Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvij. Capittel.

¶ Van Micha ende sinen afgodischen beelde ende sinen lijfrock.

1

⁺ DAer was een man opten geberchte Ephraim, geheeten Micha,

+ A vers 1

2

Die sprack tot zijnder moeder: Die duysent ende hondert^† siluerlingen, die ghy tot v ghenomen hebt, ende ghesworen, ende gheseyt voor mijnen ooren: Siet, dat selue ghelt is by my, ick hebt tot my ghenomen. Doen sprac zijn moeder: Gheseghent sy mijn soon den HEEre.

† Silueren penninghen.

3

Alsoo gaf hy zijn moeder die duysent ende hondert siluerlinghen weder. Ende zijn moeder sprack: Ick heb dat ghelt den HEEre gheheylicht van mijnder hant voor mijnen soon, datmen een ghegoten Beelt ende Afgodt daer wt maken sal. Daerom gheue ict v nv weder.

[p. 98v]

4

⁺ Maer hy gaf zijnder moeder dat gelt weder. Doen nam zijn moeder twee hondert siluerlingen, ende brachtse totten goutsmit: Die maecte een ghegoten beelt ende Afgodt, dat was daer nae inden huyse Micha.

+ B vers 4

5

Ende de man Micha, had alsoo een Godts huys, ende maeckte eenen Lijfrock, ende dat^† heylighe, ende vulde een van sinen sonen de hant, dat hy zijn Priester wert.

† Oft Heylichdom.

6

^* In dien tijt en wasser gheen Coninck in Israel, ende een yegelijck dede dat hem recht dochte.

* Iudic. 18.a.1 21.d.25. 1.Reg. 8.a.5.

7

Daer was een Iongelinc van Bethlehem Iuda onder dat gheslachte Iuda, ende hy was een Leuijt, ende was daer vreemt.

8

Maer hy trock wt der stadt Bethlehem Iuda, om te wandelen werwaerts hy coste.⁺ Ende doen hy opt gheberchte Ephraim quam, totten huyse Micha, dat hy sinen wech ginge,

+ C vers 8

9

Vraechde hem Micha: Van waer coemt ghi? Hi antwoorde hem: Ick ben een Leuijt van Bethlehem Iuda, ende wandele werwaerts ick mach.

10

Micha sprack tot hem: Blijft by my, ghy sult mijn Vader ende mijn Priester zijn. Ic wil v iaerlijcx thien siluerlinghen, ende besproken cleederen, ende voetsel geuen, ende de Leuijt ghinck met hem.

11

De Leuijt begonst te blijuen byden man. Ende hy hielt den Ionghelinck als een soon.

12

Ende Micha vulde den Leuijt de hant, dat hy zijn Priester werdt: Ende was alsoo inden huyse Micha.

13

Ende Micha seyde: Nv weet ick, dat my de HEEre wel doen sal, om dat ick eenen Leuijt tot eenen Priester hebbe.