Den Bibel, Inhoudende dat Oude ende Nieuwe Testament (Biestkensbijbel)

¶ Dat .xi. Capittel.

¶ Iabes wert van Nahas den Amoniter beleyt, maer Saul ontsettet ende verlostet.

1

⁺ MAer Nahas de^* Ammonite troc opwaerts, ende belegherde Iabes in Gilead, ende alle de mannen tot Iabes spraken tot Nahas: Maeckt een verbondt met ons, soo willen wy v dienen.

+ A vers 1

* Iudi. 10.d.17

2

Maer Nahas de Ammonite, antwoorde hen: Daer in wil ick met v een verbondt maken, dat ick v allen dat rechter ooghe wt steke, ende make v te schanden onder alle Israel.

3

Doen spraken tot hem alle de Ouders tot Iabes: Gheeft ons seuen daghen, dat wy Boden seynden in alle Palen Israels. En isser dan niemandt die ons bescherme, so willen wy tot v wtgaen.

4

⁺ Doen quamen de boden tot Gibea te Saul, ende spraken sulcx voor de ooren des volcks. Doen hief alle tvolck zijn stemme op ende weende:

+ B vers 4

5

Ende siet, doen quam Saul vanden velde, achter de Runderen, ende sprack: Wat is den volcke dattet weent? Doen vertelden sy hem de saken der mannen van Iabes:

[p. 106v]

6

^† Doen werdt den geest Gods veerdich op hem, als hy sulcke woorden hoorde, ende zijn toornicheyt vergramde seer,

† 1.Re. 10.c.10.

7

Ende nam een paer Ossen,^* ende hieuse in stucken, ende seyndese in alle palen Israels, door de boden, ende dede seggen: Wie niet wt en treckt Saul ende Samuel na, diens Runders salmen also doen.

* Iudi. 19.g.29.

8

⁺ Doen viel de vreese des HEEren op tvolck, dat sy wt trocken als een eenich man.^* Ende men maeckte de ordinancie te Basek, ende der kinderen Israels waren drie hondert mael duysent mannen, ende der kinderen Iuda dertich duysent,

+ C vers 8

* 1.Reg. 13.d.15 15.a.4.

9

Ende sy seyden den boden die daer ghecomen waren: Aldus segt den mannen tot Iabes Gilead: Morghen sal v hulpe gheschieden, als de Sonne beghint heet te schijnen. Doen de boden quamen ende vercondichden dat den mannen tot Iabes, doen werden sy blijde.

10

Ende de mannen Iabes seyden: Morghen willen wy tot v wt gaen, dat ghy ons doet, al wat v behaecht.

11

Ende des anderen morghens^* ordineerde Saul dat volck in drie deelen, ende quamen inden Legher, aen de Morghen wake, ende sloech de Amoniten, tot dat den dach heet werdt.⁺ Maer de ouerbleuene, die werden also verstroyt, dat haerder niet twee by malcanderen en bleuen.

* Iudic. 7.e.16. 2.Reg. 18.a.1.

+ D vers 11

12

Doen sprack dat volck tot Samuel: Wie zijn sy, die daer seyden:^† Soude Saul ouer ons heerschen? Gheeft de mannen herwaerts dat wyse dooden.

† 1.Reg. 10.e.27

13

Maer Saul seyde: Niemant en sal op desen dach steruen, want de HEERE heeft heden^† Heyl ghegheuen in Israel.

† Victorie.

14

Samuel sprack totten volcke: Coemt, laet ons na Gilgal gaen, ende dat Conincrijcke aldaer vernieuwen.

15

Doen ghinc alle dat volck na Gilgal, ende maecten Saul aldaer tot eenen Coninc voor den HEERE tot Gilgal, ende offerden Danckoffer voor den HEERE. Ende Saul met alle den mannen Israels, verblijden hen aldaer te mael seer.