Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ De Philisteen maecten haren Legher teghen de Israelijten in Michmas, Saul is onghehoorsaem den HEEre, ende daerom werdt hy van Samuel ghestraft.

1

⁺ SAul was een Iaer Coninc geweest, ende doen hy twee Iaer ouer Israel gheregeert hadde,

+ A vers 1

2

Vercoos hy hem drie duysent mannen wt Israel. Twee duysent waren met Saul te Michas, ende op dat gheberchte BethEl: Ende een duysent met Ionathan tot Gibea BenIamin. Maer dat ander volck liet hy gaen, eenen yeghelijcken in zijn Hutte.

3

Maer Ionathan sloech de Philisteen in haren^† Leger die tot Gibea was: Dat quam voor de Philisteen. Ende Saul liet de Basuynen blasen inden gheheele lande, ende seggen: Dat laet de Ebreen hooren.

† 1.Reg. 10.b.5.

4

Ende alle Israel hoorde segghen: Saul heeft der Philisteen Leger gheslaghen, want Israel stanck voor de Philisteen. Ende alle dat volck riep Saul na, nae Gilgal.

5

⁺ Doen vergaderden hen de Philisteen, om te strijden teghen Israel, dertich duysent waghens, ses duysent Ruyters, ende ander volck, so veel alst sant aenden Oeuer vander zee: Ende trocken opwaerts, ende legerden hen tot Michmas, tegent Oosten, voor BethAuen.

+ B vers 5

6

Doen dat de mannen Israels saghen, dat sy in noot waren (want den volcke was bange) verstaken si hen in de^† Speloncken, ende Cuylen, ende steenrootsen, ende Holen ende putten.

† 1.Re. 14.b.11.c.22.

7

Maer de Ebreen gingen ouer de Iordane, int landt Gad ende Gilead. Maer Saul was noch tot Gilgal, ende alle dat volc wert achter hem versaecht.

8

^† Doen toefde hy seuen dagen, tot dier tijt, van Samuel ghesedt. Ende doen Samuel niet en quam tot Gilgal, verstroyde hem dat volck van hem.

† 1.Reg. 10.b.8.

9

Doen sprack Saul, brengt my herwaerts Brantoffer ende Dancoffer. Ende hy offerde Brantoffer.

10

Mer als hy dat Brantoffer volbracht hadde, siet, doen quam Samuel. Doen ghinc Saul wt, hem te gemoet, om hem te seghenen.

11

⁺ Maer Samuel sprac: Wat hebdy gemaect? Saul antwoorde: Ick sach dattet volck hem van my verstroyde, ende ghy en quaemt niet ter rechter tijt, ende de Philisteen waren vergadert tot Michmas.

+ C vers 11

12

Doen sprack ick: Nv sullen de Philisteen tot my af comen tot Gilgal, ende ick en heb dat aensicht des HEEren niet ghebeden. Doen waechde ict, ende offerde Brantoffer.

13

Maer Samuel sprack tot Saul: Ghy hebt sottelijck ghedaen, ende en hebt dat ghebot des HEEren ws Gods niet gehouden, dat hy v gheboden heeft. Want hy soude v rijck beuesticht hebben ouer Israel, voorder ende voorder.

14

Maer nv en sal v rijc niet bestaen:^* De HEEre heeft hem eenen Man wtghesocht, na zijnder herten, dien heeft de HEEre geboden, Vorste te zijn ouer zijn volc: Want ghy en hebt des HEEren ghebodt niet ghehouden.

* 1.Reg. 16.c.12. Acto. 13.d.22.

15

Ende Samuel maecte hem op, ende ghinck van Gilgal opwaerts na Gibea BenIamin.

^† Maer Saul telde dat volck dat by hem was, by ses hondert Mannen.

† 1.Reg. 11.c.8. 15.a.4.

16

⁺ Maer Saul ende zijn soon Ionathan, ende tvolck dat by hem was, bleuen opten cleynen berch BenIamin. Maer de Philisteen hadden hen gheleghert tot Michmas.

+ D vers 16

17

Ende wt den Legher der Philisteen trocken drie hoopen om dat Lant te verderuen. Den eenen keerde hem op de strate nae Ophra, in het Lant Saul.

18

Den anderen keerde hem om op de strate BethHoron: Den derden keerde hem op de strate, die daer gaet na dat dal Seboim, aen de woestijne.

19

Maer daer en wert gheen Smit gheuonden int geheele Lant van Israel. Want de Philisteen dachten: De Ebreen mochten Sweerden ende Spiessen maken.

20

Ende alle Israel moeste neder trecken totten Philisteen, als yemant een ploechyser, houweel, byle, oft seysen hadden te scherpen,

21

Oft wat aen de seysenen, houweelen, gaffelen, ende bijlen, af gearbeydet was, ende de oorden bot geworden waren.

22

Als nv den strijdtdach quam, soo en werter gheen sweert, noch spiesse geuonden in alle des volcx hant, dat met Saul ende Ionathan was, behaluen Saul ende sinen soon hadden wapenen.

23

Ende der Philisteen Legher troc wt voor Michmas ouer.