Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Samuel saluet Saul tot eenen Coninck, hy propheteert oft verseghelt hem, dwelcke hem gemoete, Samuel roept dat volck, ende gheuet haer den Coninck.

1

⁺ DOen nam Samuel een^* olieglas, ende goot op zijn hooft, ende custe hem, ende seyde:^† Siet ghy wel dat v de HEERE tot eenen Vorst ouer^‡ zijn erfdeel ghesalft heeft?

+ A vers 1

* 1.Reg. 16.c.13.

† 1.Re. 15.d.17

‡ Deut. 9.e.29.

2

Als ghy nv van my gaet, so suldi twee mannen vinden^* byden graue Rahel inden Pale BenIamin, tot Selzaph, die

* Gen. 35.d.19.

[p. 106r]

sullen tot v segghen: De Ezelinnen zijn gheuonden, die ghy zijt gaen soecken. Ende siet, v Vader heeft de Ezels wt der sorghen ghelaten, ende sorghet voor v. Ende seyt: Wat sal ick om mijnen soon doen?

3

Ende als ghy van daer voort aen gaet, so suldy comen totter Eycken Thabor, aldaer sullen v drie mannen aen comen die op gaen tot God na BethEl, deene draecht drie bocxkens, De ander drie stucken broots, de derde een flessche met wijn.

4

Ende si sullen v vriendelijc groeten, ende v twee brooden gheuen, die suldy van haren handen nemen.

5

⁺ Daer na suldy comen opten Berch Gods, daer der Philisteen Legher is. Ende als ghy aldaer in de stadt coemt, soo sal v eenen hoop Propheten ontmoeten, vander hoochten nedercomende, ende voor hen een Psalter, ende Tamborinen, ende Pijpen, ende Herpen, ende sy propheteerden.

+ B vers 5

6

^† Ende de gheest des HEEREN sal veerdich worden ouer v, dat ghy met hen sult propheteren. So suldy een ander man worden.

† Iudi. 15.c.14.

7

Als v nv dese teekenen comen^* soo doet wat v voor handen coemt, want God is met v.

* 2.Re. 7.a.3. 1.Par. 18.a.2

8

Maer ghy sult voor my af gaen na Gilgal, siet, daer wil ick tot v af comen, om te offeren Brantoffer ende Danckoffer.^* Seuen daghen suldy verbeyden, tot dat ick tot v come, ende v te kennen gheue, wat ghy doen sult.

* 1.Reg. 13.b.8.

9

Ende doen hy zijne schouderen keerde, dat hy van Samuel soude gaen, gaf hem God een ander herte. Ende alle dese teeckenen quamen op den seluen dach.

10

⁺ Ende als sy aenden Berch quamen, Siet, doen ontmoete hem eenen hoop Propheten,^* ende den gheest Gods werdt veerdich ouer hem, dat hy onder hen propheteerde.

+ C vers 10

* 1.Reg. 11.b.6.

11

Maer doen sy hem alle saghen, die hem te voren gekent hadden, dat hy metten Propheten propheteerde, seyden sy alle onder malcanderen: Wat is den soon Kis gheschiet? Is Saul oock onder de Propheten?

12

Ende een antwoorde aldaer, ende sprack: Wie is haer Vader?^† Daer is een segwoordt af ghecomen: Is Saul oock onder de Propheten?

† 1.Re. 19.d.24.

13

Ende doen hy wt ghepropheteert hadde, quam hy op de hoochte.

14

Maer Sauls^† Oom sprack tot hem ende tot zijnen knape: Waer sydy henen ghegaen? Sy antwoorden: De Ezelinnen te soecken, ende doen wy saghen, dat sy daer niet en waren, quamen wy tot Samuel.

† Vaders broeder.

15

Doen sprack Sauls Oom: Segt my, wat seyde v Samuel?

16

Saul antwoorde zijnen Oom: Hy seyde ons, dat de Ezelinnen gheuonden waren. Maer vanden Coninckrijck en seyde hy hem niet, wat Samuel gheseyt had.

17

⁺ Maer Samuel ontboodt dat volck te samen totten HEERE, na Mizpa,

+ D vers 17

18

Ende sprack totten kinderen Israels: Dus seyt de HEEre, de Godt Israels: Ick heb Israel wt Egipten gheleyt, ende v vander Egiptenaers handt verlost, ende vander handt alder Coninckrijcken die v dwonghen.

19

Ende^† ghy hebt heden uwen God verworpen, die v wt allen uwen ongheluck ende droeffenis gheholpen heeft, ende segt to hem: Settet eenen Coninck ouer ons. Welaen so tredet nv voor den HEEre, nae uwe stammen ende maechschappen.

† 1.Reg. 8.b.7.

20

^† Doen nv Samuel alle stammen Israels daer toe bracht, wert den stamme Ben Iamin gheraeckt.

† Ios. 7.c.16. Ione. 1.b.7. 1.Re. 14.f.40

21

Ende doen hy den stamme BenIamin daertoe bracht, met zijnen geslachten, werdt dat gheslachte Matri gheraect, ende Saul de soon Kis wert gheraect. Ende sy sochten hem, maer sy en vonden hem niet.

22

⁺ Doen vraechden sy voorder den HEERE: sal hy oock noch herwaerts comen? De HEERE antwoorde: Siet, hy heeft hem onder de vaten versteken.

+ E vers 22

23

Doen liepen sy henen, ende haelden hem van daer. Ende doen hy onder dat volck tradt, was hy thooft langher dan allet volck.

24

Ende Samuel sprack tot alle den volcke: Daer siet ghy den welcken de HEEre vercoren heeft. Want zijns en is gheen ghelijcke, in alle den volcke. Doen iuychten allet volck ende sprack:^† Gheluck ende Heyl den nieuwen Coninck.

† 3.Reg. 1.e.39.

25

^* Maer Samuel seyde den volcke alle trecht des Conincrijcx, ende schreeft in eenen boeck, ende leyde dat voor den HEERE.

* Deut. 17.d.21.

26

Ende Samuel liet allet volck gaen, elck in zijn huys. Ende Saul ghinck oock thuys na Gibea, ende des Heyrs ghinck een deel met hem, der welcker herten Godt roerde.

27

^† Maer sommighe boose lieden spraken: Wat soude ons dese helpen?^* Ende verachten hem, ende en brachten hem gheen ghiften. Maer hy dede, als oft hijs niet en hoorde.

† 1.Reg. 11.d.12.

* Iud. 8.b.6.