Den Bibel, Inhoudende dat Oude ende Nieuwe Testament (Biestkensbijbel)

¶ Dat .xx. Capittel.

¶ Hoe de selue sonde ghestraft wert.

1

⁺ DOen trocken de kinderen Israels wt, ende vergaderden hen te hoope, als eenen man, van Dan tot Berseba toe, ende vanden lande Gilead tot den HEEre tot Mizpa.

+ A vers 1

2

Ende traden te hoop de Ouerste des gantschen volcx van allen stammen Israels in der ghemeynten Godts, vier hondert duysent mannen te voet, die dat Sweert wt trocken.

3

Maer de kinderen BenIamins hoorden dat de kinderen Israels opwaerts nae Mizpa ghetrocken waren. Ende de kinderen Israels seyden: Segt, hoe is doch dat quaet toe ghegaen.

4

Doen antwoorde de Leuijt des wijfs man, die ghedoot was, ende sprack: Ick quam tot Gibea in BenIamin met mijnder Concubinen, om des nachts daer te blijuen.

5

Doen maecten hen teghen my op, de Borghers tot Gibea, ende omringden my int huys des nachts, ende dachten my te dooden. Ende hebben mijn Concubine ghescheynt, also dat si gestoruen is.

6

Doen nam ick mijn Concubine, ende hieuse in stucken, ende seyndese in alle velden des erfs Israels. Want si hebben een moetwillicheyt ende sotheyt ghedaen in Israel.

7

Siet, daer zijt ghy kinderen Israel alle, houdt raet, ende doet hier toe.

8

⁺ Doen maecte hem allet volck op, als een man, ende sprac: Daer en sal niemant in zijn Hutte gaen, noch in zijn huys wijcken.

+ B vers 8

9

Maer dat willen wy nv doen teghen Gibea: Laet ons dat Lot daerom werpen,

10

Ende nemen thien mannen van hondert, ende hondert van duysent, ende duysent van thien duysent, wt allen stammen Israels, dat si spijse nemen voor dat volck, dat sy comen ende doen met Gibea BenIamin nae alle haer sotheyt die si in Israel ghedaen hebben.

11

Also vergaderden hen tot der stadt alle mannen Israels, als een man, ende verbonden hen.

12

Ende de stammen Israels seynden mannen tot allen geslachten BenIamin, ende lieten hen seggen:^† Wat is dat voor een boosheyt, die by v gheschiet is?

† Iosue. 22.d.16.

13

^* Soo gheeft nv de mannen ouer, die boose boeuen tot Gibea, dat wyse dooden, ende dat quaet van Israel wech doen. Maer de kinderen BenIamin, en wilden de stemme haerder broeders der kinderen Israels niet hooren.

* 2.Reg. 20.d.21

14

Maer si vergaderden hen wten steden nae Gibea, om wt te trecken inden strijdt teghen de kinderen Israels.

15

⁺ Ende op dien dach werden getelt der kinderen BenIamins wt den steden sessentwintich duysent mannen, die dat sweert wt trocken, sonder de borghers tot Gibea,

+ C vers 15

16

Die werden seuen hondert ghetelt wtgelesen mannen. Ende onder allen desen volcke waren seuen hondert mannen wtgelesen, die slincx waren, ende costen metter slingheren een hayr raken, dat si niet en misten.

17

Maer de mannen van Israel (sonder die van BenIamin) werden ghetelt vier hondert duysent mannen, die dat sweert voerden, ende alle strijtbaer mannen waren.

18

Ende de kinderen Israels maeckten hen op, ende trocken opwaerts totten huyse Gods,^* ende vraechden Godt ende spraken: Wie sal voor ons op trecken om den strijt aen te vanghen teghen de kinderen BenIamin? De HEEre sprack: Iuda sal beghinnen.

* Iudi. 1.a.1. 18.b.5. 20.d.27. 1.Reg. 30.b.8.

19

Aldus maecten hen de kinderen Israels smorghens op, ende legerden hen voor Gibea.

20

Ende elck man van Israel ghinck wt

[p. 100r]

om te strijden teghen BenIamin, ende schicten hen te strijden teghen Gibea.

21

Doen vielen de kinderen BenIamin daer wt, wt Gibea, ende sloegen op dien dach van Israel, tweentwintich duysent ter neder.

22

⁺ Maer dat volck der mannen van Israel vermanden hen, ende wapenden hen noch voort te strijden in de selue plaetse, daer si hen des daechs voorleden gewapent hadden.

+ D vers 22

23

Ende de kinderen Israels trocken op, ende weenden voor den HEEre tot tsauonts toe, ende vraechden den HEEre ende spraken: Sullen wy meer ghenaken om te strijden teghen de kinderen BenIamin onse broederen? De HEEre sprack: Trect op tot hen.

24

Ende doen hen de kinderen Israels aen de kinderen BenIamin maecten des anderen daechs,

25

Vielen de BenIamiten wt Gibea hen teghen, des seluen daechs, ende sloeghen vanden kinderen Israels noch achthien duysent ter neder, die alle dat sweert voerden.

