Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxij. Capittel.

¶ Dauid coemt tot Adullam, zijne vrienden ende broeders comen tot hem, ooc noch ander ontrent vier hondert. Daer nae coemt hy in Moab, Doeg verraet Dauid teghen Saul, daerom wort Ahimelech met sommige ander Priesteren ghedoot.

1

⁺ DAuid ginck van daer, ende ontuluchte inde Speloncke Adullam. Doen dat sine broeders hoorden, ende dat gheheel huys zijns vaders,^* quamen sy derwaerts tot hem af.

+ A vers 1

* Iudic. 11.a.3.

2

Ende alderhande mannen die in noot, ende schult ende van bedroefder herten waren, vergaderden hen tot hem. Ende hy was haer ouerste, also datter^* by vier hondert mannen by hem waren.

* 1.Reg. 23.c.13.

3

Ende Dauid ghinc van daer na Mizpe, inder Moabiten lant, ende sprac totter Moabiten Coninck: Laet mijn vader ende mijn moeder by v wt ende in gaen, tot dat ic verneme, wat Godt met my doen sal.

4

Ende hi lietse voor den Coninc der Moabiten, dat si by hem bleuen, soo langhe als Dauid inde borcht was.

5

Maer de Propheet Gad seyde tot Dauid: En blijft in de borcht niet,^* maer gaet henen ende coemt int lant Iuda. Doen ghinc Dauid wech, ende quam in de bosschagie Hareth.

* Mat. 2.d.20.

[p. 112r]

6

Ende het quam voor Saul, dat Dauid ende de mannen die by hem waren, te voorschijn waren ghecomen.

⁺ Als nv Saul tot Gibea woonde, onder een haghe in Rama, hadde hy zijn spiesse in zijn hant, ende alle sine knechten stonden neffens hem.

+ B vers 6

7

Doen sprac Saul tot sinen knechten, die neffens hem stonden: Hoort ghy kinderen Iemini, sal v ooc de sone Isai alle Ackers ende wijnbergen geuen, ende v alle ouer duysent ende ouer hondert tot ouerste maken?

8

Dat ghy v alle verbonden hebt teghen my,^* ende daer en is niemandt diet mijnen ooren openbaerde:^† Aenghesien dat oock mijn soon een verbont ghemaect heeft metten sone Isai. Daer en is niemandt onder v die het crencke van mijnent wegen, ende mijnen ooren openbare, want mijn sone heeft mijnen knecht tegen mi verwect, dat hy my laghen leyt, so het aenden dach is.

* 4.Reg. 6.c.11

† 1.Re. 18.a.3. 20 b.8. 23.d.18.

9

^* Doe antwoorde Doeg de Edomijt, die neffens den knechten Sauls stont, ende sprack: Ick sach den soon Isai, dat hy tot Nobe quam, tot Ahimelech den soon Achitob:

* 1.Reg. 21.c.7.

10

Die raet vraechde voor hem den HEERE, ende gaf hem spijse, ende dat sweert Goliath des Philisteus.

11

⁺ Doen seynde de Coninck henen, ende dede roepen Ahimelech den Priester, den soon Achitob, ende alle zijns vaders huys, de Priesters die tot Nobe waren. Ende si quamen alle totten Coninck.

+ C vers 11

12

Ende Saul sprac: Hoort ghy soon Achitob. Hi sprack: Hier ben ick mijn Heere.

13

Ende Saul sprac tot hem: Waerom hebdy een verbont teghen my ghemaect, ghy, ende de sone Isai, dat ghy hem broot ende tsweert ghegheuen hebt, ende Gode voor hem raets gheuraecht hebt, dat ghy hem sout verwecken dat hy my laghen soude legghen, soo het aenden dach is?

14

Ahimelech antwoorde den Coninck, ende sprack: Ende wie is onder uwe knechten, als Dauid, die ghetrouwe is, ende des Conincx Swagher, ende gaet in dijnre gehoorsaemheyt, ende is heerlijc gehouden in uwen huyse?

15

Heb ick dan heden eerst begost Godt voor hem raet te vraghen? Dat sy verre van my. De Coninc en legge sinen knecht sulcx niet op, in alle mijns Vaders huys. Want v knecht en heeft van allen desen niet geweten, noch cleyn noch groot.

16

Maer de Coninck sprack: Ahimelech, ghy moet den doot steruen, ghy, ende alle ws Vaders huys.

17

Ende de Coninck sprack tot sinen artsiers, die neffens hem stonden: Keert v, ende doodet des HEEren Priesters, want hare handt is oock met Dauid. Ende doen si wisten dat hy vluchte, en hebben zijt my niet gheopenbaert.⁺ Maer de knechten des Conincx en wilden haer handen niet aen de Priesters des HEEren slaen, om haer te verslaen.

+ D vers 17

18

Doen sprack de Coninck tot Doeg: Keert v ghy,^* ende verslaet de Priesters. Doeg de Edomijt keerde hem, ende versloech de Priesters, alsoo dat op dien dach storuen vijfentachentich mannen die lijnen lijfrocken droegen.

* 1.Reg. 2.g.33. 2.Reg. 21.a.1.

19

Ende de stadt der Priesteren Nobe, sloech hy metter scerpten des sweerts, beyde mannen ende vrouwen, kinderen ende suyghelinghen, Ossen ende Ezelen, ende Schapen.

20

Maer een soon Ahimelech, des soons Achitob die hiet Abiathar, ontliep, ende vluchte Dauid nae,

21

Ende vercondichde hem, dat Saul de Priesters des HEEren ghedoot hadde.

22

Mer Dauid sprac tot Abiathar: Ic wistet wel in dien dage, doen de Edomijt Doeg daer was, dat hijt Saul soude bootschappen. Ic ben schuldich aen alle de sielen des huys ws vaders.

23

Blijft by my, ende en vreest niet. Wie na mijn leuen staet, die sal ooc na v leuen staen, ende sult met my behouden worden.