Den Bibel, Inhoudende dat Oude ende Nieuwe Testament (Biestkensbijbel)

¶ Dat .xix. Capittel.

¶ Saul ghebiet datmen Dauidt soude dooden, Maer Ionathas waerschout hem. Saul nam voor hem Danid te doorsteken, Dauid vliedt, de Coninck beueelt datmen hem brenge. Maer hy wort door Michal zijn wijf verlost.

1

⁺ MAer Saul sprack met zijnen soon Ionathan, ende met alle zijne knechten, dat sy Dauid souden dooden.^† Maer Ionathan Sauls Soon hadde Dauid seer lief,

+ A vers 1

† 1.Reg. 18.a.3 23.c.17.

2

Ende vercondichde hem dat, ende seyde: Mijn vader Saul leydt daer op toe, dat hy v doode. Soo wacht v nv smorgens, ende blijft verborghen, ende bercht v.

3

Maer ick wil wtgaen, ende neffens mijnen vader staen, op den velde daer ghy zijt, ende van v met mijnen vader spreken, ende wat ick sie, dat wil ick v te kennen gheuen.

4

Ende Ionathan sprack dat beste van Dauid, met zijnen vader Saul. Ende sprac tot hem: De Coninc en besondighe hem niet aen zijnen knecht Dauid, want hy en heeft gheen sonde teghen v ghedaen, ende zijn doen is v seer profijtelijc.

5

^† Ende hy heeft zijn leuen in zijn handt gheset, ende sloech den Philisteum, ende de HEEre dede eenen grooten^* Heyl den gheheelen Israel, dat hebdy ghesien, ende v daer af verblijt.⁺ Waerom wildy v dan aen ontschuldich bloedt besondighen, dat ghy Dauid sonder oorsake wilt dooden:

† 1.Re. 17.f.48.

* Victorie.

+ B vers 5

6

Doen hoorde Saul de stemme Ionathan, ende swoer: So waerachtelijck als de HEEre leeft, hy en sal niet steruen.

7

Doen riep Ionathan Dauid, ende seyde hem alle dese woorden, ende bracht hem tot Saul, dat hy voor hem was als te vooren.

8

Maer daer stont weder eenen strijt op. Ende Dauid trock wt, ende street teghen de Philisteen, ende dede eenen grooten slach, also dat sy voor hem vluchten.

9

^† Maer den boosen geest vanden HEEre quam ouer Saul, ende hy sat in zijnen huyse, ende hadde een spiese in zijn hant. Maer Dauid speelde opten snaerspele metter handt,

† 1.Reg. 16.c.14 18.c.10.

10

Ende Saul leyde toe, om Dauid metter spiesen aenden wandt te spitten: Maer hy weec van Saul, ende de spiese vlooch in de wandt. Maer Dauid vluchte, ende ontquam den seluen nacht.

11

⁺ Maer Saul seynde boden henen tot Dauids huys, dat sy hem souden bewaren ende smorgens dooden. Dat vercondichde den Dauid zijn wijf Michal, ende sprac: Ist dat ghy desen nacht v siele niet en verlost, so moet ghy morgen steruen.

+ C vers 11

12

^† Doen liet hem Michal doort venster neder, dat hy wech ghinck, ontuluchte ende ontquam.

† Iosu. 2.c.15. Acto. 9.c.25.

13

Ende Michal nam een Beeldt, ende leyde dat int bedde, ende leyde een gheyten vel aen zijnen hoofde, ende bedecktet met cleederen.

14

Doen seynde Saul boden henen, dat sy Dauid souden halen. Maer sy seyde: Hy is sieck.

15

Maer Saul seynde boden henen om Dauid te besien, ende sprac: Brengt hem op tot my metten bedde, dat hy ghedoot werde.

16

Doe nv de boden quamen, siet, doen lach dat Beeldt int bedde, ende een gheyten vel aen zijn hooft.

17

Doen sprac Saul tot Michal: Waerom hebdy my bedroghen, ende mijnen viandt laten gaen, dat hy ontcomen soude? Michal sprack tot Saul: Hy seyde tot my: Laet my gaen, oft ick doode v.

18

Maer Dauid ontuluchte ende ontliep, ende quam tot Samuel te Ramath, ende gaf hem te kennen, al wat hem Saul gedaen hadde. Ende hy ghinck wech met Samuel, ende bleuen tot Naioth.

19

⁺ Ende het wert Saul te kennen ghegheuen: Siet, Dauid is te Naioth in Rama.

+ D vers 19

20

Doen seynde Saul boden henen, dat sy Dauid souden halen. Ende sy saghen twee Choren Propheten propheteren, ende Samuel was haer opsiender.^† Doen quam de gheest Godts op de boden Sauls, dat sy oock propheteerden.

† Ioan. 7.d.32.

21

Doen dat Saul ghebootschapt werdt, seynde hy ander boden henen, die propheteerden oock. Doen seynde hy die derde boden henen, die propheteerden oock.

22

Doen ghinc hy selue oock na Rama: Ende doen hy totten grooten Put quam, die tot Secu is, vraechde hy ende sprac: Waer is Samuel ende Dauid? Doen wert hem gheseyt: Siet, tot Naioth in Rama.

23

Ende hy ghinck daer selfs henen na Naioth in Rama. Ende de gheest Gods quam oock op hem, ende ghinck ende propheteerde, tot dat hy quam tot Naioth in Rama.

24

Ende hy trock ooc zijne cleederen wt, ende propheteerde ooc voor Samuel, ende viel bloot neder den gheheelen dach, ende den geheelen nacht.^† Daer wt seytmen: Is Saul ooc onder de Propheten?

† 1.Reg. 10.c.12.