Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvij. Capittel.

¶ Dauid vliet tot Achis den Coninc tot Gath, die gheeft hem Siklag in.

1

⁺ MAer Dauid dachte in zijnder herten: Ick sal der dagen een, Saul in de handen vallen. My en is niet beters dan dat ick ontuluchte inder Philisteen lant, dat Saul ophout van my voorder te soecken in allen palen Israels, soo sal ick sinen handen ontgaen.

+ A vers 1

2

Ende hy^* maecte hem op, ende ghinc ouer metten ses hondert mannen die by hem waren tot Achis den soon Maoch den Coninck tot Gad.

* 1.Reg. 21.d.10 30.b.9.

3

Alsoo bleef Dauid by Achis tot Gath, met sinen mannen, elck met sinen huyse. Dauid oock met sinen twee huysvrouwen, Ahinoam de Iesralitin ende Abigail Nabals wijf, de Carmelitinne.

4

Ende doent Saul gebootschapt wert dat Dauid nae Gath gheulucht ware, so en sochte hy hem niet meer.

5

Ende Dauid sprack tot Achis: Heb ic ghenade voor uwen ooghen geuonden, so laet my een ruymte geuen in een vanden steden op den lande, dat ick daer in woone. Wat sal v knecht in de Coninclijcke stadt by v woonen?

6

Doen ghaf hem Achis in dien daghe Siklag. Daer af is Siklag der Coningen Iuda tot desen dage toe.

7

Maer den tijt die Dauid inder Philisteen landt woonde, is vier maenden.

8

⁺ Maer Dauid trock op met sinen mannen, ende viel int lant der Gessuriten ende Girsiten,^* ende Amalekiten. Want dese waren van outs af de Inwoonders van desen lande, alsmen coemt tot Sur tot aenden lande van Egipten.

+ B vers 8

* 1.Reg. 15.b.8.

9

^† Mer doen Dauid dat lant sloech, so en liet hy man, noch wijf leuen. Ende nam schapen, Runderen, Ezels, Kemelen ende cleederen, ende keerde weder, ende quam tot Achis.

† Deut. 20.c.16.

10

Als dan Achis seyde: En hebdy heden gheenen inual ghedaen? Soo sprack Dauid: Teghen Tzuyden Iuda, ende teghen Tzuyden der Ierahmieliten, ende teghen Tzuyden der Keniten.

[p. 114v]

11

Maer Dauid en liet noch man noch wijf leuende tot Gath comen, ende dacht: Sy mochten teghen ons spreken, ende clappen. Also dede Dauid, ende dat was zijn wijse also langhe als hy inder Philisteen lant woonde.

12

Daerom geloofde Achis Dauid ende dacht: Hy heeft hem stinckende ghemaeckt voor zijn volck Israel: Daerom sal hy altijt mijn knecht zijn.