Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Hoe dat de gheboorte Simsons vanden Engel zijnen Vader ende zijnder moeder vercondicht wert.

1

⁺ ENde de kinderen Israels^* deden noch voort quaet voor den HEERE.^† Ende de HEERE gafse inden handen der Philisteen, veertich iaer.

+ A vers 1

* Iudi. 2.b.11. 3.a.7.b.12. 4.a.1. 6.a.1. 10.b.6.

† Iudi. 10.b.7 1.Reg. 12.b.9.

2

Daer was een man te Sarga van eenen gheslachte der Daniten, gheheeten Manoah, ende zijn wijf was onuruchtbaer, ende en baerde niet.

3

Ende de Enghel des HEEREN openbaerde den Wijue, ende sprack tot haer: Siet, ghy zijt onuruchtbaer, ende en baert niet: Maer ghy sult beurucht worden, ende eenen sone baren.

4

^* Daerom wacht v nv, dat ghy gheenen wijn noch stercken dranck en drinct, ende niet onreyns en eet.

* Num. 6.a.3.

5

Want ghy sult beurucht worden, ende eenen soon baren^* die gheen scheermes op thooft en sal comen.^† Want dat knechtken sal een^‡ Nasir Gods zijn, van Moeders Lijue aen, ende hy sal beginnen Israel te verlossen wt der Philisteen hant.

* 1.Reg. 1.b.11.

† Mat. 2.d.23.

‡ Verloefde.

6

⁺ Doen quam dat wijf, ende seyt haren man, ende sprac: Daer quam een man Gods tot my, ende zijn ghedaente was aen te sien als eenen Enghel Gods, seer veruaerlijck, alsoo dat ick hem niet en vraechde, van waer, oft waer henen. Ende hy en seyde my niet, hoe hy hiet.

+ B vers 6

7

Maer hy sprack tot my:^† Siet, Ghy sult beurucht werden, ende eenen soon baren. Daerom en drinct nv gheenen wijn noch stercken dranck, ende en eet niet onreyns. Want dat knechtken sal een Nasir Gods zijn van Moeders Lijue aen, tot in zijn doot.

† Gen. 16.b.5.c.11. 17.c.19. 4.Re. 4.b.16 Luc. 1.c.31.

8

Doen badt Manoah den HEERE, ende sprack: Ach HEERE laet den man Gods weder tot ons comen, dien ghy gheseynt hebt dat hy ons leere wat wy metten knechtken doen sullen dat gheboren sal werden.

9

Ende Godt verhoorde de stemme Manoah. Ende de Enghel Gods quam weder totten wijue. Maer sy sadt opten velde, ende haer man Manoah en was niet by haer.

10

Doen liep sy haestelijck henen, ende bootschaptet haren man, ende sprack tot hem: Siet, de man is nv gheopenbaert, die heden tot my quam.

11

⁺ Manoah maecte hem op, ende ginck zijnen Wijue na, ende quam totten man, ende sprack tot hem: Sijt ghy de man, die metten Wijue ghesproken heeft? Hy sprack: Ia.

+ C vers 11

12

Ende Manoah seyde: Als nv comen sal, dat ghy ghesproken hebt, welck sal des knechtkens wijse ende werck zijn.

13

De Engel des HEEren sprac tot Manoah: Hy sal hem wachten voor alle, dat ick den Wijue gheseyt hebbe.

14

Hy en sal niet eten dat wt den Wijnstoc coemt, ende hy en sal gheenen Wijn noch stercken dranck drincken, ende niet onreyns eten. Al wat ick haer gheboden heb dat sal sy houden.

15

Manoah sprack totten Enghel des HEEren: Lieue, laet v hier behouden, wy willen v een bocxken bereyden.

16

Maer de Enghel des HEEren antwoorde Manoah: Al waert dat ghy my hier schoon behielt^* so en ete ick doch van uwer spijsen niet. Maer wildy den HEEre eenen Brantoffer doen, so muecht ghijt

* Genes. 18.a.8. 19.a.3. Tob. 12.d.19.

[p. 97r]

offeren. Want Manoah en wist niet dattet eenen Enghel des HEEren was.

17

Ende Manoah sprack totten Engel des HEEren: Hoe heet ghy, dat wy v prijsen, als nv coemt dat ghy ghesproken hebt?

18

Maer de Enghel des HEEren sprack tot hem:^‡ Waerom vraechdy na mijnen name, die noch wonderlijck is?

‡ Gen. 32.e.27. Exod. 3.c.13.

19

^† Doen nam Manoah een Bocxken, ende Spijsoffer, ende offerdet op eenen steen den HEEre.^* Ende hy maecktet wonderbaerlijck. Maer Manoah ende zijn wijf saghen toe.

† Iudi. 6.d.20.

* Psal. 72.c.18. 136.a.4.

20

Ende doen de vlamme op voer vanden Altaer ten Hemel, voer de Engel des HEEren inder vlamme des Altaers opwaerts. Doen dat Manoah ende zijn wijf saghen, vielen si ter Aerden op haer aensicht.

21

Ende de Enghel des HEEren en openbaerde Manoah ende zijnen wijue niet meer. Doen bekende Manoah dattet een een Engel des HEEren was.

22

Ende sprack tot zijnen wijue:^† Wy moeten de doot steruen, om dat wy Godt ghesien hebben.

† Exod. 33.d.20. Iudi. 6.e.22.

23

Maer zijn wijf antwoorde hem: Waert dat de HEEre lust had ons te dooden, so en had hy dat Brantoffer ende Spijsoffer van onsen handen niet ghenomen. Hy en soude ooc ons al dat niet vertoont hebben, noch ons sulcx hebben laten hooren, soo nv gheschiet is.

24

Ende dat wijf baerde eenen soon^* ende hiet hem Simson. Ende dat knechtken nam toe, ende de HEEre seghende hem.

* 1.Reg. 12.b.11.

25

Ende de gheest des HEEren begost met hem te zijn inden Legher Dan, tusschen Sarea ende Esthaol.