Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Eenen lofsanck Hanne, Helys sonen sondighen ende sy en werden niet neerstelijck vanden vader ghestraft. Daerom wert hy ende zijn sonen vanden Priesterdom ghestooten.

1

⁺ ENde Hanna badt ende seyde: Mijn herte is vrolijck inden HEERE. Mijnen hooren is verhoocht inden HEEre.

+ A vers 1

[p. 103r]

Mijnen mont heeft hem wijt open ghedaen ouer mijne vianden. Want ick verblijde my van uwen Heyl.

2

Daer en is niemandt heylich als de HEEre.^† Buyten v en is gheen ander, ende daer en is gheenen troost als onse Godt is.

† Deut. 4.f.35. 32.f.39.

3

Laet uwe groot beroemen ende pochen. Laet wt uwen monde blijuen dat oude. Want de HEEre is een Godt, die het merct, ende hy en laet sulcken voornemen niet ghelucken.

4

^* Den boghe der stercker is ghebroken, ende de onstercke zijn omgort met stercheyt.

* Luc. 1.d.52.

5

Die daer sadt waren, zijn om broot vercocht gheworden:^† Ende die honger leden, dien en honghert niet meer.

Tot dat de onuruchtbare, seuen baerde, ende die vele kinderen hadde, afnam.

† Luc. 1.d.53.

6

^+* De HEEre doodet, ende maect leuendich: Leydet inder hellen, ende daer weder wt.

+ B vers 6

* Deut. 32.f.39. Sapi. 16.c.13. Tob. 13.a.2.

7

^† De HEEre maect arm, ende maect rijcke. Hy vernedert ende verhoocht.

† Eccle. 11.b.5.

8

^‡ Hy heft op den nootdruftighen wt den stof, ende verhoocht den armen wt den drec: Op dat hy hem soude setten onder de Vorsten, ende den stoel der eeren laten beeruen.

^* Want de eynden der Werelt zijn des HEEren, ende hy heeft den Aertbodem daer op gheset.

‡ Psal. 113.a.6.

* Exod. 19.a.5. Deut. 10.c.14. Psal. 24.a.1. 1.Cor. 10.c.26.

9

Hy sal behoeden de voeten zijnder heylighen: Maer de godloose moeten te niete worden inder duysternissen. Want veel vermoghen, en helpt doch niet.

10

Die metten HEEre kijuen, moeten te gronde gaen. Ouer hen sal hy donderen inden Hemel.

^* De HEEre sal oordeelen de eynden der werelt, ende sal macht gheuen zijnen Coninck, ende verhooghen den horen zijns ghesalfden.

* Mat. 19.c.28. 25.c.32. Acto. 10.e.42. 17.f.31.

11

⁺ Maer ElKana ghinck weder henen nae Ramath in zijn huys, ende dat knechtken was des HEEren dienaer voor den Priester Eli.

+ C vers 11

12

Maer de sonen Eli waren boose boeuen, ende en vraechden niet na den HEEre,

13

Noch nae den recht der Priesters aen dat volck. Als yemandt yet offeren wilde, soo quam des Priesters Iongen, te wijle datment vleesch coocte, ende hadde eenen crauwel met drie tacken in zijnder hant,

14

Ende greep in de teyle, of ketel, oft panne, oft pot, ende wat hy metten crauwel wt trock, dat nam de Priester daer af. Also deden si alle Israel die daer quamen tot Silo.

15

Desghelijck eer si dat vet aenstaken, quam des Priesters Ionghen, ende seyde tot dien die dat offer bracht: Gheeft my dat vleesch den Priester te braden, want hy en wilt gheen ghecooct vleesch van v nemen, maer rouwe.

16

Als dan yemandt tot hem seyde: Laet dat vet aensteken, soo het heden behoort, ende neemt daer nae al wat v hert begheert, soo sprack hy tot hem:⁺ Ghy sullet my nv gheuen, is dat niet, soo wil ickt v met ghewelt nemen.

+ D vers 16

17

Daerom was de sonde der knapen seer groot voor den HEEre, want de lieden lasterden dat Spijsoffer des HEEren.

18

Mer Samuel was een dienaer voor den HEEre, ende dat knechtken was omgort met eenen lijnen lijfrock.

19

Daer toe maecte hem zijn moeder eenen cleynen rock, ende brachten hem op tot zijnder tijt. Als si met haren man op ghinck,^* om te offeren den offer tot zijnder tijt.

