot Dauid: Ghy en sult hier niet incomen, maer blinde ende lamme sullen v af drijuen (Maer dat meynden sy) dat Dauid daer niet in en soude comen.

+ B vers 6

7

Maer Dauid wan de borcht Sion, dat is Dauids stadt.

8

Doe sprack Dauid opten seluen dach:^† Wie de Iebusiten slaet, ende vercrijcht de dacgoten, de lammen ende blinden, den welcken de siele Dauids viant is. Daer wt seytmen:^† En laet gheen blinde oft lammen int huys comen.

† 1.Par. 12.a.6.

† Leuit. 21.c.18.

9

Alsoo woonde Dauid opten borcht, ende hietse Dauidts stadt. Ende Dauid timmerde rontom van Millo ende van binnen.

10

Ende Dauid ghinc ende nam toe, ende de HEEre de God Sebaoth was met hem.

11

Ende Hiram de Coninck tot Tyro^* seynde boden tot Dauid, ende Cederboomen totten wande, ende timmerlieden ende steenhouwers, datse Dauid een huys souden timmeren.

* 1.Par. 15.a.1.

12

⁺ Ende Dauid merckte dat hem de HEEre tot eenen Coninc ouer Israel beuesticht hadde, ende zijn Conincrijck verhooghet, om zijns volcx Israels wille.

+ C vers 12

13

Ende^† Dauid nam noch meer Huysvrouwen ende Concubinen tot Ierusalem, na dien dat hy van Hebron gecomen was, ende hem werden noch meer sonen ende dochteren geboren.

† 2.Reg. 3.a.2.

14

^† Ende dit zijn de namen der gheenre die hem tot Ierusalem gheboren zijn: Samua, Sobab, Nathan, Salomo,

† 1.Par. 3.a.1.

15

Iebehar, Elisua, Nepheg,

16

Iaphia, Elisama, Eliada, Eliphaleth.

17

Ende doen de Philisteen hoorden datmen Dauid tot eenen Coninc ouer Israel gesalft hadde, trocken sy alle op, om Dauid te soecken. Doe Dauid dat vernam, troc hy af in een borcht.

18

Maer de Philisteen quamen ende lieten hen neder inden gront Rephaim.

19

⁺ Ende Dauid^* vraechde den HEEre ende sprac: Sal ick op trecken tegen de Philisteen? Ende wilt ghyse in mijnen handen geuen? De HEEre sprac tot Dauid: Trect op, ick wil de Philisteen in uwen handen geuen.

+ D vers 19

* 1.Reg. 23.a.2. 2.Reg. 2.a.2. 3.Reg. 22.a.6. 2.Par. 18.a.4

20

Ende Dauid quam tot.^‡ Baal Phrasim, ende sloechse aldaer ende sprac: De HEEre heeft mijne Vianden voor my van malcanderen geschuert, gelijc als de wateren hen van malcanderen schueren. Ende daeraf heetmen die selue plaetse Baal Phrasim.

‡ Esaie. 28.d.21

21

Ende sy lieten hare Afgoden al daer. Maer Dauid ende zijne mannen namense op.

22

Maer de^‡ Philisteen trocken weder op, ende lieten hen neder in de valleye Rephaim.

‡ 1.Par. 15.c.13

23

^† Ende Dauid vraechde den HEEre, die sprack: Ghy en sult niet op trecken, maer coemt van achter tot hen,

† 1.Reg. 23.a.2 2.Reg. 2.a.1. 5.c.19. 2.Par. 15.b.10

[p. 118r]

dat ghy aen hen coemt tegen de Moerbesiboomen ouer.

24

Ende als ghy hooren sult dat ruysschen opten tacken der Moerbesiboomen henen gaen, soo weest dapper. Want de HEEre is dan voor v wtgegaen, om te slaen dat Heyr der Philisteen.

25

Dauid dede als hem de HEEre geboden hadde, ende sloech de Philisteen van Geba aen, tot datmen coemt te Gaser.