26

Doen trocken al de kinderen Israels op, ende allet volck, ende quamen totten huyse Gods, ende weenden. Ende bleuen aldaer voor den HEERE, ende vasten dien dach totten auont toe, ende offerden Brandtoffer, ende Danckoffer voor den HEERE.

27

Ende de kinderen Israels^* vraechden den HEEre (de Arcke des verbonts Godts, was aldaer doen ter tijt,

* Iudic. 1.a.1. 18.b.5. 20.c.18.

28

Ende Pinehas de soon Eleasar Aarons sone stont voor hem in dier tijt) ende spraken: Sullen wy noch meer wt trecken om te strijden teghen de kinderen BenIamin onse broederen, oft sullen wy aflaten? De HEERE sprack: Trect op, morghen wil icse in uwen handen geuen.

29

^+* Ende de kinderen Israels stelden^† laghen op Gibea rontom,

+ E vers 29

* Iosue. 8.a.4.

† Een achterwacht.

30

Ende de kinderen Israels trocken alsoo op, des derden daechs aen de kinderen BenIamin, ende wapenden hen aen Gibea, ghelijckerwijs te voren tweemael.

31

Doen voeren de kinderen BenIamin wt, den volcke teghen, ende trocken hen vander stadt, ende begosten te slaen, ende wonden sommighe vanden volck, ghelijc als te voren tweemael inden velde, op twee straten, daer deene nae BethEl, dander nae Gibea gaet, by dertich mannen in Israel.

32

Doen dachten de kinderen BenIamin: Sy zijn gheslagen voor ons, als te voren. Maer de kinderen Israels spraken: Laet ons vluchten dat wijse vander stadt trecken op der straten.

33

Doen maecten hen alle de mannen van Israel op van haerder plaetsen, ende rusteden hen toe, tot BaalThamar. Ende de achterhoede Israels quam te voorscijne van zijn plaetse vanden hole Gaba,

34

Ende quamen teghen Gibea thien duysent Mannen wtghelesen wt alle Israel, alsoo dat den strijt hert wert. Maer si en wisten niet dat hen dat ongheluck raken soude.

35

Alsoo sloech de HEEre BenIamin voor de kinderen Israels. Dat de kinderen Israels op dien dach, vijfentwintich duysent ende hondert mannen verdoruen in BenIamin, die alle dat sweert voerden.

36

⁺ Want doen de kinderen BenIamin saghen, dat si geslagen waren, gauen hen de Mannen Israels ruymte. Want sy verlieten hen op de Achterhoede die si by Gibea gestelt hadden.

+ F vers 36

37

Ende de Achterhoede haestede ooc, ende quam voorwaerts nae Gibea toe, ende trock haer daer aen, ende sloech alle de Stadt metter scherpten des sweerts.

38

Maer si hadden een Lose met malcanderen, de mannen van Israel ende de Achterhoede, om metten sweerde ouer hen te vallen: Als den roock vander Stadt op ghinck.

39

Doe hen nv de mannen Israels keerden inden strijt, ende BenIamin begost te slaen, ende wonde by dertich mannen, ende ghedachten: Sy zijn voor ons gheslagen, als inden voorgaenden strijt.

40

Doen begoste hem te verheffen eenen roock, recht opwaerts gaende. Ende BenIamin keerde hem achter hem om, ende siet doen ginc de geheele stadt op in de Locht.

41

Ende de mannen van Israel keerden hen ooc omme, ende veruaerden de mannen van BenIamin. Want de mannen BenIamin saghen datse dat ongheluck raken wilde, ende keerden hen voor de mannen Israels,

42

⁺ Op den wech nae der woestijnen. Maer den strijt volchde hen nae: Daer toe, die vanden steden daer in gecomen waren, die verdoruense midden onder hen.

+ G vers 42

43

Ende sy omringden BenIamin, ende iaechden hem nae, tot Manuah toe, ende vertradense tot voor Gibea toe, teghen der Sonnen opganc.

44

Ende het vielen van BenIamin achtien duysent mannen, die alle strijdtbaer mannen waren.

45

Doen keerden si hen, ende vluchten naeder woestijnen^† aenden steen Rimmon. Maer opter seluer straten sloeghen si vijf duysent mannen, ende volchden hen van achter na tot Gideon toe, ende sloegen haerder twee duysent.

† Iudic. 21.c.13.

46

Ende also vielen op dien Dach van BenIamin vijfentwintich duysent mannen, die dat sweert voerden, ende alle strijtbaer mannen waren.

47

Alleen ses hondert mannen keerden hen, ende vluchten nader woestijnen totten steen Rimmon, ende bleuen inden steen Rimmon vier maenden lanck.

48

Ende de mannen Israels quamen weder totten kinderen BenIamin, ende sloeghen metter scherpten des Sweerts, die inder Stadt, beyde lieden ende Vee, ende al watmen vant, ende alle steden diemen vant, verbrandemen met vier.