Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Saul soeckt de Ezelinne zijns vaders, ende hy coemt tot Samuel, den seluen wort vanden HEEre beuolen, dat hy Saul tot eenen Coninck soude ordineren.

[p. 105v]

1

⁺ MAer daer was een man van BenIamin, geheeten^† Kis, een soon AbiEl, des soons Seror, des soons Bechorath, des soons Apiah, des soons eens Mans Iemini, een strijdtbaer man,

+ A vers 1

† 1.Pa. 9.c.33. 1.Re. 14.g.51

2

Die hadde eenen soon, geheeten Saul, die was een Ionck fijn man, ende daer en was gheen fijnder onder de kinderen Israels, het hooft langher dan allet volck.

3

Maer Kis de Vader Saul, hadde zijne Ezelinnen verloren, ende sprack tot zijnen soon Saul: Neemt der knapen een met v, maeckt v op, gaet henen, ende soeckt de Ezelinnen. Ende hy ghinck door tgheberchte Ephraim,

4

Ende doort landt Salisa, ende en vondense niet. Sy ghinghen door tlandt Saalim, ende sy en waren daer niet: Sy ghingen door tlandt Iemini, ende en vondense niet.

5

Maer doen sy in tlandt Suph quamen, sprack Saul totten knape die met hem was: Coemt, laet ons weder thuys gaen: Mijn vader mocht de Ezelinnen laten, ende voor ons sorghen.

6

Maer hy sprac: Siet, hier is een eerlijc man Gods in deser stadt, alle wat hy seyt, dat gheschiet. Nv laet ons derwaerts gaen, misschien hy sal ons onsen wech wijsen die wy gaen.

7

Maer Saul sprac tot zijnen knape: Al ist dat wy derwaerts gaen, wat brenghen wy den man? Want het broot is al wt onser malen, ende wy en hebben anders gheen gaue, die wy den man Gods mochten brengen. Wat hebben wy?

8

De knape antwoorde Saul weder, ende sprack: Siet ick hebbe een vierendeel eens silueren sikels by my, dien willen wy den man Gods gheuen, dat hy ons onsen wech segghe.

9

⁺ Voortijts in Israel, alsmen ghinck om God te vragen so seydemen: Coemt, laet ons gaen totten^† Siender, want die men nv Propheten heet, die hieten voortijts Sienders.

+ B vers 9

† 2.Reg. 15.f.27

10

Saul sprack tot zijnen knape: Ghy hebt wel ghesproken. Coemt, laet ons henen gaen.

11

Ende doen sy henen ghinghen nader stadt, daer de man Godts was, ende totter stadt op quamen, vonden sy deernen die wtgegaen waren, om water te halen, totten seluen spraken sy: Is de Siender hier?

12

Sy antwoorden hen, ende spraken: Ia, siet, daer is hy. Haest v, want hy is heden inde stadt ghecomen, want dat volc heden te offeren heuet opter hoochten.

13

Als ghy in de stadt coemt, so sult ghy hem vinden, eer hy opgaet, op de hoochte te eten. Want dat volc en sal niet eten, tot dat hy en come: Want hy seghent dat offer, daer na eten die, die ghenoot zijn. Daerom so gaet op, want nv suldy hem iuyst vinden.

14

⁺ Ende doen sy op totter stadt quamen, ende midden inder stadt waren, Siet, doen ghinc Samuel wt, hem te gemoet, ende wilde op de hoochte gaen.

+ C vers 14

15

Maer de^* HEEre hadde Samuel zijn oor geopenbaert eenen dach te voren, eer Saul quam, ende gheseyt:

* 1.Reg. 15.a.1.

16

Morghen, op desen tijt, wil ic eenen man tot v seynden, wt den lande BenIamin,^* dien suldy tot eenen Vorst saluen, ouer mijn volck Israel, dat hy mijn volck verlosse vander Philisteen handt. Want ick hebbe mijn volck aenghesien, ende zijn ghecrijsch is voor my ghecomen.

* Act. 13.c.22.

17

Doen nv Samuel, Saul aensach, antwoorde hem de HEEre: Siet, dat is de man, daer ick v af gheseyt hebbe, dat hy ouer mijn volck heerssche.

18

Doen tradt Saul tot Samuel onder de poorte ende sprack: Segt my, waer is hier des Sienders huys?

19

Samuel antwoorde Saul ende seyde: Ick ben de Siender, Gaet voor my opwaerts op de hoochte, want ghy sult heden met my eten: Morgen wil ick v laten gaen, ende al wat in uwer herten is, wil ic v seggen.

20

Ende om de Ezelinnen die ghy voor drie daghen verloren hebt, en becommert v slechs niet, sy zijn geuonden. Ende wiens salt zijn, al wat dat beste is in Israel? En salt v niet, ende den gheheelen huyse ws Vaders zijn?

21

Saul antwoorde: En ben ick niet een sone van Iemini,^* ende vanden alder minsten stamme Israels, ende mijn gheslachte dat cleynste onder allen gheslachten der stammen BenIamin? Waerom segdy my dan van sulcken?

* Iudi. 6.c.15. 1.Reg. 15.d.17

22

⁺ Maer Samuel nam Saul ende zijnen knape, ende brachtse in de^* Sael, ende settese bouen, onder die genoot waren, dier was by dertich mannen.

+ D vers 22

* Eetcamer.

23

Ende Samuel sprac totten Cock: Gheeft herwaerts dat stuck dat ick v gaf, ende beual dat ghijt by v sout houden.

24

Doen droech de Cock een schouder op, ende dat daer aen hinck, Ende hy leydet Saul voor, ende sprack: Siet, dat is ouerbleuen, legghet voor v, ende etet. Want het is effen tot deser tijt voor v gehouden, doen ic dat volc noode. Alsoo adt Saul met Samuel op dien dach.

25

Ende doen sy af gingen vander hoochten inde stadt, sprac hy met Saul op dat dack.

26

Ende stonden vroech op, Ende doen de Morghenstont op ghinck, riep Samuel den Saul opt dack ende sprac: Op dat ick v laet gaen. Ende Saul maecte hem op, Ende die beyde ghinghen met malcanderen wt, ende Samuel.

27

Ende doen sy af quamen aen dat eynde der stadt, sprack Samuel tot Saul: Segt den knape dat hy voor ons wech gae. Ende hy ghinck voor henen. Maer staet ghy nv stille, dat ick v te kennen gheue wat Godt gheseyt heeft.