Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ De openbaringhe ende visioen die Samuel gheschieden, de welcke oock Eli gheopenbaert wert.

1

⁺ ENde doen Samuel dat knechtken, den HEEre diende onder Eli, was des HEEren woort seltsaem ende dierbaer ter seluer tijt, ende daer was weynich prophetien.

+ A vers 1

2

Ende het gheschiede ter seluer tijt: Eli lach in zijn plaetse,^* ende zijn oogen begosten doncker te worden, also dat hy niet gesien en coste.

* 1.Reg. 4.c.15.

3

Ende Samuel hadde hem geleyt inden tempel des HEEren, daer de Arcke Gods was, eer dan de lampe Gods wt ghinck.

4

Ende de HEEre riep Samuel. Maer hy antwoorde:^† Siet, hier ben ic,

† Gen. 37.c.13.

5

Ende liep tot Eli, ende seyde: Siet, hier ben ick, ghi hebt my geroepen. Maer hy sprac: Ic en heb v niet geroepen, gaet weder henen, ende gaet weder ligghen slapen. Ende hy ghinck henen, ende ghinck ligghen slapen.

6

⁺ De HEEre riep weder: Samuel. Ende Samuel stont op, ende ghinck tot Eli, ende sprack: Siet, hier ben ick, ghy hebt my gheroepen. Maer hy seyde: Ick en heb v niet gheroepen mijn sone, gaet weder henen, ende gaet ligghen slapen.

+ B vers 6

7

Mer Samuel kende den HEEre noch niet, ende des HEEren woort en was hem noch niet geopenbaert.

8

Ende de HEEre riep Samuel weder ten derden male. Ende hy stont op, ende ghinc tot Eli ende seyde: Siet, hier ben ic, ghy hebt my geroepen. Doen mercte Eli, dat de HEEre dat knechtken riep,

9

Ende sprack tot hem: Gaet weder henen, ende slaept, ende ist dat ghy gheroepen wort soo segt: Spreect HEEre, want v knecht hooret. Samuel ginc henen ende leyde hem in zijn plaetse.

10

⁺ Doen quam de HEERE ende tradt daer henen, ende riep als te voren: Samuel, Samuel. Ende Samuel sprack: Spreect, want v knecht hooret.

+ C vers 10

11

Ende de HEEre sprack tot Samuel:^* Siet, ick doe een dinck in Israel, dat so wie dat hooren sal, die sullen beyde zijn ooren tuyten.

* 4.Re. 21.c.12.

12

In dien daghe^† wil ick verwecken ouer Eli, al wat ic teghen zijn huys ghe-sproken hebbe.

† 1.Reg. 2.g.31.

13

Ick wilt beginnen ende voleynden, Want ic hebt hem voorseyt,^* dat ick Rechter zijn wil ouer zijn huys eewelijck, om der misdaet wille, dat hy wiste hoe sine kinderen hem schandelijck hielden, ende en hadde niet eens daerom suerlijc gesien.

* 1.Reg. 24.c.13

14

Daerom heb ic den huyse Eli gesworen, dat dese misdaet des huys Eli, niet versoent en sal worden, noch met offer, noch met Spijsoffer, inder eewicheyt.

15

Ende Samuel lach tot smorghens toe, ende dede de duere op aenden huyse des HEEren.⁺ Maer Samuel vreesde dat gesichte Eli te seggen.

+ D vers 15

16

Doen riep hem Eli ende sprac: Samuel mijn sone. Hy antwoorde.^† Siet, hier ben ick.

† Gene. 37.c.13.

17

Hy sprac: Wat is dat woort dat tot v gheseyt is? En verberghet niet voor my. God doe v dit ende dat, ist dat ghy yet verberghet van alle dien dat met v ghesproken is.

18

Doen seydet hem Samuel altemael, ende en verborgh niet voor hem. Maer hy sprac: Het is de HEEre, hy doe wat hem wel beualt.

19

Mer Samuel nam toe, ende de HEEre was met hem, ende daer en viel niet een van allen sinen woorden opter Aerden.

20

Ende alle Israel van Dan aen tot Bersaba toe, bekende dat Samuel een ghetrou Propheet des HEEren was.

21

Ende de HEEre openbaerde weder tot Silo, want de HEEre was Samuel gheopenbaert tot Silo, door twoort des HEEren. Ende Samuel begost te prediken den gantschen Israel.