* Deut. 16.a.1.

20

Ende Eli seeghende ElKana ende zijn wijf, ende sprack: De HEEre gheue v saet van desen wijue, voor de bede, die si vanden HEERE ghebeden heeft. Ende si ghinghen weder tot haerder plaetsen.

21

Ende de HEERe besocht Hannam, dat si beurucht wert, ende baerde drie Sonen ende twee Dochteren. Maer Samuel dat knechtken nam toe by den HEEre.

22

⁺ Mer Eli wert seer out, ende vernamt al wat sine sonen deden den gantschen Israel, ende dat si by de Wijuen sliepen die daer dienden, voor de duere der Hutten des ghetuychenis,

+ E vers 22

23

Ende hy sprack tot hen: Waerom doet ghy sulcx? Want ick hoore v quaet wesen van alle desen volcke.

24

Niet mijne kinderen, dat en is geen goet gherucht dat ic hoore. Ghy doet dat volck des HEEren ouertreden.

25

^† Ist dat yemant tegen eenen mensch sondicht, so cant de Rechter slichten: Maer als yemant tegen den HEEre sondicht, wie can voor hem bidden? Maer sy en hoorden haers vaders stemme niet, Want de HEEre hadse wille te dooden.

† Matt. 12.c.32

26

^† Maer dat knechtken Samuel ginc ende nam toe, ende was aengenaem byden HEEre ende by de menschen.

† Luce. 2.g.52

27

⁺ Maer daer quam een man Gods tot Eli ende sprack tot hem: Soo spreeckt de HEEre: Ick heb my gheopenbaert ws Vaders huyse, doen si noch in Egipten waren in Pharaos huys.

+ F vers 27

28

Ende heb hem aldaer my vercoren voor alle stammen Israels totter Priesterschap die hy offeren soude op mijnen Altaer, ende Ruecwerck aensteken, ende den Lijfrock voor my draghen.^† Ende hebbe dijns vaders huyse ghegeuen alle vyeren der kinderen Israels.

† Deu. 10.b.9. 12.b.12. Leuit. 2.a.3. 10.d.12.

29

Waerom slaet ghy dan achter wt, teghen mijnen offer ende spijsoffer, die ick gheboden hebbe inder wooninghen? Ende ghy eert uwe soonen meer dan my, op dat ghy v sout mesten vanden besten, alder Spijsoffers mijns volcks Israels.

30

Daerom spreect de HEEre de Godt Israel: Ick heb gesproken: V huys, ende ws Vaders huys, souden voor my eewelijck wandelen. Mer nv spreect de HEEre: Het sy verre van my.⁺ Maer wie my eert, dien wil ick oock eeren: Maer wie my veracht, die sal weder veracht worden.

+ G vers 30

31

^* Siet den tijt sal comen, dat ick uwen arm, ende den arm des huys dijns Vaders in tween wil breken, also datter gheen oude in uwen huyse en sy.

* 3.Reg. 2.d.27

32

Ende sult sien uwen benijder inder Wooningen, in alderley goet dat Israel geschieden

[p. 103v]

sal. Ende daer en sal geen oude zijn in ws vaders huys eewelijck.

33

Doch en wil ick wt v niemanden van mijnen Altaer wtroeyen: Op dat dijn oogen versmachten, ende v siele haer wtquele.^† Ende alle Menichten ws huys sullen steruen, als si mannen gheworden zijn.

† 1.Reg. 22.d.18

34

^† Ende dat sal v een teeken zijn, dat ouer uwe sonen Hophni ende Pinehas comen sal:^* Sy sullen alle beyde op eenen dach steruen.

† 1.Reg. 10.a.2. Esai. 38.b.7.

* 1.Re. 4.c.11.

35

^‡ Maer ic wil my eenen ghetrouwen Priester verwecken, die sal doen soot mijnder herten ende mijnder sielen wel behaecht. Dien wil ic een bestandich huys bouwen, dat hy voor mijnen ghesalfden wandele altoos.

‡ Iere. 33.c.18.

36

Ende wie ouer blijft van uwen huyse, die sal comen, ende voor genen nederuallen om eenen silueren penninck, ende om een stuc broots, ende sal seggen: Lieue, laet my tot eenen Priesters deel, dat ick een bete broots ete.