Den Bibel, Inhoudende dat Oude ende Nieuwe Testament (Biestkensbijbel)

¶ Dat .xv. Capittel.

¶ Samuel beueelt dat Saul soude Amalec verslaen ende verbannen. Saul is onghehoorsaem, daerom wordt hy vanden rijcke verstooten.

1

⁺ MAer Samuel sprac tot Saul:^† De HEEre heeft my herwaerts gheseynt, dat ick v tot eenen Coninck soude saluen, ouer zijn volck Israel. Dus hoort nv de stemme der woorden des HEEren.

+ A vers 1

† 1.Reg. 9.c.15.

2

Dus spreect de HEERE Sebaoth:^† Ick heb bedacht wat Amelek Israel dede, ende hoe hy hem den wech verleyde, doen hy wt Egipten trock. Dus treckt nv henen, ende slaet de Amalekiten,

† Exod. 17.c.8. Nu. 24.d.20. Deut. 25.c.19.

3

Ende verbantse, met al dat si hebben. En spaert hen niet, maer doot beyde man ende wijf, kinderen, ende suyghelinghen, ossen ende schapen, kemelen ende ezelen.

4

Saul liet alsulcx voor tvolck comen, ende hy teldese tot Telaim, twee hondert duysent voet volcx,^† ende thien duysent Mannen wt Iuda.

† 1.Reg. 11.c.8. 13.d.15.

5

⁺ Ende doen Saul quam totter Amalekiten stadt, legherde hy een laghe aen de beke.

+ B vers 5

6

Ende dede den Keniters seggen: Gaet wech, wijct, ende trect af vanden Amalekiten, dat ick v niet met hen en verstroye.^† Want ghi deet ontfermherticheydt aen allen kinderen Israels, doen si wt Egipten trocken. Alsoo maeckten hen de Keniten vanden Amalekiten.

† Exod. 18. Num. 10.d.29 Iudic. 1.d.16.

7

Doen sloech Saul de Amalekiten van Heuila aen, tot Sur toe, die voor Egipten leget.

8

Ende greep Agag der Amalekiten Coninc leuende,^† ende alle tvolc verbande hy met des sweerts scerpte.

† 2.Reg. 17.b.8

9

Mer Saul ende tvolc spaerden Agag, ende wat goede Schapen ende Runders, ende ghemestet was, ende de Lammeren, ende al wat goet was, ende en wildens niet verbannen: Maer wat snoode was, ende niet en dochte, dat verbanden sy.

[p. 108v]

10

⁺ Doen geschiede des HEEren woort tot Samuel, ende sprac:

+ C vers 10

11

^† Het berouwet my, dat ick Saul tot eenen Coninck ghemaect hebbe. Want hy heeft hem achter my af ghekeert, ende mijne woorden niet veruult. Daerom wert Samuel gram ende riep den geheelen nacht totten HEEre.

† Gene. 6.a.6. 1.Reg. 15.f.29. 2.Re. 24.d.16

12

Ende Samuel maecte hem vroech op, dat hy Saul smorghens ontmoeten soude. Ende hem wert gebootschapt, dat Saul te Carmel ghecomen ware,^* ende had hem een litteeken opgherecht, ende was daer om ghetrocken, ende tot Gilgal afghecomen.

* Deut. 17.a.5.

13

Als nv Samuel tot Saul quam, sprac Saul tot hem: Gheseghent zijt ghy den HEEre, Ick heb des HEEren woort veruult.

14

Samuel antwoorde: Wat is dan dat voor een bleten der schapen in mijnen ooren, ende een loeyen der Runderen die ick hoore?

15

⁺ Saul sprack: Vanden Amalekiten hebben syse gebracht. Want dat volck spaerde de beste Schapen, ende runders, om des offers wille des HEEren ws Godts: Dat ander hebben wy verbannen.

+ D vers 15

16

Maer Samuel antwoorde Saul: Laet v ghesegghen wat de HEEre met my ghesproken heeft desen nacht. Hi seyde: Segghet op.

17

Samuel sprac: En ist niet also,^* doen ghy cleyn waert voor uwen ooghen, soo wert ghy dat hooft onder de stammen Israels? Ende de HEEre salfde v tot eenen Coninck ouer Israel?

* 1.Reg. 9.c.21. 10.a.1.

