Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ De Ephraimiten heffen haer op tegen Iephthah, ende worden verslagen.

[p. 96v]

1

⁺ ENde die van Ephraim riepen, ende ghinghen ten Noorden waert^* ende spraken tot Iephthah: Waerom sydy inden strijt ghetrocken teghen de kinderen Amon, ende en hebt ons niet gheroepen, dat wy met v hadden ghetrocken? Wy willen v huys met vyer verbernen.

+ A vers 1

* Iudi. 8.a.1.

2

Iephtaph sprack tot hen: Ick, ende mijn volck hadden een groote sake teghen de kinderen Amon, ende ick riep v aen: Maer ghy en hielpt my niet wt haren handen.

3

Doen ick nv sach dat ghy niet helpen en wildet, stelde ick mijn siele in mijn hant, ende track wech teghen de kinderen Amon, ende de HEERE gafse in mijne hant. Waerom coemt ghy nv tot my op, om teghen my te strijden?

4

⁺ Ende Iephtaph vergaderde alle mannen in Gilead, en street tegen Ephraim. Ende de mannen in Gilead sloeghen Ephraim, daerom datse seyden: Ghy Gileaditen zijt doch, onder Ephraim ende Manasse, als de vluchtige tot Ephraim.

+ B vers 4

5

Ende de Gileaditen namen in, dat Veer der Iordanen, voor Ephraim. Als dan de veltvluchtighe Ephraiten spraken: Laet my henen ouer gaen. Soo seyden de mannen van Gilead tot hem: Sydy een Ephraite? Als hy dan antwoorde: Nee,

6

Soo deden sy hem spreken: Schiboleth. So sprack hy: Siboleth. Ende en costet niet recht segghen. Soo grepen sy hem, ende versloeghen hem aen dat Veer der Iordanen. Also dat tot dier tijt van Ephraim tweenueertich duysent vielen.

7

Maer Iephtah oordeelde Israel ses iaren. Ende Iephthah die Giliadite sterf, ende werdt begrauen inde steden tot Gilead.

8

⁺ Na desen oordeelde Israel, Ebzan van Bethlehem:

+ C vers 8

9

Die hadde dertich sonen, ende dertich dochteren gaf hy wt, ende dertich dochteren nam hy weder in, van buyten zijnen sonen, ende oordeelde Israel seuen iaer,

10

Ende sterf, ende werdt begrauen tot Bethlehem.

11

Na desen oordeelde Israel Elon een Sebulomijt, ende oordeelde Israel thien iaer,

12

Ende sterf, ende wert begrauen tot Aialon, inden lande Sebulon.

13

Na desen oordeelde Israel, Abdon een soon Hillel, een Piriathonijt:

14

Die hadde veertich sonen, ende dertich soons kinderen^* die op tseuentich Ezel vuelens reden, ende oordeelde Israel acht iaer,

* Iudi. 10.a.4.

15

Ende sterf, ende werdt begrauen tot Piriathon, inden lande Ephraim, opten gheberchten der Amalekiten.