Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Samuel is droeuich om Sauls wille, maer de HEEre hiet hem dat hy aflate te trueren, ende dat hy Dauid Isais sone, tot eenen Coninc soude saluen. Den geest des HEEren verlaet Saul, ende den boosen gheest regeert hem, Dauid wordt gheroepen, dat hy metter Herpen verlichtinghe make.

1

⁺ ENde de HEEre sprac tot Samuel: Hoe langhe draecht ghy rouwe om Saul, die ick verworpen heb, dat hi gheen Coninck en sy ouer Israel? Vullet uwen hoorne met olie, ende gaet henen, Ick wil v henen seynden totten Bethlemite Isai: Want onder sine sonen, heb ick my eenen Coninck^* voorsien.

+ A vers 1

* Wtghesien.

2

Maer Samuel sprack: Hoe sal ic henen gaen? Saul salt vernemen ende my dooden. De HEEre sprack: Neemt een Calf vanden Runderen tot v, ende spreect: Ick ben gecomen, om den HEEre te offeren.

3

Ende ghy sult Isai totten offer nooden, so wil ick v wijsen, wat ghy doen sult, dat ghy my dien saluet, dien ick v segghen sal.

4

Samuel dede soo hem de HEERE gheseyt hadde, ende quam tot Bethlehem. Doen ontsetten hen de Ouders der stadt, ende ghinghen hem te ghemoete, ende spraken:^† Is uwe toecoemst ooc vreedtsaem?

† 3.Reg. 2.b.13.

5

Hy seyde: Ia, Ick ben ghecomen, om

[p. 109r]

den HEEre te offeren.^† Heylighet v, ende coemt met my totten offer. Ende hy heylichde Isai ende zijne Sonen, ende noodese totten Offer.

† Num. 11.d.18. Iosue. 3.b.5. 7.c.13. Leuit. 20.a.7.

6

⁺ Als sy nv in quamen, sach hy den Eliab aen, ende dachte: Oft voor den HEEre zijn ghesalfde sy?

+ B vers 6

7

Maer de HEEre sprack tot Samuel: En aensiet zijne ghedaente niet, noch de hoocheyt zijns persoons, ick heb hem verworpen, want ten gaet niet toe als een mensch siet. Een mensch siet wat voor oogen is:^* Maer de HEEre siet dat herte aen.

* Iere. 17.b.10. Psal. 7.c.10.

8

Doen riep Isai den AbiNadab, ende liet hem voor Samuel voorby gaen. Ende hy sprac: Desen en heeft de HEEre ooc niet vercoren.

9

Doen liet Isai Samma voorby gaen. Maer hy sprack: Desen en heeft de HEEre ooc niet vercoren.

10

Doen liet Isai zijn seuen sonen voor Samuel voorby gaen. Maer Samuel sprack tot Isai: De HEEre en heeft wt dien geen vercoren.

11

⁺ Ende Samuel sprack tot Isai: Sijn dat de Ionghers alle? Maer hy sprack: De cleynste isser noch ouer, ende siet, hy huet de schapen. Doen sprac Samuel tot Isai:^† Seynt henen, ende laet hem halen,^* want wy en sullen niet sitten, tot dat hi hier en coemt.

+ C vers 11

† 2.Reg. 7.b.8.

* Gen. 24.e.33

12

Doen seynde hy henen, ende liet hem halen. Ende hy was bruynachtich,^* met schoonen ooghen, ende van goeder ghedaenten. Ende de HEEre sprack: Op, ende salft hem, want dit ist.

* Gene. 39.a.6.

13

^† Doen nam Samuel sinen^* olye horen, ende salfde hem, midden onder sine broederen. Ende den gheest des HEEren wert veerdich ouer Dauid, van dien dage aen, ende voort. Maer Samuel maecte hem op, ende ginck nae Rama.

† Psal. 78.a.7. Act. 13.c.22.

* 1.Reg. 10.a.1

14

Maer den geest des HEEren weeck van Saul,^* ende eenen boosen gheest vanden HEEre, maecte hem seer ongerust.

* 1.Reg. 19.b.9.

15

Doen spraken de knechten Sauls tot hem: Siet, eenen boosen gheest van Godt maect v seer ongerust.

16

Onse HEEre segghe sine knechten die voor hem staen, dat si eenen man soecken die opter Herpen wel spelen can, op dat hy, als die boose gheest Gods ouer v coemt, met zijnder hant spele, dattet beter met v worde.

17

Doen sprac Saul tot sinen knechten: Siet na eenen man, die goet sy op snaren spel, ende brengt hem tot my.

18

⁺ Doen antwoorde der knapen een, ende sprack: Siet, ick heb ghesien eenen soon Isai, des Bethlehemiten, die can wel op snaren spelen, een rustich man ende strijtbaer, ende verstandich in saken,^* ende scoon, ende de HEEre is met hem.

+ D vers 18

* Gene. 39.b.6.

19

Doen sant Saul boden tot Isai, ende dede hem segghen: Seynt uwen soon Dauid tot my, die by de Schapen is.

20

Doen nam Isai eenen Ezel met broot, ende een flessche wijns, ende een bocxken, ende seyndet Saul door sinen soon Dauid.

21

Also quam Dauid tot Saul, ende diende voor hem, ende hy creech hem seer lief: Ende hy werdt zijn Wapendragher.

22

Ende Saul sant tot Isai, ende dede hem seggen: Laet Dauid voor my blijuen, want hy heeft ghenade gheuonden voor mijnen ooghen.

23

Als nv den gheest Godts ouer Saul quam, so nam Dauid de Herpe, ende speelde met zijnder hant: Soo vermaecte hem Saul, ende het werdt beter met hem, ende de boose gheest weeck van hem.