Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxj. Capittel.

¶ De Philistijnen strijden tegen Israhel, Sy verslaen Ionathan ende de andere sonen Sauls. Saul wort ghewondt, ende inder vlucht so doorsteect hy hem seluen, ende zijn Wapendragher hem seluen oock.

1

⁺ MAer de Philisteen^* streden teghen Israel. Ende de mannen Israels vluchten voor de Philisteen, ende vielen verslaghen opten gheberchte Gilboa.

+ A vers 1

* 1.Par. 11.a.1.

2

Ende de Philisteen hinghen hen aen Saul ende sine sonen, ende sloeghen Ionathan ende AbiNadab, ende Malchisua, de sonen Sauls.

3

Ende den strijdt wert hert teghen Saul, ende de Schut-ters schoten op hem met boghen, ende hy werdt seer ghewont vanden Schutters.

4

Doen sprac Saul tot sinen Wapendragher:^† Trect wt v sweert, ende doorsteect my daer mede, op dat dese Onbesnedene niet aen en comen, ende my doorsteken, ende bedrijuen eenen spot met my. Maer zijn Wapendragher en wilde niet, want hy vreesde seer. Doe nam Saul dat sweert ende viel daer in.

† Iudi. 9.h.54.

5

⁺ Als nv zijn Wapendrager sach^* dat Saul doot was, viel hi oock in zijn sweert ende sterf met hem.

+ B vers 5

* 1.Reg. 28.d.19

6

Alsoo sterf Saul ende zijn drie sonen, ende zijn Wapendragher, ende alle zijne mannen te ghelijck op dien dach.

7

Maer doen de mannen Israels, die op gheen zijde der Valleyen, ende op gheen side der Iordanen waren, saghen dat de mannen Israels gheulucht waren, ende dat Saul ende zijn Sonen doot waren, verlieten si de Steden, ende vluchten oock. Alsoo quamen de Philisteen, ende woonden daer in.

8

^* Des anderen daechs quamen de Philisteen, om die verslaghen wt te trecken, ende si vonden Saul, ende zijn drie sonen ligghen opt gheberchte Gilboa,

* 1.Par. 11.b.8.

9

⁺ Ende hieuwen hem zijn hooft af, ende trocken hem zijn wapen wt, ende seyndense al om in der Philisteen Lant, om te vercondigen inde huysen haerder Afgoden, ende onder dat volc.

+ C vers 9

10

Ende leyden zijn harnasch in dat huys Astharoth, maer zijn lichaem hinghen sy op de muere tot Bethsan.

11

Doen die tot^† Iabes in Gilead hoorden, wat de Philisteen Saul ghedaen hadden,

† 1.Reg. 11.a.1. 2.Reg. 2.a.4.

12

Maecten si hen op, wat strijtbaer mannen waren, ende ghinghen den gheheelen nacht, ende namen de Lichamen Sauls ende zijnder sonen, vander mueren tot Bethsan,^* ende brachtense tot Iabes, ende verberndense aldaer,

* Iere. 34.a.5.

13

Ende namen haer gebeenten, ende begroeuense onder den Boom te Iabes, ende vasten seuen dagen.

¶ Eynde des eersten Boecx Samuels.