Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ De Arcke werdt in Aminadabs huys ghebracht. Samuel vermaent dat volck dat sy haer beteren souden, de Afgoden wech te worpen, ende dat si haer totten HEEre souden keeren.

1

⁺ ALdus soo quamen de lieden van Kiriath Iearim,^* ende haelden de Arcke des HEEren op, ende brachtense int huys AbiNadab tot Gibea: Ende zijnen soon Eleasar wijden sy, op dat hy de Arcke des HEEren soude bewaren.

+ A vers 1

* 2.Reg. 6.a.3.

2

Ende van dien dage aen, dat de Arcke des HEEren tot^‡ Kiriath Iearim bleef, soo vertrock den tijt so langhe, tot dattet twintich iaer werden. Ende alle dat huys Israels weende voor den HEERE.

‡ 1.Par. 14.a.6

3

Maer Samuel sprack totten geheelen huyse Israels.^† Ist dat ghy v met gheheelder herten bekeert totten HEEre, soo doet van v de vreemde Goden, ende Astaroth, ende techtet uwe herten totten HEEre,^* ende dient hem alleen, so sal hy v verlossen wt der Philisteen handt.

† Iosu. 24.c.14 Tob. 14.c.11.

* Deut. 6.c.13. 10.d.20. Mat. 4.b.10.

4

Doen deden de kinderen Israels van

[p. 105r]

hen Baalim ende Astaroth, ende dienden den HEEre alleene. Maer Samuel sprack:

5

Vergadert dat gantsche Israel nae Mizpa, dat ick den HEEre voor v bidde.

6

Ende si quamen te samen tot Mizpa, ende schepten water, ende goten dat wt voor den HEEre, ende vasten den seluen dach, ende spraken aldaer: Wy hebben den HEEre gesondicht. Also oordeelde Samuel de kinderen Israels tot Mizpa.

7

Doen de Philisteen hoorden, dat de kinderen Israels tsamen ghecomen waren tot Mizpa, trocken de Vorsten der Philisteen op, tegen Israel. Doen dat de kinderen Israels hoorden, vreesden si hen voor de Philisteen,

8

Ende spraken tot Samuel: En laet niet af voor ons te roepen totten HEERE onsen God, dat hy ons helpe wt der Philisteen hant.

9

Samuel nam een^* Melck lammeken, ende offerde den HEERE een gheheele Brantoffer, ende riep totten HEERE voor Israel. Ende de HEEre verhoorde hem.

* Eccl. 46.c.19.

10

⁺ Ende ter wijlen dat Samuel dat Brandtoffer offerde, quamen de Philisteen aen om te strijden teghen Israel.^* Maer de HEEre liet donderen eenen grooten donder ouer de Philisteen opten seluen dach ende veruaerdese, dat si voor Israel gheslaghen werden.

+ C vers 10

* Psal. 18.b.14.

11

Doen trocken de mannen Israels wt van Mizpa, ende iaechden de Philisteen, ende sloeghense tot onder BethCar.

12

^* Doen nam Samuel eenen steen, ende stelden tusschen Mizpa ende Sen, ende hieten hem^† EbenEzer, ende seyde: Tot hier toe heeft ons de HEEre geholpen.

* Iosu. 24.f.26.

† Helpsteen.

13

Also werden de Philisteen neder ghedruct, ende en quamen niet meer in de palen Israels. Ende de hant des HEEren was teghen de Philisteen, alsoo langhe als Samuel leefde.

14

⁺ Also werden Israel de steden weder,^* die de Philisteen hen ghenomen hadden, van Ekron aen, tot Gath toe, met haren palen, Die verlosten Israel vander hant der Philisteen. Want Israel hadde vrede metten Amoriten.

+ D vers 14

* 1.Reg. 4.a.1.

15

Maer Samuel oordeelde Israel zijn leefdaghe.

16

Ende trock iaerlijcx rontsom tot BethEl, ende Gilgal ende Mizpa. Ende als hy Israel in alle dese plaetsen geoordeelt hadde,

17

So^* quam hy weder tot Ramath: Want daer was zijn huys. Ende oordeelde Israel aldaer, ende boude den HEEre aldaer eenen Altaer.

* 1.Re. 15.g.34.