Den Bibel, Inhoudende dat Oude ende Nieuwe Testament (Biestkensbijbel)

[p. 101r]

Dat Boeck Ruth.

Dat eerste Capittel.

¶ Elimelech van Bethlehem reyst inden dieren tijt met Naemi zynen wijue, ende met twee Sonen inder Moabiten Landt. Ruth des eens Soons verlatene weduwe reyst met Naemi haers ghestoruen mans moeder wederomme thuys te Bethlehem.

1

⁺ INDER tijt doen de Rechters regeerden, wert eenen dieren tijt inden Lande. Ende een Man van Bethlehem Iuda trock wt ende wandelde inder Moabiten lant met zijnen wijue, ende twee Sonen.

+ A vers 1

2

Die hiet Elimelech, ende zijn wijf Naemi, ende zijne twee sonen Mahelon, ende Chilion, die waren Ephrateen van Bethlehem Iuda. Ende doen sy quamen in het Lant der Moabiten, woonden sy aldaer.

3

Ende EliMelech de man Naemi sterf, ende sy bleef ouer met hare twee Sonen,

4

^† Die namen Moabijtsche wijuen: Die eene hiet Arpa, die andere Ruth. Ende doen sy aldaer by thien Iaer ghewoont hadden,

† Ruth. 4.b.5.

5

Storuen sy alle beyde, Mahelon ende Chilion, alsoo dat dat wijf ouerbleef, den beyden sonen ende haren Manne.

6

⁺ Doen maeckte sy haer op met haren twee sonen wijuen, ende trock weder wt der Moabiten Lant. Want sy hadde beuonden inder Moabiten Landt, dat de HEEre zijn volck had besocht, ende hen broodt ghegheuen.

+ B vers 6

7

Ende ghinck wt vander plaetsen daer sy gheweest was, ende beyde haerder sonen huys vrouwen met haer. Ende doen sy ghinck opten wech dat sy weder soude comen int Landt Iuda,

8

Sprack sy tot haerder beyder sonen wijuen: Gaet henen, ende keert wederom, elck tot haerder Moeder huys. De HEEre doe aen v ontfermherticheyt, so ghy aen de dooden, ende aen my gedaen hebt.

9

De HEERE gheue v, dat ghy ruste vindet elc in haers mans huyse, ende custese. Doen hieuen sy haer stemme op, ende weenden,

10

Ende seyden tot haer: Wy willen met v tot dijnen volcke gaen.

11

Maer Naemi sprack: Keert wederom mijne dochteren. Waerom wildy met my gaen?^† Hoe can ick nv voortaen kinderen in mijnen lichaem gehebben, die uwe mannen zijn mochten?

† Deut. 25.a.5.

12

⁺ Keert wederomme mijne dochteren, ende gaet henen, want ick ben nv te oudt, dat ick eenen man soude nemen. Ende al waert dat ick seyde: Het is te hopen, dat ick desen Nacht eenen man neme, ende kinderen bare,

+ C vers 12

13

Hoe cont ghy doch ghebeyden, tot dat sy groot werden? Hoe wilt ghy vertoeuen, dat ghy gheen Mannen en sout nemen? Niet mijne dochteren, want my iammert uwer seer. Want des HEEren hant is ouer my wtghegaen.

14

Doen hieuen sy haer stemmen op, ende weenden noch meer, ende Arpa custe haers mans moeder: Maer Ruth bleef by haer.

15

Maer sy sprack: Siet, v swagherinne is weder ghekeert tot haren volcke, ende tot haren Godt: Keert ghy oock wederom uwer swagherinnen na.

16

Ruth antwoorde:^† Spreeckt my dat niet in, dat ick v verlaten soude, ende van v om keeren. Waer ghy henen gaet, daer wil ick ooc henen gaen: Waer ghy blijft, daer blijue ick oock. V volc is mijn volc,^* ende v Godt is mijn Godt.

† 2.Reg. 15.d.21

* Iudit. 11.d.21.

17

Waer ghy sterft, daer sterue ick ooc, daer wil ic oock begrauen worden. De HEEre doe my dit ende dat, de doot moet my ende v scheyden.

18

⁺ Als sy nv sach dat sy vast inden sin was met haer te gaen, soo liet sy af met haer daer af te spreken.

+ D vers 18

19

Also ghingen die beyde met malcanderen, tot dat sy tot Bethlehem quamen. Ende doen si tot Bethlehem in quamen, so ruerde haer de gheheele Stadt ouer hen, ende seyden: Is dat de Naemi?

20

Maer sy seyde tot hen: En heet my niet Naemi,⁺ maer Mara:⁺ Want de almachtighe heeft my seer bedroeft.

+ Naemi, heet mijnen lust.

+ Mara, heet bitter, oft bedroeft.

21

Vol trock ick wt, maer ydel heeft my de HEEre thuys ghebracht. Waerom heet gy my dan Naemi? Soo my de HEEre doch verootmoedicht, ende de Almachtighe bedroeft heeft.

22

Maer het was omtrent den tijt, dat den gersten oogst begost, Doen Naemi ende haers soons wijf Ruth de Moabitin, weder quamen vander Moabiten Lant te Bethlehem.