Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ De kinderen Israels strijden tegen de Philistijnen, ende si verliesen den strijt, ende daer werdt gheslagen ten tweeden male: De Philisteen winnen de Arcke des HEEren, de twee sonen van Hely werden verslaghen, ende Hely viel vanden stoele ende brack den hals.

1

⁺ MAer Israel troc wt den Philisteen teghen, inden strijdt, ende legerden hen by^† EbenEzer. Maer de Philisteen waren gelegert tot Aphek,

+ A vers 1

† Helpsteen.

2

Ende rusteden hem teghen Israel. Ende den strijdt deylde hem van malcanderen, Ende Israel werdt voor de Philisteen gheslaghen, ende sloegen inder slachoorden inden velde by vier duysent mannen.

3

Ende doen dat volck inden Legher quam, spraken de Ouders Israels: Waerom heeft ons de HEERE heden laten slaen van de Philisteen? Laet ons tot ons nemen de^† Arcke des verbondts des HEEren van Silo, ende laetse onder ons comen, dat si ons helpe vander hant onser Vianden.

† Kiste.

4

Ende dat volck seynde henen na Silo, ende liet van daer halen de Arcke des verbondts des HEEren Sebaoth, die bouen de Cherubim sittet. Ende de twee sonen Eli waren daer metter Arcken des verbonts Godts, Hophni ende Pinehas.

5

⁺ Ende doen de Arcke des verbonts des HEEren inden Legher quam, iuychten dat gheheele Israel, met eenen grooten

+ B vers 5

[p. 104r]

iuychen, alsoo dat de Aerde clanck.

6

Maer doen de Philisteen hoorden dat gecrijsch sulcx iuychenen, spraken si: Wat is dat voor een ghecrijsch sulcks groot iuychens inder Ebreen Leger? Ende doen si vernamen dat de Arcke des HEEren inden Legher ghecomen ware,

7

Vreesden si hen, ende seyden: God is inden Legher ghecomen. Ende seyden voort: Wee ons, want het en heeft te voren niet also ghestaen,

8

Wee ons.^† Wie wil ons verlossen vander hant deser machtigher goden? Dat zijn de goden,^* die Egipten sloeghen met alderhande plaghe inder woestijnen.

† Deut. 32.e.31.

* Exod. 7. 8. 9. 10. 12.

9

Dus hebt nv eenen goeden moet, ende weest mannen ghy Philisteen, op dat ghy den Ebreen niet dienen en moet,^* so si v ghedient hebben. Sijt mannen, ende strijdet.

* Iudic. 13.a.1.

10

Doen streden de Philisteen, ende Israel wert gheslaghen, ende elc vluchte in zijn Hutte.⁺ Ende het was eenen seer groten slach, alsoo dat wt Israel vielen dertich duysent mannen voetvolcx.

+ C vers 10

11

Ende de Arcke Godts werdt ghenomen,^* ende de twee sonen Eli, Hophni ende Pinehas storuen.

* 1.Reg. 2.g.34

12

Doen liep een van BenIamin wt den heyr, ende quam tot Silo opten seluen dach, ende hadde zijn cleet gheschuert, ende had Aerde op zijnh ghestroyt.

13

Ende siet, als hy daer in quam, sadt Eli opten stoel, dat hi opten wege soude sien, want zijn herte was schromende ouer de Arcke Gods. Ende doen de man inde stadt quam, gaf hijt te kennen. Ende alle de stadt crijschte.

14

Ende doen Eli dat luyde crijsschen hoorde, vraechde hy: Wat luyde geruchte is dat? Doen quam de man haestelijc, ende ghaft Eli te kennen.

15

(Maer Eli was achtentnegentich iaer out,^† ende zijn oogen waren doncker, dat hy niet ghesien en coste.)

† 1.Reg. 3.a.2.

16

Maer de man sprack tot Eli: Ick come ende ben heden wt den Heyr gheulucht. Maer hi sprac: Hoe gatet toe mijne sone?

17

⁺ Doen antwoorde de vercondigher ende sprack: Israel is gheulucht voor de Philisteen, ende daer is eenen grooten slach inden volcke geschiet, ende uwe twee sonen Hophni ende Pinehas zijn ghestoruen: Daer toe soo is de Arcke Gods ghenomen.

+ D vers 17

18

Maer doen hy der Arcken Godts ghedacht, soo viel hy te rugghe vanden stoel aen de poorte, ende brac sinen hals ontwee, ende sterf. Want hy was out ende een swaer man. Maer hy oordeelde Israel veertich iaer.

19

Maer zijn swagerinne Pinehas wijf was beurucht, ende soude schier int kinderbedde. Doen si dat gherucht hoorde, dat de Arcke Gods ghenomen, ende haers mans broeder ende haer man doot waren, cromde si haer ende baerde, want haren noot quam haer aen.

20

Ende doen si nv sterf, spraken die vrouwen die neffens haer stonden.^* En vreest v niet, ghy hebt eenen Iongen soon. Maer si en antwoorde niet, noch en namt ooc niet ter herten.

* Gene. 33.d.17.

21

Ende si hiet dat kint Icabod, ende sprack: De heerlijcheyt is wech van Israel, om dat de Arcke Godts ghenomen was, ende haer swagher, ende haer man.

22

Ende sprack noch eens: De heerlijckheydt is wech van Israel, want de Arcke Gods is ghenomen.