Den Bibel, Inhoudende dat Oude ende Nieuwe Testament (Biestkensbijbel)

[p. 102v]

Dat Eerste Boeck Samuel.

¶ Dat eerste Capittel.

¶ Van Helkana ende zijne twee wijuen, ende van haerder ernstigher liefden tot Godt, Godt gheeft Hanna eenen Sone Samuel gheheeten, die welcke werdt den HEEre toegheeyghent ende beloeft.

1

⁺ DAer was een Man van RamathaimSophim, vanden geberchte Ephraim,^* die hiet ElKana, een soon Ieroham, des Soons Elihu, des soons Thohu, des soons Suph, die welcke een Ephratijt was, ende hadde twee Wijuen: Deene hiet Hanna, De ander Peninna.

+ A vers 1

* 1.Pa. 7.b.27.

2

Maer Peninna hadde kinderen, ende Hanna en hadde geen kinderen.

3

^† Ende de selue Man ghinc op van zijnder Stadt, tot zijnder tijt dat hy soude aenbeden, ende offeren den HEEre Sebaoth tot Silo: Maer aldaer waren Priesters des HEEren, Hophni ende Pinehas, de twee sonen Eli.

† Exod. 23.b.14 Deut. 16.a.1.

4

Doent nv op eenen dach quam dat ElKana offerde, gaf hy zijnen wijue Peninna, ende al haren sonen ende dochteren deelen.

5

Maer Hanna gaf hy een deel truerich, want hy hadde Hanna lief.

6

^† Maer de HEEre hadde haer Lijf besloten. Ende haer benijdersse bedroefdese, ende terchdese seer, dat de HEEre haer lichaem besloten hadde.

† Gene. 16.a.2. 29.f.31. 30.a.2.

7

Also dede sy alle iaer, als sy opghinck tot des HEEren huyse, ende bedroefdese also. So weendese dan, ende en adt niet.

8

Maer ElKana haer man sprac tot haer: Hanna, waerom weent ghy? Ende waerom en eet ghy niet? Ende waerom benaut hem v herte so seer? En ben ick v niet beter dan thien sonen?

9

⁺ Doen stont Hanna op, na dien dat sy gheten hadde, ende gedroncken tot Silo. (Maer Eli de Priester sat op eenen stoel aenden poste des Tempels des HEEren)

+ B vers 9

10

Ende sy was van herten bedroeft, ende badt totten HEEre, ende weende.

11

Ende gheloefde een ghelofte, ende sprac: HEERE Sebaoth, ist dat ghy uwer maerten allendicheyt aensiet, ende mijns ghedenct, ende uwer maerten niet en verghetet, ende gheeft uwer maerten eenen Soon,^† soo wil icken den HEEre gheuen zijn leefdage,^* ende daer en sal geen scheermes op zijn hooft comen.

† Num. 4.a.3

* Num. 6.a.5. Iudic. 13.a.5.

12

Ende doen sy langhe badt voor den HEEre, hadde Eli acht op haren mont.

13

Want Hanna sprack in haerder herten, alleen haer lippen roerden haer, ende men en hoorde haer stemme niet. Doen meynde Eli dat sy droncken waer,

14

Ende sprack tot haer: Hoe langhe suldy droncken zijn? Laet den wijn van v comen, dien ghy by v hebt.

15

Maer Hanna antwoorde ende sprack: Neen mijn Heere, ick ben een bedruct wijf. Wijn ende stercken dranck en heb ick niet ghedroncken,^* maer heb mijn hert voor den HEEre wtgestort.

* Psal. 42.a.5.

16

⁺ En wilt doch uwe maerte niet achten als een schalcke vrouwe. Want ick hebbe wt mijnen grooten commer ende truericheyt gesproken tot noch toe.

+ C vers 16

17

Eli antwoorde haer ende sprack: Gaet henen met vreden, de Godt Israels sal v uwe bedinghe gheuen die ghy van hem ghebeden hebt.

18

Sy sprac: Laet uwe maerte ghenade vinden voor uwen ooghen. Also ghinc dat wijf henen haers weechs, ende adt, ende en sach niet meer soo truerich.

19

Ende des morghens vroech maecten sy hen op, ende doen sy aenghebeden hadden voor den HEEre, keerden sy wederom, ende quamen thuys tot Ramathaim: Ende ElKana bekende zijn wijf Hanna. Ende de HEEre ghedacht haerder.

20

Ende doen sommighe daghen omme waren^† wert sy beurucht, ende baerde eenen Soon, ende hiet hem Samuel, want ick heb hem vanden HEEre ghebeden.

† Gene. 21.a.2.

21

Ende doen de man ElKana op trock met alle zijnen huyse, op dat hy den HEEre dat offer soude offeren ter ghewoonlijcker tijt, ende zijn gelofte,

22

⁺ So en trac Hanna niet mede op, maer sprack tot haren Man: So lange tot dat dat kint ghespeent worde, so wil ic hem brengen dat hy voor den HEEre openbare, ende blijue aldaer^* eewelijck.

+ D vers 22

* Num. 4.c.23. 8.d.25.

23

ElKana haer man sprack tot haer: Soo doet alst v belieft, blijft tot dat ghy hem speent: Maer de HEEre beuestighe wat hy ghesproken heeft.

Alsoo bleef dat wijf, ende soochde haren soon, tot dat sy hem speende.

24

Ende bracht hem met haer op, na dien sy hem gespeent hadde, met drie Ossen, met eenen Epha meels, ende een flessche vol wijns, ende bracht hem in dat huys des HEEren tot Silo. Maer dat kint was noch ionck.

25

Ende sy sloeghen eenen osse, ende brachten dat kint tot Eli.

26

Ende sy sprac: Ach mijn Heere, so warachtelijc als uwe siele leeft mijn Heere, ic ben dat wijf dat hier by v stondt, ende badt den HEEre, doen ick om dit knechtken bat.

27

Nv heeft de HEEre mijn bedinghe ghegeuen, die ick van hem badt,

28

Daerom gheef ick hem den HEEre weder zijn leefdage, dewijle hy van den HEEre ghebeden is. Ende sy aenbaden den HEEre aldaer.