Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ Samuel bewijst onbehagelijcheyt ende ontschult voor alle den volcke, hy vermaent haer de weldaet ende straffinge Gods, ende dat sy nieuwers van hem en souden wijcken.

1

⁺ DOen sprac Samuel tot alle Israel: Siet^* ick hebbe uwe stemme ghehoort in alle dat ghy gheseyt hebt, ende hebbe eenen Coninck ouer v ghemaect:

+ A vers 1

* Iosue. 8.d.21

2

Ende nv siet, daer treckt uwe Coninck voor v henen.^* Maer ick ben oudt ende grijsch gheworden, ende mijne Sonen zijn by v, ende ick ben voor v henen ghegaen, van mijnder Ioncheyt aen, tot op desen dach.

* 1.Reg. 8.a.5

3

^† Siet, hier ben ick, antwoordt teghen my, voor den HEERE, ende zijnen Ghesalfden. Oft ick yemandts Osch oft Esel ghenomen hebbe? Oft ick yemanden gheweldt oft onrecht hebbe ghedaen? Oft ick yemanden verdruckt hebbe? Oft ick van yemandts handt een gheschenck gheno-men hebbe, ende my de oogen laten verblinden? Soo wil ickt v weder gheuen.

† Eccl. 46.c.22. Acto. 20.f.33.

4

Sy seyden: Ghy en hebt ons gheen ghewelt, noch onrecht ghedaen, noch verdruckt, noch van yemants hant yet ghenomen.

5

Hy sprack tot hen: De HEERE sy een ghetuyghe tegehìhen v ende zijn Ghesalfde in desen daghe, dat ghy niet in mijnder handt gheuonden en hebt.

Sy seyden: Ia, Sy sullen ghetuyghen zijn.

6

⁺ Ende Samuel sprack totten volcke: Ia, De HEEre, die Mose ende Aaron ghemaeckt, ende uwe Vaders wt den lande van Egipten gheleyt heeft.

+ B vers 6

7

Soo treedt nv herwaerts, dat ick met v rechte voor den HEEre ouer alle weldaet des HEEren, die hy aen v, ende uwen Vaderen ghedaen heeft.

8

^* Als Iacob in Egipten ghecomen was,^† doen riepen uwe Vaderen totten HEEre. Ende hy sandt Mose ende Aaron, dat sy uwe Vaderen wt Egipten souden leyden, ende lietse in dese plaetse woonen.

* Gen. 46.a.1

† Exo. 2.d.24 3.b.7.

9

Maer doen sy des HEEren haers Godts vergaten^* vercocht hijse onder de macht Sissera des hooftmans tot Hazor,^† ende onder de macht der Philisteen^* ende onder de macht des Conincx der Moabiten, die streden teghen hen.

* Iud. 4.a.2.

† Iudi. 13.a.1.

* Iud. 3.b.12.

10

Ende sy riepen weder totten HEEre, ende spraken: Wy hebben gesondicht, dat wy den HEEre verlaten hebben, ende Baalim ende Astharoth ghedient. Maer verlost ons nv vander hant onser Vianden, so willen wy v dienen.

11

Doen sandt de HEEre^† Ierubaal, Bedam, Iephthah^* ende Samuel, ende verloste v rontom van uwer Vianden handen, ende liet v seker woonen.

† Iudi. 6.c.14. 11.a.1. 13.d.24

* 1.Reg. 7.a.3

12

Maer doen ghy saecht, dat Nahas de Coninck der kinderen Ammon, tegen v quam,^† seyt ghy tot my: Niet ghy, maer een Coninc sal ouer ons Heerschen. Hoe wel nochtans de HEEre uwe God, uwe Coninck was.

† 1.Reg. 8.a.5

13

⁺ Nv, daer hebt ghy uwen Coninck, dien ghy vercoren ende ghebeden hebt. Want siet, de HEEre heeft eenen Coninck ouer v ghesedt.

+ C vers 13

14

Ist dat ghy nv den HEEre vreest ende hem dient, ende zijne stemme hoort, ende den mont des HEEren niet ongehoorsaem en zijt, so suldy beyde, ghy ende uwe Coninck, die ouer v heerschet, den HEEre uwen God volghen.

15

Maer ist dat ghy des HEEren stemme niet en hoort, maer zijnen monde onghehoorsaem zijt, so sal de hant des HEEren teghen v, ende teghen uwe Vaders zijn.

16

Oock tredet nv herwaerts, ende siet dat groote dinck, dat de HEEre voor uwen ooghen doen sal.

17

En ist nv niet der terwe oogst? Maer ic wil den HEEre aenroepen, dat hy sal laten donderen ende reghenen, dat ghy onderuinden ende sien sult, dat groot quaet, dat ghi voor des HEEren ooghen gedaen hebt, dat ghy v eenen Coninc gebeden hebt.

18

^† Ende doen Samuel den HEEre aenriep, liet de HEEre op den seluen dach

† 3.Reg. 18.e.38.

[p. 107r]

donderen ende reghenen. Doen vreesde alle dat volck den HEEre, ende Samuel seere,

19

⁺ Ende spraken alle tot Samuel: Bidt den HEEre uwen Godt, voor uwen knechten, dat wy niet en steruen. Want bouen alle onse sonden, hebben wi oock dat quaet gedaen, dat wy ons eenen Coninck begheert hebben.

+ D vers 19

20

Maer Samuel sprack totten volcke: En vreest niet, Ghy hebt (tis waer) dat quaet al ghedaen, nochtans en wijct niet achter vanden HEEre af.^† Maer dient den HEERE van gheheelder herten,

† Deut. 10.c.12.

21

Ende en wijckt nae de ydelheyt niet, want het en^† voordert v niet, ende ten can v niet verlossen, want het een ydel dinck is.

† Baet.

22

^‡ Maer de HEEre en verlaet zijn volc niet, om zijns grooten Naems wille, want de HEEre heeft v begost te maken, hem seluen tot eenen volcke.

‡ Exod. 34.b.9. Deut. 9.e.29. Iosue. 7.b.9.

23

Maer het sy oock verre van my, my alsoo aen den HEEre te besondighen, dat ick af soude laten voor v te bidden, ende v te leeren den goeden ende rechten wech.

24

Vreest slechs den HEEre, ende dient hem ghetrouwelijck van gheheelder herten, want ghy hebt gesien hoe grooten dinck hy met v doet.

25

Maer ist, dat ghy qualijck handelt, so suldy beyde, ghy, ende uwe Coninc verloren zijn.