Den Bibel, Inhoudende dat Oude ende Nieuwe Testament (Biestkensbijbel)

¶ Dat .xviij. Capittel.

1

⁺ TOt dier tijt en wasser gheen^* Coninc in Israel. Ende de stamme der Daniten, sochte hem een erfdeel, daer si mochten woonen.^† Want daer en was tot op dien dach, noch geen erue voor hen gheuallen, onder den stammen Israels.

+ A vers 1

* Iudic. 17.b.6. 21.d.25.

† Iosu. 19.d.40

2

Ende de kinderen Dan, seynden wt hare gheslachten, van haer eynden vijf strijtbaer mannen van Sarea ende Esthaol om dat lant te bespieden ende te ondersoecken. Ende seyden tot hen: Reyst henen, ende bespiet dat lant. Ende si quamen op dat gheberchte Ephraim aen dat huys Micha, ende bleuen ouer nacht aldaer.

3

Ende de wijle dat si aldaer byden gesinne Micha waren, kenden si de stemme des Ionghelincks des Leuiten. Ende sy weken derwaerts, ende spraken tot hem: Wie heeft v herwaerts gebracht? Wat doet ghy daer? Ende wat hebdy hier?

4

⁺ Hy antwoorde hen: Alsoo ende alsoo heeft Micha bi my ghedaen, ende heeft my ghehuert dat ick zijn Priester soude zijn.

+ B vers 4

5

Sy seyden tot hem:^† Lieue, vraecht Godt, op dat wy beuinden, oft onsen wech, dien wy wandelen, ooc wel gelucken sal.

† Iudic. 1.a.1. 20.d.27. 1.Reg. 30.b.8. 3.Reg. 22.a.6. 2.Par. 18.a.4.

6

De Priester antwoorde hen: Trect henen met vreden. Vwen wech is recht voor den HEEre, die ghy trect.

7

Doen ghingen de vijf mannen henen, ende quamen tot Lais, ende saghen dat volck dat daer in was^† seker woonen op de maniere als de Sidoniers, stille ende seker, ende daer en was niemant, die hem leedt dede inden lande, oft een Heere ouer hen ware, ende waren verre vanden Sidoniers, ende en hadden niet metten lieden te doen.

† Sonder sorge

8

Ende si quamen tot haren broederen tot Sarea ende Esthaol, ende hare Broeders spraken tot hen: Hoe statet met v? Sy seyden:

9

⁺ Op, ende laet ons tot hen opreysen.^† Want wy hebben dat lant besien, dat is seer goet. Daerom haest v, ende en zijt niet luy opwaerts te reysen,

+ C vers 9

† Num. 13.c.27.

10

Op dat ghy coemt dat lant in te nemen. Als ghy coemt, soo suldy tot eenen sekeren volcke comen, ende dat lant is wijt ende breet, want Godt heuet in uwen handen ghegheuen. Een sulcken plaetse, daer niet en ghebreect van alle dat opter Aerden is.

11

Doen trocken van daer wt den gheslachte Dan, van Sarea ende Esthaol ses hondert mannen^* gherustet met haren wapenen, totten strijt,

* Ghewapent.

12

Ende trocken op, ende legherden hen tot Kiriath Iearim in Iuda, daer af noemden sy de plaetse den Legher Dan, tot op desen dach, dat achter Kiriath Iearim is.

13

⁺ Ende van daer ghinghen si opt gheberchte Ephraim, ende quamen totten huyse Micha.

+ D vers 13

14

Doen antwoorden de vijf mannen die wtghegaen waren, dat landt Lais te bespieden, ende spraken tot haren broederen: Weet ghy oock dat in desen huysen eenen lijfrock, Heylichdom, beelden ende Afgoden zijn? Nv moecht ghy toesien wat v te doen staet.

15

Sy weken derwaerts, ende quamen aen dat huys des Ionghelincx des Leuiten, in Michas huys, ende groeten hem vriendelijck.

16

Maer de ses hondert toegeruste met haren harnas, die vanden kinderen Dan waren, stonden voor de poorte.

17

Ende de vijf mannen die om dat lant te bespieden wtghetrocken waren, ghinghen op, ende quamen daer henen, ende namen dat Beelt, den Lijfrock, dat Heylichdom, ende Afgodt. De wijle stont de Priester voor de poorte by de ses hondert gheruste met haren harnas.

18

⁺ Als nv die ghene int huys Micha gecomen waren, ende namen dat Beelt, den Lijfrock, dat Heylichdom ende Afgodt, sprack de Priester tot hen: Wat maeckt ghy?

+ E vers 18

19

Sy antwoorden hem: Swijcht ende hout den mont toe, ende treckt met ons, dat ghy onse vader ende Priester zijt. Ist v beter dat ghy in des eenighen mans huys Priester zijt, oft onder eenen gheheelen stam, ende gheslachte in Israel?

20

Dat beuiel den Priester wel, ende nam beyde den Lijfrock, dat Heylichdom ende Beelt, ende quam mede onder dat volck.

21

Ende doen si hen keerden ende wech trocken, seynden si de kinderkens ende dat Vee, ende al wat si costelijcx hadden voor hen wech.

22

⁺ Doen si nv verre van Michas huys quamen, riepen de mannen die inden huyse waren by Michas huys, ende volchden

+ F vers 22

[p. 99r]

den kinderen Dan nae, ende riepen de kinderen Dan.

23

Maer si keerden haer aensicht om, ende spraken tot Micha: Wat is v, dat ghy alsulcken ghecrijsch maect?

24

Hy antwoorde: Ghy hebt mijne goden ghenomen, die ick ghemaeckt hadde, ende den Priester, ende trecket wech, ende wat heb ick nv meer? Ende ghy vraecht noch wat my ghebreect?

25

Maer de kinderen Dan spraken tot hem: En laet uwe stemme niet hooren by ons, op dat niet op v en comen de toornighe lieden, ende v siele, ende ws Huys siele, niet verdaen en worde.

26

Also ghingen de kinderen Dan haers weechs. Ende doen Micha sach dat si hem te sterck waren, keerde hy hem, ende quam weder in zijn huys.

27

⁺ Maer si namen dat Micha ghemaect had, ende den Priester die hy hadde, ende quamen aen Lais, aen een stil seker volc. Ende sloeghense metter scherpten des Sweerts, ende verbernden de stadt met vier.

+ G vers 27

28

Ende daer en was niemant diese verloste: Want si lach verre van Sidon, ende en hadden metten lieden niet te doen, ende si lach inder valleyen, welck aen BethRehob leyt. Doen timmerden si de stadt, ende woonden daer in,

29

^† Ende noemdense Dan, nae den name haers Vaders Dan, die van Israel gheboren was. Ende de stadt hiet voortijts Lais.

† Iosu. 19.d.47

30

Ende de kinderen Dan rechten dat Beelt voor hen op. Ende Ionathan de sone Gerson, des soons Manasse, ende zijne sonen waren Priesters onder den stamme der Daniten,^† totter tijt toe, dat sy wten lande gheuanghen wechgheuoert werden.

† 1.Reg. 4.a.2.

31

Ende setten alsoo onder hen dat Beelt Micha, dat hy ghemaect hadde, alsoo langhe als dat huys Godts te Silo was.