Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ Als Samuel oudt wert, ende zijne sonen dat volc regeerden, so waren sy gierich ende onrechtueerdich, daerom begheerde dat volck eenen Coninck.

1

⁺ MAer doen Samuel out wert, sette hy zijne sonen tot Rechters ouer Israel.

+ A vers 1

2

Sijn eerstgheboren sone hiet Ioel, ende de ander hiet Abia, ende waren Rechters tot BerSaba.

3

Maer zijne sonen en wandelden niet in zijne weghen, maer neychden hen tot giericheyt, ende namen ghiften^* ende buychden dat recht.

* Deu. 17.a.2.

4

Doen vergaderden hen alle Ouders in Israel, ende quamen tot Ramath tot Samuel,

5

Ende seyden tot hem:^† Siet, ghy zijt out geworden, ende uwe sonen en wandelen niet in uwe weghen^‡ Dus set nv eenen Coninc ouer ons, die ons rechte, soo alle Heydenen hebben.

† 1.Re. 12.a.5.

‡ Iudi. 17.b.6 Oze. 13.b.11. Act. 13.d.21. Deut. 17.c.19.

6

Dat beuiel Samuel qualijc, dat sy seyden: Geeft ons eenen Coninck die ons rechte. Ende Samuel badt voor den HEEre.

7

⁺ Maer de HEEre sprack tot Samuel: Hoort de stemme des volcx, in alle dien, dat sy tot v geseyt hebben. Want sy en hebben niet v,^† maer my verworpen, dat ic geen Coninc ouer hen en sal zijn.

+ B vers 7

† Deut. 31.d.16. 1.Reg. 10.d.19

8

Sy doen v, also sy altoos gedaen hebben, van dien dage aen, dat ickse wt Egipten leyde, tot desen daghe toe: Ende hebben my verlaten, ende andere goden ghedient. Aldus hoort nv haer stemme,

9

^† Nochtans betuyget hen, ende vercondicht hen dat recht des Conincx, die ouer hen heerschen sal.

† Deut. 17.d.21.

10

Ende Samuel seyde alle de woorden des HEEren den volcke, dat van hem eenen Coninc eyschte.

11

Dat sal des Conincx recht zijn die ouer v heerschen sal.^† Vwe sonen sal hy nemen tot zijnen waghen, ende tot Ruyteren die voor zijnen waghen henen drauen,

† 3.Reg. 9.d.22.

12

Ende tot Hooftlieden ouer duysent ende ouer vijftich, ende tot Ackerlieden die hem zijnen Acker bouwen, ende tot Maeyers in zijnen oogst, ende dat sy zijn harnisch, ende al wat tot zijnen waghen hoort, maken.

13

Maer uwe dochteren sal hy nemen, dat sy Apotekerssen, Cokerssen, ende Bacsteren zijn.

14

⁺ Vwe beste Ackers ende Wijnberghen, ende Olijfgaerden sal hy nemen, ende zijnen knechten geuen.

+ C vers 14

15

Daer toe van uwen saet ende^† Wijnbergen sal hy thiende nemen, ende zijnen Camerlinghen ende knechten geuen.

† 3.Reg. 21.a.1.

16

Ende uwe knechten ende maerten, ende uwe fijnste Iongelingen, ende uwe Ezelen sal hy nemen, ende zijn werck daermede wtrechten.

17

Van uwen Cudden sal hy thiende nemen, ende ghy moet zijne knechten zijn.

18

Als ghy dan inder tijt ouer uwen Coninck roepen sult, dien ghy v vercoren hebt, so en sal v de HEEre ter seluer tijt niet verhooren.

19

⁺ Maer dat volc weygerde hen te hooren de stemme Samuels, ende spraken: Gheensins, maer daer sal een Coninc ouer ons zijn.

+ D vers 19

20

Op dat wy oock zijn als alle ander Heydenen, dat ons onse Coninck oordeele, ende voor ons wt trecke als wy onse oorloghe voeren.

21

Doen hoorde Samuel al wattet volc seyde, ende seydet voor de ooren des HEEren.

22

Maer de HEEre sprack tot Samuel: Hoort hare stemme, ende maeckt hen eenen Coninck. Ende Samuel sprack totten mannen Israels: Gaet henen elck in zijn stadt.