Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxix. Capittel.

¶ De Philistinen worden gram om dat Dauid haer hooftman soude zijn, de Coninck seynt hem weder thuys.

1

⁺ MAer de Philisteen vergaderden alle haer heyr te Aphek. Ende Israel legherde hem tot Ain in Iesreel.

+ A vers 1

2

Ende de Vorsten der Philisteen gingen daer henen met honderden ende met

[p. 115r]

duysenden. Maer Dauid ende sine mannen ghinghen achter nae by Achis.

3

Doen spraken de Vorsten der Philisteen: Wat sullen dese Ebreen? Achis sprac tot hen: En is dat niet Dauid, Sauls knecht des Conincks Israel, die nv by my gheweest is iaer ende dach, ende en hebbe niet aen hem geuonden, sint der tijt dat hy af geuallen is tot nv toe?

4

Maer de Vorsten der Philisteen werden toornich op hem, ende seyden tot hem:^+† Laet den man weder om keeren, ende in zijn plaetse blijuen,^* daer ghy hem ghestelt hebt, op dat hy niet met ons af en treck ten strijde, ende onse Wederpartijder worde inden strijde. Want waer aen mocht hy zijnen Heer bet behaghen doen, dan aende Hoofden deser mannen?

+ B vers 4

† 1.Par. 13.c.19.

* 1.Reg. 17.a.6

5

^† En is hy niet die Dauid, van dien si aende reyen songen: Saul heefter duysent gheslaghen, maer Dauid thien duysent?

† 1.Reg. 18.b.7. 21.d.11. Eccle. 47.a.7

6

Doen riep Achis Dauid ende sprack tot hem: So warachtelijck als de HEEre leeft, Ic houde v redelijck, ende uwen wtganck ende inganck met my int heyr behaecht my wel, ende en hebbe niet archs aen v ghespuert, sint ter tijt dat ghy tot my ghecomen zijt, tot nv toe. Maer ghy en behaecht den Vorsten niet.

7

Dus keert nv wederom, ende gaet henen met vrede, op dat ghy niet qualijck en doet voor de ooghen der Vorsten der Philisteen.

8

Maer Dauid sprack tot Achis: Wat heb ick ghedaen, ende wat hebdy aen uwen knecht ghespuert,⁺ sint der tijt dat ick voor v gheweest ben tot nv toe, dat ick niet en soude comen, ende strijden tegen de vianden mijns Heeren des Conincx?

+ C vers 8

9

Achis antwoorde ende sprack tot Dauid: Ick weet wel. Want ghy behaecht mijnen oogen als een Engel Godts. Mer der Philisteen Vorsten hebben gheseyt: En laet hem niet met ons optrecken inden strijdt.

10

Dus maect v nv morgen vroech op, ende de knechten dijns Heeren die met v gecomen zijn. Ende als ghy v morgen vroech op ghemaect hebt, dattet licht is, soo gaet henen.

11

Alsoo maecte hem Dauid ende sinen mannen vroech op, dat si smorghens wech ghinghen, ende weder inder Philisteen Lant quamen. Maer de Philisteen trocken op nae Iesreel.