Den Bibel, Inhoudende dat Oude ende Nieuwe Testament (Biestkensbijbel)

[p. 116r]

Dat tweede Boeck Samuel.

¶ Dat eerste Capittel.

¶ Sauls doot wort Dauid gebootschapt. Dauid straft den ghenen die hem beroemde dat hy Saul ghedoot hadde. Ende beweende Saul den Coninck.

1

⁺ NAe de doot van Saul,^† doen Dauid vanden Amalekiten slach weder ghecomen, ende twee dagen tot Siklag gebleuen was.

+ A vers 1

† 1.Reg. 30.d.17

2

Siet, doen quam opten derden dach een man wt den heyr Sauls, met gheschuerde cleederen, ende Aerde op zijn hooft. Ende doen hy tot Dauid quam, viel hy ter Aerden ende aenbede.

3

Maer Dauid sprac tot hem: Van waer coemt ghy? Hy sprac tot hem: Wt den Heyr Israels ben ick ontulucht.

4

Dauid sprac tot hem: Segt my, hoe gaet het toe? Hi seyde: Dat volck is gheulucht vanden strijdt, ende daer is veel volcx gheuallen: Daer toe is Saul doot, ende zijn soon Ionathan.

5

Dauid sprack totten Ionghelinck, die hem dat seyde: Waer wt weet ghy dat Saul ende zijn soon Ionathan doot zijn?

6

⁺ De Iongelinc die hem dat seyde, sprac: Ick quam by gheuallen opt gheberchte Gilboa, ende siet, Saul leende op zijn spiesse, ende de Waghenen ende Ruyters iaechden achter hem henen,

+ B vers 6

7

Ende hy keerde hem om ende sach my, ende riep my. Ende ick sprack: Hier ben ick.

8

Ende hy seyde tot my: Wie zijt ghy? Ick seyde tot hem: Ick ben een Amalekite.

9

Ende hy sprack tot my: Treedt tot my, ende doot my, want benautheyt heeft my beuaen, ende mijn leuen is noch gheheel in my:

10

Doen tradt ick tot hem, ende doode hem. Want ick wiste wel dat hy niet leuen en mochte nae sinen val. Ende nam de croon van sinen hoofde, ende dat armghesmit van sinen arme, ende hebt hier ghebracht tot v mijnen Heere.

11

Doen^† greep Dauid sine cleederen ende schuerdese, ende alle Mannen die by hem waren,

† 2.Reg. 3.f.31. 13.f.31.

12

Ende droeghen rouwe, ende weenden, ende vasten totten auont, ouer Saul ende Ionathan sinen sone, ende ouer dat volck des HEEren, ende ouer dat huys Israel, om dat si doort sweert gheuallen waren.

13

⁺ Ende Dauid seyde totten Iongelinck diet hem bootschapte: Van waer zijt ghi? Hy seyde: Ick ben eens vreemdelincks, eens Amalekiten soon.

+ C vers 13

14

Dauid sprack tot hem:^† Hoe, dat ghy v niet gheureest en hebt, v hant te slaen aen den ghesalfden des HEEren om hem te verderuen?

† Psal. 105.b.15

15

Ende Dauid sprack tot een van sinen Ionghelinghen:^† Gaet toe, ende slaet hem. Ende hy sloech hem dat hy sterf.

† 2.Reg. 4.c.10

16

Doen sprack Dauid tot hem: V bloet sy op uwen Cop.^† Want uwen mondt heeft teghen v seluen ghesproken, ende gheseyt: Ic heb den gesalfden des HEEREN ghedoot.

† Mat. 12.c.37. Luc. 19.b.22.

17

Ende Dauid claechde dese clage ouer Saul ende Ionathan sinen Soon:

18

Ende beual datmen den kinderen Iuda den boghe soude leeren. Siet, het staet gheschreuen inden Boeck der redelijcker.

19

Die edelste in Israel zijn op uwer hoochten verslaghen. Hoe zijn de^* Helden gheuallen?

* Vrome mannen.

20

^† En bootschapt dat niet te Gath. En vercondighes niet opten straten tot Asklon, op dat hen niet en verblijden de dochteren der Philisteen, op dat de dochteren der onbesnedenen niet vrolijck en zijn.

† Mich. 1.b.10

21

⁺ Ghy berghen tot Gilboa, het en moet noch dauwe, noch reghen op v, noch ackers zijn daer Hefofferen van comen. Want aldaer is den Helden haren schilt af gheslaghen: Den schilt Sauls, als oft hy met oly niet ghesalft en ware.

+ D vers 21

22

^* Den boghe Ionathan en heeft noyt ghemist: Ende dat sweert Sauls en is noyt ledich weder comen, vanden bloede der verslaghender, ende vanden vette der Helden.

* 1.Regum. 13.a.3 14.b.13. 15.b.7. 21.d.11.

23

Saul ende Ionathan vrienthout ende minlijck in haren leuen, zijn oock inden doot niet ghescheyden: Lichter dan den Arent, ende stercker dan de Leeuwen.

24

Ghy Dochteren Israels weent ouer Saul, die v cleedet met rosijn verwe suyuerlijck: Ende vercierde v met gulden cleynodien aen uwe cleederen.

25

Hoe zijn de Helden soo gheuallen in uwen strijde? Ionathan is op uwer hoochten verslaghen.

26

Het is my leet om uwent wille, mijne broeder Ionathan: Ic heb groote vruecht ende ghenuechte aen v ghehadt:^† V liefde is my sonderlingher gheweest, dan vrouwen liefde.

† 1.Reg. 18.a.3. 19.a.1. 20.c.17.

27

Hoe zijn de Helden gheuallen? Ende de strijdtbare vergaen?