Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ De Philisteen seynden de Arcke wederom den volcke Gods, met sommighe offerhanden ende gauen.

1

⁺ ALdus was de Arcke des HEEren seuen maenden inden lande der Philisteen.

+ A vers 1

2

Ende de Philisteen riepen hare Priesters ende Propheteerders ende seyden: Wat sullen wy metter Arcken des HEEren doen? Bediedet ons waer mede sullen wyse op haer plaetse seynden? Sy spraken:

3

Wilt ghy de Arcke des Gods Israels wech seynden, soo en seyntse niet ydel, maer ghy sult haer betalen eenen Schultoffer, so sult ghy ghesont worden, ende v sal kenlijck worden, waerom sine hant niet van v af en laet.

4

Maer si seyden: Welck is dat Scultoffer, dat wy hem gheuen souden? Sy antwoorden: Vijf gulden Eersen, ende vijf gulden Muysen, na tgetal der vijf Vorsten der Philisteen. Want het is eenderhande plaghe geweest ouer v allen, ende ouer uwen Vorsten.

5

Dus moet ghy nv maken ghelijcke ghedaente uwer Eersen, ende uwer Muysen, die v lant verdoruen hebben, dat ghi den Gode Israels de eere gheeft. Misschien sal zijn handt lichter worden ouer v, ende ouer uwen God, ende ouer v lant.

6

⁺ Waerom verstockt ghy uwe herten, ghelijc de Egiptenaers, ende Pharao haer herten verstocten? En ist niet alsoo, doen hy hem aen hen bewijsde,^* lieten syse varen, dat si wech ghinghen?

+ B vers 6

* Exod. 12.d.31.

7

^† Dus nemet nv, ende maeckt eenen nieuwen waghen, ende twee Ionge suygende Coeyen, op welcke noyt geen iock ghecomen en is, ende spantse aenden waghen, ende laet hare Caluers van hen thuys blijuen.

† 2.Reg. 6.a.3.

8

Ende neemt de Arcke des HEEren, ende steltse op den waghen. Ende de gulden Cleynodien die ghy hem tot eenen Schultoffer gheeft, legt in een Cofferken by haer zijde, ende seyntse henen, ende laetse gaen.

9

Ende siet ghy toe: Gaet si henen opten wech haerder Palen nae BethSemes, so heeft hi ons alle dat groot quaet ghedaen: Is des niet, so suldy weten dat zijne hant ons niet geraect en heeft, maer het is ons by gheualle gheschiet.

10

De lieden deden alsoo, ende namen twee Ionghe suyghende Coeyen, ende spandense aen eenen wagen, ende behielden haer Calueren thuys.

11

Ende stelden de Arcke des HEEren opten wagen, ende dat Cofferken met de gulden Muysen, ende metten beelden haerden Eersen.

12

Ende de Coeyen ghingen rechts wechs nae BethSemes toe op eender straten. Ende ghinghen ende^† loeyden, ende en weken niet ter rechter noch ter slincker hant.⁺ Ende de Vorsten der Philisteen ginghen hen nae, tot aen de Palen BethSemes.

† Oft brulden.

+ C vers 12

13

Maer de BethSemiten maeyden recht inden terwen oogst inde Valleye, ende hieuen haer ooghen op, ende saghen de Arcke, ende verblijden hen de selue te sien.

14

Maer den waghen quam opten Acker Iosua des BethSemiters, ende stont aldaer stille. Ende aldaer was eenen grooten steen, ende si cloofden dat hout vanden wagen, ende offerden de Coeyen den HEEre tot eenen Brantoffer.

15

Maer de Leuiten hieuen de Arcke des HEEren daer af, ende dat Cofferken dat daer by was, waer in de gulden Cleynodien waren, ende settense opten grooten steen. Maer de lieden tot BethSemes offerden den HEEre inden seluen daghe Brantoffer, ende ander offer.

16

Ende doen de vijf Vorsten der Philisteen toegesien hadden, trocken si wederom nae Ekron opten seluen dach.

17

⁺ Maer dit zijn de gulden Eersen, die de Philisteen den HEERE tot eenen Schultoffer gauen: Asdod eenen, Gasa eenen, Asklon eenen, Gath eenen, ende Ekron eenen,

+ D vers 17

18

Ende gulden Muysen nae tgetal alle der steden der Philisteen, onder den vijf Vorsten, beyde der ghemuerder steden ende dorpen, ende tot aen den grooten Abel, daer op si de Arcke des HEEren lieten, tot op desen dach, opten Acker Iosua des BethSemiters.

19

Ende sommige tot BethSemes werden geslagen om dat si de Arcke des HEEren gesien hadden. Ende hy sloech van dien volcke vijftich duysent ende tseuentich mannen. Doen droech dat volck rouwe, dat de HEEre so grooten slach int volc gedaen hadde.

20

Ende de lieden tot BethSemes seyden: Wie can staen voor den HEEre sulcken heylighen Godt? Ende tot wien sal hy van ons trecken?

21

Ende sy seynden boden totten borgheren Kiriath Iaerim, ende deden hen segghen: De Philisteen hebben de Arcke des HEEren weder ghebracht, coemt af ende haeltse tot v op.