18

Ende de HEEre sant v opten wech, ende sprac: Trect henen, ende verbant de sondaers, de Amalekiten, ende strijt tegen hen, tot dat ghyse te niete doet.

19

Waerom en hebdy des HEEren stemme niet gehoort? Maer hebt v totten roof ghekeert, ende qualijc gehandelt voor de oogen des HEEren?

20

⁺ Saul antwoorde Samuel: Ick heb doch de stemme des HEEren gehoort, ende ben henen ghetrocken den wech die my de HEEre seynde, Ende heb Agag der Amalekiten Coninck ghebracht, ende de Amalekiten verbannen.

+ E vers 20

21

Maer dat volck heeft vanden roof ghenomen, schapen ende Runderen, dat beste vanden verbanden, om den HEEre uwen Gode te offeren in Gilgal.

22

Maer Samuel sprac: Meynt ghi, dat de HEEre lust heeft aen offer ende Brantoffer, als aen ghehoorsaemheyt der stemmen des HEEren? Siet^* gehoorsaemheyt is beter dan offerande, ende opmercken is beter dan dat vet vanden rammen.

* Eccle. 4.c.17.

23

Want ongehoorsaemheyt is een sonde^† der toouerijen: Ende wederspannicheyt, is afgoderije ende Afgoden dienst. Om dat ghy dan des HEEren woordt verworpen hebt, soo heeft hy v ooc verworpen, dat ghy niet en muecht Coninck zijn.

† Exod. 22.c.18. Deut. 18.b.10.

24

⁺ Doen sprack Saul tot Samuel:^† Ick heb ghesondicht, dat ic des HEEren beuel, ende uwe woorden ouerghetreden heb: Want ick vreesde dat volck ende hoorde haer stemme. Ende nv vergheeft my de sonde,

+ F vers 24

† Exod. 9.f.27. 2.Reg. 12.c.13.

25

Ende keert met my om, dat ic den HEEre aenbede.

26

Samuel sprack tot Saul: Ick en wil niet met v om keeren,^* want ghy hebt des HEEren woordt verworpen: Ende de HEEre heeft v oock verworpen dat ghy geen Coninc en sout zijn ouer Israel.

* 3.Reg. 11.b.11.

27

Ende als hem Samuel om keerde, dat hy wech soude gaen,^† soo greep hy hem, by een slippe zijns Rocx, ende si schuerde.

† 3.Reg. 11.e.30.

28

Doen sprac Samuel tot hem:^† De HEEre heeft dat Conincrijck Israels heden van v gheschuert, ende uwen naesten ghegeuen, die beter is dan ghy.

† 1.Re. 28.d.17.

29

Oock en liecht de^† Helt in Israel niet, ende het en berout hem niet.^* Want hi en is niet een mensche, dat hem yet berouwen soude.

† Triumpheerder Verwinner.

* 1.Reg. 15.c.11

30

⁺ Maer hy sprack: Ick heb gesondicht. Maer eert mi nv voor de Ouders mijns volcx, ende voor Israel, ende keert met my om, dat ick den HEEre uwen God aenbede.

+ G vers 30

31

Alsoo keerde Samuel om, ende volchde Saul na, dat Saul den HEEre soude aenbeden.

32

Maer Samuel sprac: Laet herwaert tot mi brengen Agag der Amalekiten Coninck. Ende Agag ginc getroost tot hem, ende sprack: Also moetmen des doots bitterheyt verdrijuen.

33

Samuel sprack:^† Ghelijck als dijn sweert de vrouwen haerder kinderen berooft heeft, alsoo sal ooc v moeder sonder kinder zijn onder de Wijuen.^* Aldus hieu Samuel den Agag in stucken, voor den HEEre in Gilgal.

† Exod. 17.c.8. Nu. 14.g.45.

* 3.Re. 18.e.40.

34

^† Ende Samuel ginc na Ramath: Mer Saul trock opwaerts nae sinen huyse, te Gibeath Saul.

† 1.Reg. 7.d.17.

35

^‡ Ende Samuel en sach Saul voort meer niet, tot aenden daghe zijns doots. Mer nochtans droech Samuel rouwe om Saul, om dattet den HEEre berouwet hadde, dat hy Saul tot eenen Coninc ouer Israel gemaect had.

‡ 1.Reg. 28.c.15.