Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxviij. Capittel.

¶ Dauid wert een hooftman gheset van Achis, Saul die vraecht om raet vanden waerseggers, Samuel openbaert hem ende straft hem.

1

⁺ ENde het geschiede ter seluer tijt, dat de Philisteen haer heyr vergaderden in eenen strijt te trecken teghen Israel. Ende Achis sprac tot Dauid: Ghy sult weten, dat ghy ende uwe mannen met my wt sult trecken int heyr.

+ A vers 1

2

Dauid sprac tot Achis: Wel aen, ghy sult beuinden wat v knecht doen sal. Achis sprack tot Dauid: Daerom wil ick v tot eenen bewaerder mijns hoofts setten mijn leefdaghe.

3

^* Maer Samuel was ghestoruen, ende alle Israel had rouwe om hem ghedraghen, ende hem begrauen in zijnder stadt Rama:^* Soo had Saul wt den lande verdreuen de waersegghers ende teekenbedieders.

* 1.Reg. 25.a.1.

* Exod. 22.c.18.

4

Doen nv de Philisteen hen vergaderden, ende quamen, ende legherden hen te Sunem, doen vergaderde Saul oock dat gheheele Israel, ende legherden hen tot Gilboa.

5

Maer doen Saul der Philisteen heyr sach, vreesde hy, ende zijn herte versaechde seer,

6

^* Ende hy vraechde raet den HEEre. Maer de HEERE en antwoorde hem niet, noch door droomen, noch door tlicht, noch door Propheten.

* 1.Re. 14.e.37.

7

⁺ Doen sprack Saul tot sinen knechten: Soeckt my een wijf die eenen waersegghenden gheest heeft, op dat ick tot haer gae, ende haer vraghe. Sijne knechten spraken tot hem:^† Siet, tot Endor is een wijf, die heeft eenen waersegghenden gheest.

+ B vers 7

† Leuit. 20.d.27 Deut. 18.b.11. Act. 16.c.16.

8

Ende Saul veranderde zijne cleederen, ende trock ander aen, ende ghinc henen, ende twee mannen met hem, ende quamen byder nacht totten wijue, ende sprack: Lieue, propheteert my door den waersegghende gheest, ende brengt my hier op den ghenen, dien ick v segghe.

9

Dat wijf sprack tot hem: Siet, ghy weet wel wat Saul ghedaen heeft, hoe hy de waersegghers ende teekenbedieders wtgheroeyt heeft vanden lande. Waerom wildy dan mijne siele in dat net leyden, dat ick ghedoodet werde?

10

Maer Saul swoer haer byden HEEre, ende seyde: Soo warachtelijck als ne HEEre leeft: Het en sal v tot gheender misdaet comen.

11

Doen sprac dat wijf: Wien sal ic dan op brenghen? Hy sprack: Brengt my Samuel hier op.

12

⁺ Als nv dat wijf Samuel sach, riep si luyde, ende sprack tot Saul: Waerom hebdy my bedroghen? Ghy zijt Saul.

+ C vers 12

13

Ende de Coninck sprack tot haer: En vreest v niet, wat siet ghy? Dat wijf sprack tot Saul: Ick sie goden opclimmen wt der Aerden.

14

Hy sprack: Hoe is de ghedaente? Sy sprac: Daer coemt een out man op, ende is ghecleet met eenen siden roc. Doen vernam Saul dattet Samuel was, ende neychde hem met sinen aensicht ter Aerden, ende aenbede.

15

^† Maer Samuel sprack tot Saul: Waerom hebdy my onrustich gemaect, dat ghy my hier op laet brenghen? Saul sprack: Ic ben seer benaut. De Philisteen strijden teghen my, ende Godt is van my gheweken, ende en antwoordet my niet, noch door Propheten, noch door droomen. Daerom hebbe ick v doen roepen, dat ghy my wijsen sout, wat ick doen soude.

† Eccle. 46.c.23

16

⁺ Samuel sprack: Wat wildy my vraghen, de wijle dat de HEEre van v geweken, ende v Viant gheworden is?

+ D vers 16

17

De HEEre sal v doen,^* soo hy door my ghesproken heeft, ende sal dat Rijck van uwer hant schueren, ende Dauid uwen naesten gheuen,

* 1.Reg. 15.f.28.

18

Om dat ghy de stemme des HEEren niet ghehoort en hebt, ende de verbolgentheyt zijnder gramschappen niet volbracht en hebt teghen Amalek: Daerom heeft v de HEEre nv sulcx ghedaen.

19

Daer toe sal de HEEre Israel met v oock geuen inder Philisteen hant,^† morghen sult ghy ende uwe sonen met my zijn. Ooc sal de HEEre dat Heyr Israels inder Philisteen hant geuen.

† 1.Reg. 31.b.5.

20

Doen viel Saul terstont ter Aerden, soo lanc als hy was, ende verschricte seer voor de woorden Samuels, alsoo datter gheen cracht in hem meer en was. Want hy en hadde niet ghegheten van allen den dage, ende van alle der nacht.

21

⁺ Ende dat wijf ghinck in tot Saul, ende sach dat hy seer veruaert was, ende seyde tot hem: Siet, v maerte heeft v stemme gehoort, ende heb mijn siele in mijn hant gheset, dat ick uwe woorden ghehoort heb, die ghy tot my seyt:

+ E vers 21

22

So hoort nv oock uwer maerten stemme:^† Ick wil v een bete broots voor setten, dat ghy etet, op dat ghy tot crachten coemt, ende uwer straten gaet.

† Gene. 18.a.5.

23

Maer hy weygherdet ende sprack: Ick en wil niet eten. Doen^† dwongen hem zijn knechten ende dat wijf, dat hy haerder stemmen ghehoor gaf. Ende hy stont op vander Aerden, ende stelde hem opt bedde.

† Noodichden.

24

Maer dat wijf had thuys een ghemest Calf: Doen haeste sy haer, ende sloecht. Ende nam meel ende knedet, ende bieckt onghesuert,

25

Ende brachtet voor Saul, ende voor sine knechten. Ende doen si gheten hadden, stonden si op, ende ghinghen alle dien nacht.